SOKI tokufi, Nzambe akolinga kosekwisa biso, elingi koloba, kozongisa biso na bomoi?— Yobo, moto malamu, andimaki ete Nzambe alingaka kosekwisa bato. Yango wana, ntango Yobo akanisaki ete akómi pene na kokufa, alobaki na Nzambe ete: “Okobyanga mpe ngai nakozongisela yo.” Yobo alobaki ete Yehova Nzambe akozala na mposa makasi to akolinga mpenza kosekwisa ye.​—Yobo 14:14, 15.

Yesu azali kaka lokola Yehova Nzambe, Tata na ye. Yesu alingaka kosalisa biso. Ntango moto moko oyo azalaki na maladi ya maba alobaki na ye ete, “soki olingi, okoki kokómisa ngai pɛto,” Yesu azongisaki ete: “Nalingi.” Mpe abikisaki moto yango na maladi na ye ya maba.​—Malako 1:40-42.

Yesu ayekolaki kolinga bana epai ya Tata na ye. Mbala mibale na ntango ya kala, Yehova asalelaki basaleli na ye mpo na kosekwisa bana mike. Eliya asɛngaki Yehova asekwisa mwana mobali ya mwasi moko oyo ayambaki ye malamu. Mpe Yehova asalaki yango. Yehova asalelaki  mpe mosaleli na ye Elisa mpo na kosekwisa mwana mobali moko ya moke.​—1 Mikonzi 17:17-24; 2 Mikonzi 4:32-37.

Koyeba ete Yehova alingaka biso mingi ezali likambo ya esengo, ezali bongo te?— Asukaka kokanisa biso kaka ntango tozali na bomoi te. Akanisaka biso mpe ata soki tokufi. Yesu alobaki ete Tata na ye atalelaka kutu bato oyo bakufá oyo ye alingi lokola nde bazali na bomoi! (Luka 20:38) Biblia elobi ete ‘ezala liwa to bomoi to makambo ya sikoyo to makambo oyo ekoya ekokoka te kokabola biso na bolingo ya Nzambe.’​—Baloma 8:38, 39.

Ntango Yesu azalaki awa na mabelé, amonisaki ete Yehova amibanzabanzaka mpo na bana mike. Oyebi lisusu ete Yesu azwaki ntango ya kosolola na bana makambo ya Nzambe. Oyebaki ete Nzambe apesaki Yesu nguya ya kozongisa bana na bomoi?— Tiká tólobela makambo oyo esalemaki ntango Yesu asekwisaki elenge mwasi moko ya mbula 12, mwana ya mobali moko oyo babengi Yailo.

Yailo azali kofanda na mwasi na ye ná mwana na bango kaka moko pene na Mbu ya Galilai. Mokolo moko mwana mwasi yango abɛli makasi, mpe Yailo amoni ete mwana alingi akufa. Abandi kokanisa Yesu, moto ya misala ya kokamwisa; Yailo ayoki nsango ete ye akoki kobikisa bato. Yango wana Yailo akei koluka ye. Akuti Yesu na pembeni ya Mbu ya Galilai, azali koteya ebele ya bato.

Yailo akɔti na katikati ya ebele wana ya bato tii akei kokwea na makolo ya Yesu. Alobi na Yesu ete: ‘Mwana na ngai ya mwasi azali kobɛla makasi. Okolinga oya kosalisa ye? Nasɛngi yo, oya.’ Mbala moko, Yesu akei elongo na Yailo. Ebele wana ya bato oyo bayaki kotala Moteyi Monene, bango mpe balandi ye. Kasi nsima ya kotambola mwa ntaka moke, bato mosusu oyo bauti na ndako ya Yailo bayei mpe bayebisi ye ete: “Mwana na yo ya mwasi akufi! Mpo na nini kotungisa moteyi lisusu?”

 Maloba ya bato wana ekómi na matoi ya Yesu. Ayebi mpasi oyo Yailo azali na yango na motema ndenge mwana na ye kaka moko akufi. Na bongo Yesu alobi na ye ete: ‘Kobanga te. Zalá kaka na kondima epai ya Nzambe, mpe mwana na yo ya mwasi akobika.’ Balandi kaka nzela na bango tii bakómi na ndako ya Yailo. Bakuti baninga ya libota wana bazali kolela. Bazali na mpasi na motema mpo mwana oyo azalaki moninga na bango, akufi. Kasi Yesu ayebisi bango ete: ‘Bótika kolela. Mwana oyo akufi te, kasi alali nde mpɔngi.’

