’Ba Yehova ma E’yo Eti Nzepi mini ni ra ’diyi ma kalafe si ya? Ama azi ki mi jo ejele ni, ’ba mini azi ngazu eyi pie, kaniku mini o’azu eyi pie, azini sukulu lazu eyi pie ri ma azi ki. Sawa azini si anzeki vini ’dele ’di mini e’yo Biblia ma dria ’bo. Adaru ama ’ba ngole ’diyi, azini asisile amani acizu a’ita amani ri ma e’yo ecezu ’ba azi ’diyi ni ri ngoni?

Ama tro tro ’ba azi ’diyi le. Ama engaki suru azini enyati ndundu ma alea. Ama azi ’diyi ndra dini ndu ma alea, dika azi ’diyi a’iki ndra Mungu ku. Te, de nga ama ecakini ’Ba E’yo Eti Nzepi ’Diyi ru ku, a’duki ndra woro sawa amani imbata Biblia ma alea ’diyi onizu kililiru ra ka. (’Yeta 17:11) Ama alu alu a’iki di e’yo amani oni ’diyi, vutinia apeki di Yehova Mungu ni inzizu.

Ama orodri isu Biblia oniza si. Trotro ’ba dria le, ama dri ci ocoko ndundu ’diyi si azini okpoako amani risi. Te amani o’bizu azita Biblia ma alea ’diyi ma vuti obizu risi, idri amani ri isu di orodri angiri tu. (Zaburi 128:1, 2) ’Dari asisile alu amani e’yo onyiru amani oni Biblia ma alea ’diyi oluzu ’ba azi ’diyi ni ri.

Ama imbata engapi Mungu vu ’diyi ayu idri amani ma alea. Imbata engapi Biblia ma alea, ekile asi ada azini asi ndriza le ’diyi fe ama o’a egaza kilili ri be, azini eri fe ama ruta fe ’ba azi ’diyi ni. Imbata ’diyi fe ’ba enyati ma alea ’diyi zo geri kilili ru risi, dika eri ti ecita azini adriza kilili ri eji aku ma alea. Amani nira kini “Mungu openi ’ba ku” risi, imbata ’diyi di ama ici tualu adripi ru ama ma eselea wudrikuru si dria opendu suru ni azini politiki niri koko. Ama alu alu ni tro ovuzu ’ba azi ’diyi le ra ti, tualu amutiru ama ndu.—’Yeta 4:13; 10:34, 35.

• Afa fepi ’Ba Yehova ma E’yo Eti Nzepi ’Diyi ni ovuzu tro tro ’ba azi ’diyi le ri a’du afa ni ya?

• Imbata ’Ba Yehova ma E’yo Eti Nzepi ’Diyi ni oni engazu Biblia ma alea ’diyi ngoki ya?