OYO BATO BALOBAKA

Bato mosusu bakanisaka ete Paradiso ezali na yango kaka lisapo mpamba. Basusu bakanisaka ete ezali esika moko oyo ezali lokola jardin ya kitoko, epai bato ya malamu bafandaka libela na libela mpe basalaka misala oyo epesaka bango esengo mpe matomba.

BIBLIA ELOBI NINI?

Liloba “paradiso” esalelamaki mpo na kolobela elanga ya Edene, esika ya liboso oyo bato bafandaki. (Ebandeli 2:7-15) Biblia emonisaka ete elanga yango ezalaki mpenza esika ya solosolo epai mwasi ná mobali ya liboso bafandaki kozanga maladi mpe liwa. (Ebandeli 1:27, 28) Lokola batosaki Nzambe te, mwasi ná mobali yango babungisaki paradiso yango. Kasi, bisakweli mingi ya Biblia elobi ete na mikolo ezali koya, bato bakosepela na paradiso oyo ekozongisama.

ETALI YO NA NINI?

Soki Nzambe azali bolingo, ebongi mpenza ete apesa basambeli na ye ya sembo bomoi ya malamu na esika lokola paradiso. Ekozala mpe malamu ayebisa bato makambo oyo basengeli kosala mpo andima bango. Biblia elobi ete yo mpe okoki kondimama na Nzambe soki oyekoli koyeba ye mpe otosi mibeko na ye.​—Yoane 17:3; 1 Yoane 5:3.

“Yehova Nzambe alonaki elanga na Edene, . . . mpe kuna atyaki moto oyo ye asalaki.”​—Ebandeli 2:8.

OYO BATO BALOBAKA

Bamosusu bakanisaka ete paradiso ezali na likoló, nzokande basusu balobaka ete ekozongisama awa na mabele na mikolo ezali koya.

BIBLIA ELOBI NINI?

Paradiso ya liboso ezalaki awa na mabele. Nzambe asalaki mabele mpo bato báfanda libela na libela. Biblia elobi ete Nzambe asalaki mabele mpo eumela libela. (Nzembo 104:5) Elobi mpe boye: “Likoló ezali ya Yehova, Kasi mabele, apesá yango bana ya bato.”​—Nzembo 115:16.

Na yango, ezali kokamwisa te soki Biblia elobi ete paradiso ekozala awa na mabele. Na paradiso yango, Nzambe akopesa bato bomoi ya seko. Boyokani mpe kimya ekozala kuna. Mpasi mpe minyoko ekosila. Mpe bato bakozala na likoki ya kosepela mpenza na biloko kitoko oyo ezali na mabele.​—Yisaya 65:21-23.

“Hema ya Nzambe ezali esika moko na bato, . . . mpe liwa ekozala lisusu te, ná lilaka ná koganga ná mpasi ekozala lisusu mpe te.”​—Emoniseli 21:3, 4.

OYO BATO BALOBAKA

Mangomba mingi eteyaka ete kaka bato malamu nde bakofanda na paradiso. Kasi eyebanaka te soki kozala moto “malamu” elakisi nini. Bamosusu bakanisaka ete esuki kaka na kopesa mabɔkɔ na milulu ya mangomba mpe kosala mabondeli oyo lingomba ebongisá.

BIBLIA ELOBI NINI?

Biblia eteyaka ete “bayengebene” bakofanda na paradiso. Kasi, banani bazali bayengebene na miso ya Nzambe? Ezali te bato oyo bamipesaka na milulu ya lingomba mpe baboyaka kosala mokano ya Nzambe. Biblia elobi boye: “Yehova asepelaka nde na makabo ya kotumba mpe na bambeka koleka kotosa mongongo ya Yehova? Talá! Kotosa eleki mbeka.” (1 Samwele 15:22) Na mokuse, “bayengebene” oyo bakofanda libela na paradiso ezali bato oyo batosaka mibeko ya Nzambe ndenge emonisami na Biblia.

OKOKI KOSALA BOYE

Kotosa mibeko ya Nzambe esɛngi kaka te kopesa mabɔkɔ na milulu ya mangomba. Makambo oyo osalaka mokolo na mokolo ekoki kosepelisa Nzambe to te. Okoki kosepelisa Nzambe soki ozali koyekola Biblia na likebi mpenza. Kosepelisa ye ezali mpasi te. Biblia elobi ete “mibeko na ye ezali kilo te.” (1 Yoane 5:3) Nzambe akopesa yo libaku ya kokɔta na paradiso mpo na botosi na yo.

“Bayengebene bakozwa mabele, mpe bakofanda wana seko.”​—Nzembo 37:29.