Ntango Yesu alobi bongo, bato babandi kosɛka, mpo bayebi ete mwana mwasi wana akufi. Kasi, mpo na nini Yesu alobi ete mwana mwasi wana alali nde mpɔngi?— Mpo na yo, alingi mpenza koteya bato wana nini?— Alingi koteya bango báyeba ete liwa ezali lokola mpɔngi moko ya makasi. Alingi koteya bango ete na nguya ya Nzambe, akoki kozongisa moto oyo akufi na bomoi kozanga mpasi kaka ndenge tokoki kolamwisa moto oyo alali mpɔngi.

Yesu asɛngi moto nyonso abima na ndako, longola kaka bantoma na ye Petelo, Yakobo, ná Yoane mpe tata ná mama ya mwana mwasi yango. Na nsima akɔti epai mwana yango azali. Asimbi ye na lobɔkɔ mpe alobi ete: ‘Elenge mwasi, tɛlɛmá!’ Mpe na mbala moko atɛlɛmi mpe abandi  kotambola! Tata na ye ná mama na ye batondi mpenza na esengo.​—Malako 5:21-24, 35-43; Luka 8:40-42, 49-56.

Sikoyo kanisá. Lokola Yesu azongisaki elenge mwasi wana na bomoi, akoki mpe kosala bongo mpo na bato mosusu?— Okanisi ete akosala mpenza bongo?— Ɛɛ, akosala yango. Yesu ye moko alobaki ete: “Ngonga ezali koya wana baoyo nyonso bazali na kati ya malita ya kokanisama bakoyoka mongongo na [ngai] mpe bakobima.”​—Yoane 5:28, 29.

Okanisi ete Yesu alingaka mpenza kosekwisa bato?— Ndakisa mosusu na kati ya Biblia ezali kosalisa na kopesa eyano na motuna wana. Likambo oyo esalemi mokolo moko pene na engumba Naini ezali komonisa ndenge Yesu ayokaka ntango bato bazali kolela soki moto akufi.

Mwasi moko azali na kati ya ebele ya bato oyo batiki Naini, bakei kokunda mwana na ye ya mobali. Mobali na ye akufi eumeli naino mingi te, mpe sikoyo mwana na ye kaka moko akufi. Oyo nde mawa! Ebele ya bato ya Naini bazali kolanda wana bazali komema ebembe ya mwana na ye na libándá ya engumba yango. Mwasi yango azali kolela, mpe bato bazali na likoki ya kobɔndisa ye te.

Kaka na mokolo yango, Yesu ná bayekoli na ye bango wana bazali koya na engumba Naini. Pene na porte ya engumba yango, bakutani na ebele wana ya bato oyo bakei kokunda mwana mobali ya mwasi wana. Ntango Yesu amoni mwasi wana azali kolela, ayokeli ye mawa mingi. Mawa makasi ya mwasi wana esimbi motema ya Yesu. Alingi asalisa mwasi yango.

Maloba ya boboto mpe ya kondimisa ya Yesu ebendi likebi ya mwasi wana, mpe Yesu alobi na ye: “Tiká kolela.” Ezaleli ya Yesu mpe maloba na ye ebendi likebi ya bato nyonso. Wana azali kokende epai ebembe ezali, bato nyonso bamituni soki alingi kosala nini. Yesu apesi mitindo, alobi ete: “Elenge mobali, nalobi na yo, Tɛlɛmá!” Na mbala moko, afandi! Mpe abandi koloba.​—Luka 7:11-17.

 Kanisá naino ndenge mwasi wana ayokaki! Okoyoka ndenge nini soki moto oyo ozalaki kolinga, oyo akufaki, azongi lisusu na bomoi?— Yango emonisi ete Yesu alingaka mpenza bato mpe azalaka na mposa ya kosalisa bango, ezali bongo te?— Kanisá esengo oyo ekozala na mokili ya sika ya Nzambe ntango tokoyamba bato oyo bakozonga na bomoi!​—2 Petelo 3:13; Emoniseli 21:3, 4.

Na ntango wana bato mosusu oyo bakosekwa ekozala bato toyebaki bango liboso, ná bana mpe. Tokoyeba bango kaka ndenge Yailo ayebaki mwana na ye ya mwasi ntango Yesu asekwisaki ye. Kati na bato yango ekozala na baoyo bakufaki esili koleka bambula ebele mpenza. Kasi Nzambe akobosana bango te, atako bazalaki na bomoi kala.

Koyeba ete Yehova Nzambe mpe Mwana na ye, Yesu, balingi biso mingi ezali likambo ya esengo, ezali bongo te?— Balingi biso tózala na bomoi, kaka mwa bambula te, kasi nde mpo na seko!