Imbata 10
Mi Eco Inzita Adaru Ri Ni Ngoni Ru?
“Emi te emi ageyi nabi inzoru ’diyi si.”
“[E]yi e’da tisi kini eyi ni Mungu ra, te eyi ga eri si ’yeta eyini ’yele risi.”
1. Dini ada ri lu alu a’dule ya?
Yesu imba ndra ’ba ima vuti bipi ’diyi pini dini alu, a’dule ada ru ri. Eri ekile geri ’ba ma dri cepi idri ’dani ’dani ria ri le. Geri ’da ma dria Yesu ’yo ’dini: “’Ba eri isupi ’diyi were.” (Matayo 7:14) Mungu le lu inzita engapi E’yo erini Biblia ma alea ri a’dule. ’Ba dria inzita ada ri inzipi ’diyi ki tualu a’ita alu ma alea.
2. E’yo Yesu ni ’yo Kristiani inzoru ’diyi ma dria ri ngoni?
Yesu fe ndra bilendu liza kini nabi inzoru ’diyi ki nga imbata Kristiani ni ’diyi eza ra. Amveleru, eyi e’da ’ba inzita adari inzipi ’diyi le. Kanisa eyini ’diyi e’da ala Kristiani ada ’diyi niri le. Te mi eco ’ba ’diyi inzoru ri ni ra. Ngoni ngoni? Inzita adari eco lu Kristiani ada ifi ’yaza kilili ru be ’diyi ki ofu ni.
3. Mi eco di ’ba inzita ada ri inzipi ’diyi ki ni ngoni ru?
Mi ma ne nga geri ndundu towi eyi e’dapi ’diyi:
’Ba inzita adari ma alea ’diyi ki ruta fe Biblia ni E’yo Mungu niri ru. Eyi o’bi azita alenia ’diyi ma vuti obi asi dria si. Ani e’yo ’disi dini adaru ri ma esele coza dini egata ’ba ada ni imbapi ri be ri re. (Matayo 15:7-9) ’Ba inzita ada ri inzipi ’diyi ki e’yo eyini imba ’ba azi ’diyi pini ri ki ’ye ’yeta si.
—Mi la Yohana 17:17; 2 Timoteo 3:16, 17. ’Ba Yesu ma vuti bipi ada ’diyi ki ru Munguni, Yehova i ri inzi. Yesu inzi ru Munguni ri erini eri ’bazu nizaru risi. Ko ’ba kakau ma aza ru Mungu ni nizu azini imba eyi izizu ru Mungu niri ma ovu inzizaru. (Matayo 6:9) Pari mini o’azu ria, dini Mungu ma ru ’bapi nizaru ri ngo i ya?
—Mi la Yohana 17:26; ’Ba Rumia ’Diyi 10:13. 14. Kristiani ada ’diyi ki e’yo imba Suru Munguni ri ma dria. Mungu epe Yesu ma ti emuzu e’yo baru Suru niri oluzu. Suru Munguni ri lu asi ’baza alu ’ba ada ni ri. Yesu mu drile e’yo oluzu drinia kpere erini dra ria. (Luka 4:43; 8:1; 23:42, 43) ’Yo ndra kini ’ba ima vuti bipi ’diyi nga e’yo olu drinia. Agu azi ka emu mini e’yo nze Suru Munguni ri ma dria, mini ega risi eco ovu dini ngo ma alea ya?
—Mi la Matayo 24:14. Mi eco eyi ni eyini fizu politiki ma alea ngiri ngiri azi ndu ndu ’diyi pie ku ri si. (Yohana 17:16; 18:36) Dika, obiki vini adriza azini egata onzi wudrikuru ’di niri ma vuti ku.
—Mi la Yakobo 4:4. Kristiani ada ’diyi ki leta ada ri e’da eyi ma eselea. Engazu E’yo Mungu niri ma alea, oniki ruta fezu suru dria ni. Tro dini inzoru ’diyi ni a’di ’diza suru ndu ndu ma alea ri ki atizu ra ti, ’ba inzita ada ri inzipi ’diyi ’yekini ’dile ku. (Mika 4:1-3) Kani ra ria, ’ba inzita adari inzipi ’diyi ki sawa eyini azini afa eyini ovuzu eyi pie ’diyi ayu ’ba azi ’diyi ma aza kozu.
—Mi la Yohana 13:34, 35; 1 Yohana 4:20.
4. Mi eco di dini ada ri ngo i’ari ni ra ya?
Dini imbata erini dria dria e’dupi Biblia ma alea, ru Munguni rupi, azini e’yo olupi Suru Munguni ma dria asi ’baza ’ba ada niri ru ri ngo i ya? Ongulumu ini leta e’dapi azini fipi a’di ma alea ku ri ngo i ya? Mini ega ri ngo i?
