Болгариядагы Жахабанын Күбөлөрү башкаларга Кудай жөнүндө жакшы кабар таратып, анын Сөзүн — Ыйык Китепти — изилдегенге жардам берип жатышат. Аларга көмөк кылыш үчүн 2000-жылдан бери башка өлкөлөрдө жашаган жүздөгөн Жахабанын Күбөлөрү Болгарияга көчүп бара башташкан. Кабар айтыш үчүн чет өлкөгө баруу кандай кыйынчылыктар менен коштолот? Анын акыбети кайтат деп эмне үчүн айта алабыз? Бул суроолорго жооп алыш үчүн Болгарияга көчүп баргандардын айрымдарына кулак түрөлү.

 Англияда жашаган Даррен мындай дейт: «Алдыбызга башка өлкөгө көчүп барып, муктаждык көп жерде кызмат кылабыз деген максат коюп жашап келгенбиз. Доун экөөбүз баш кошкондон кийин Лондонго көчүп барып, орус тилинде сүйлөгөндөргө Ыйык Китепти изилдегенге жардам бергенбиз. Башка өлкөгө көчүп кетели деп бир нече жолу пландаштырганбыз. Бирок ар кандай себептерден улам болбой калган. Оюбуз ишке ашпай калды окшойт деп багынып калганбыз. Бирок бир досубуз жагдай-шартыбыздын өзгөргөнүн, максатыбызга жете аларыбызды түшүнгөнгө жардам берген». Даррен менен Доун кайсы өлкө жарчылардын жардамына көбүрөөк муктаж экенин издештире башташкан. Ошол эле учурда өздөрү көчүп бара ала турган өлкөнү тандаганга аракет кылышкан. Ошентип, 2011-жылы Болгарияга көчүп кетишкен.

 Көбүнчө башка өлкөгө көчүп баргандардын өздөрүнүн кызматы тууралуу күйүп-жанып айтып беришет. Бул кызматтын мындай түрү жөнүндө ойлонуп көрбөгөндөрдү да ойго салып коюшу мүмкүн. «Мен Түштүк Америкада жана Африкада кызмат кылган Жахабанын Күбөлөрү менен таанышып калдым. Алар аябай бактылуу көрүндү. Жүзүнөн нур жанып турганы, кызматта болгон окуяларын айтып бергени жүрөгүмдү ушунчалык козгоду. Бул мага рухий максаттарымды өзгөрткөнгө түрткү берди»,— дейт жолдошу Лука экөө Италияда жашаган Жаада.

 Клара жана Матияс деген эки баласын алып алып Томаш менен Вероника 2015-жылы Чех Республикасынан Болгарияга көчүп барышкан. Аларга эмне түрткү берген? Томаш мындай дейт: «Биз чет өлкөгө көчүп барган ишенимдештерибиздин, анын ичинде туугандарыбыздын үлгүсү тууралуу ойлондук. Кызматта болгон окуялары жөнүндө да ой жүгүрттүк. Алардын кызматтан алып жаткан кубанычы бизди кайдыгер калтырган жок. Ошон үчүн бул тууралуу үй-бүлөбүз чогуу сүйлөштүк». Томаштын үй-бүлөсү учурда жаңы аймакта — Болгариянын Монтана деген шаарында — кубанычтуу кызмат кылып жатат.

 Линда да Болгарияга көчүп баргандардын бири. Ал мындай деп ой бөлүшөт: «Көп жыл мурун Эквадорго баргам. Ал жактан кызмат кылыш үчүн Эквадорго көчүп келгендер менен таанышкам. Ошондо мен дагы бир күнү муктаждык көп жерде кызмат кыла аламбы деп ойлонуп калгам». Финляндиялык жубайлар, Петтери менен Надя, да башкалардын үлгүсү жөнүндө ой жүгүртүшкөн. Алар: «Жыйналышыбызда мурун башка өлкөгө көчүп барып, ал жактагыларга Кудайдын жолуна түшкөнгө жардам берген бир нече тажрыйбалуу жарчы бар болчу. Алар ошол жакта кызмат кылган жылдары жөнүндө жалындап айтып беришчү. Ошол жылдар алардын жашоосундагы эң сонун жылдар болуптур»,— дейт.

 Чет өлкөдө кызмат кылгысы келгендер баарын жакшылап ойлонуштурушу керек (Лука 14:28—30). «Башка өлкөдө кызмат кылуу тууралуу олуттуу ойлоно баштаганда,— дейт бельгиялык Нели,— Кудайдан тиленип алып, биздин адабияттарга чыккан ошол темадагы макалаларды изилдегенге кириштим. Анан чет өлкөгө көчүп барыш үчүн эмнелерди кылышым керектигин аныктап алдым».

