Mbangi za Yehova zikwa zebi e? Bakaka bampwanaku balubaka mbuka moshi, ba lusalaka nawu, peleko balukotaka lukolo lumoshi. Tala kani tweka mokena naku m’samu mia Bibila. Mu butsieleka ngâna banani twena, mpe mubungu diantsi tuzonzelaka nkwikulu zeto kwe bakaka e?

Twe ntsiana bantu babansoni. Mu binkulu mpe mu makanda ma mpila na mpila tutukaka. Bakaka dibundu dieri nawu, bakaka kaberia kwikilaka mu Nzàmbi ko. Tekela twaba Mbangi, beto bansoni twabaka ntangu mu fiongonina Bibila. (Bisalu 17:11) Takwikila mu mio mitàlongoka, mpe tabonga m’kanu wa sambila Yehova Nzàmbi.

Ndongokolo ya Bibila ndandu tubakilaka yo. Moria kwa bantu babansoni, m’samu mia mingi mieneto na nkondolo. Mbo tusarilaka ngolo mu tumamana mishiku mia Bibila mu luzíngu lweto lwa lumbu na lumbu, nsungamanu tumonaka mu luzíngu lweto. (Mikunga 128:1, 2) Ntsiangu tutelaka bampwaneto m’samu mia mbote mitulongokaka mu Bibila.

Mu mishiku mia Nzàmbi tudiatilaka. Mishiku mio milongaka Bibila mbo mitunatinaka mambote, mitutumaka mu zitisa bantu, mu ba na buderede mpe na nsayi. Mbo mitusarisaka mpe mu ba bantu bababote, be ngolo mu tsisalu mpe be na tsiwisa na bifu bia mbote mu makanda meto. Mbo tuzebi ti “Nzàmbi ka solaka mazu ko,” twe bakristo ba kanda dimoshi mu nza yam’kaka, katwena na bikaku ko bia mazu mpe katukotaka mu politike ko. Ninga twena moria bantu babansoni, kâ twena kanda dimoshi diswasakane na makanda makaka.​—Bisalu 4:13; 10:34, 35.

• Mu ntsia misamu Mbangi za Yehova be ntsiana bantu bakaka e?

• Ngâna ntsia misamu mia mbote tulongokaka mu Bibila e?