 Польшадан болгон Кристиан менен Ирминанын Болгарияда кызмат кылып жатканына тогуз жылдан ашты. Алар Польшадан Болгарияга көчкөнгө чейин эле болгар тилиндеги топто кызмат кылышкан. Бул аларга чоң жардам берген. Ал топтогулар Кристиан менен Ирминага болгар тилин үйрөнгөнгө көмөк кылып, дем-шык берип турушкан. Кристиан менен Ирмина мындай дейт: «Муктаждык бар жерге барып өзүңдү Жахабага тапшырсаң, ал эчтекеден кем кылбай кам көрөт. Муну эч нерсеге салыштырып болбойт! Жахабага: „Мен барам! Мени жибер“,— десеңер, ал мурун кыла албайм деп ойлогон иштерди да кылганга жөндөмдүү кылып коёт экен» (Ышая 6:8).

 Швейцарияда жашаган Рето менен Корнелия тийиштүү даярдыктарды көрүп, акча топтош үчүн жашоосун жөнөкөйлөтүшкөн. Алар: «Болгарияда жашоо кандай экенин билиш үчүн биротоло көчүп барардан бир жыл мурун ал жакка бир жумага бардык. Анан ошол жакта кызмат кылган тажрыйбалуу миссионерлер менен сүйлөштүк. Алар бизге жакшы кеңештерин айтышты»,— дейт. Рето менен Корнелия ошол кеңештерге ылайык иш кылышкан. Азыр алардын Болгарияда кызмат кылып жатканына 20 жылдан ашты.

 Чет өлкөгө көчүп баргандар жаңы, оңой эмес шарттарга ылайыкташышы керек болот (Элчилер 16:9, 10; 1 Корунттуктар 9:19—23). Көптөрүнө жергиликтүү тилди үйрөнүү кыйынга турат. Жогоруда кеп кылынган Лука мындай дейт: «Бизге жыйналыштан өз сөзүбүз менен жооп берген дайыма жакчу. Бирок бир учурда аялым экөөбүзгө болгар тилинде жөнөкөй эле бир жооп даярдаш аябай кыйын болду. Өзүбүздү кичинекей баладай эле сезчүбүз. Чынын айтсам, жыйналыштагы балдар бизден жакшыраак жооп беришчү».

 Германиялык Равил мындай дейт: «Болгар тилин үйрөнүү аябай оор болду. Бирок мен: „Каталарыңа өтө эле олуттуу карай бербей, жаңылганда каткырып кой“,— деп өзүмө эскертип турчумун. Кыйынчылыктарды көйгөй деп эмес, Жахабага кылган ыйык кызматымдын бир бөлүгү деп эсептейм».

 Жогоруда айтылган Линда мындай дейт: «Мен тил үйрөнгөнгө такыр жокмун. Анысы аз келгенсип, болгар тили оор экен. Бүттү, үйрөнө албайм деген күндөрүм көп болгон. Эл сени түшүнбөй же сен элди түшүнбөй атканда кадимкидей жалгызсырайсың. Жахаба менен болгон мамилемди бекем сакташ үчүн адабияттарды эне тилимде — швед тилинде — окуп-изилдечүмүн. Акыр-аягы, сүйүктүү ишенимдештеримдин жардамы менен болгар тилин үйрөнө алдым».

 Башка өлкөгө көчүп кеткендер туугандарынан, досторунан алыс болгондуктан аларды сагынып да кыйналышат. Болгарияга жолдошу Яннис экөө көчүп барган Ева: «Башында ушунчалык жалгызсырагандыктан досторубуз, үйдөгүлөрүбүз менен бат-баттан чалышып сүйлөшүп жаттык. Бул жерден да жаңы досторду тапканга аракет кылдык»,— дейт.

 Мындан башка да кыйынчылыктар бар. Швейцариядан көчүп келишкен Роберт менен Лиана: «Жаңы тил, жаңы маданият биз үчүн чоң кыйынчылык болду. Кышкысын суук сөөктөн өтөт экен. Биз ал кезде мындайга даяр эмес болчубуз»,— деп эскеришет. Анткен менен оң маанай сактап, тамашакөй болгондун аркасында бул жубайлар 14 жылдан бери Болгарияда ишенимдүү кызмат кылып келатышат.

 Муктаждык көп жерде кызмат кылууга чын жүрөктөн чакырган Лили мындай деп ой бөлүшөт: «Өз өлкөмдө жүрө берсем, Жахабаны ушунчалык жакшы таанып-билмек эмес болушум керек. Бул жакта бүт убактымды башкаларга жардам бергенге жумшайм. Мунун аркасында рухий жактан өсүп, кызматым канааттануу тартуулап, кубанычым артып жатат». Лилинин жолдошу Равил анын сөзүнө толук кошулат. Равил: «Ар кайсы өлкөдөн келген ынталуу, тажрыйбалуу жарчылар менен тааныштык. Алардан көп нерсени үйрөндүм Кызматтын ушундай түрүн аркалоо жашообузга көрк кошту»,— деп кошумчалайт.

 Көптөрдүн даярдуулук рухун көрсөтүп, муктаждык көп жерге көчүп баргандын аркасында «Падышалык жөнүндөгү... жакшы кабар дүйнө жүзү боюнча бардык элдерге... таратылып» жатат (Матай 24:14). Жахаба кызмат кылыш үчүн Болгарияга көчүп барууга даяр болгон ишенимдештерибиздин ой-тилектерин орундатып, алардын иш-аракеттерине батасын берди (Забур 20:1—4).