Biyano na mituna ya Biblia
Bakufi bakozonga lisusu na bomoi?
Na ntembe te, Mozalisi ya bomoi akoki kozongisa bato na bomoI
Bomoi eutá epai ya Yehova Nzambe. (Nzembo 36:9) Boye, ebongi te tóloba ete kaka ye nde akoki kozongisa bakufi na bomoi? Biblia endimisi biso ete akosala yango na mikolo ezali koya. (Tángá Misala 24:15) Kasi, mpo na nini akosala yango?
Na ebandeli, Nzambe akanaki ete bato bázala na bomoi libela na mabele. (Ebandeli 1:31; 2:15-17) Alingi kaka bato bázala na bomoi ya ndenge wana. Esalaka ye mpasi ntango amonaka bomoi ya mokuse tókóma na yango oyo etondi na mikakatano.—Tángá Yobo 14:1, 14, 15.
Baoyo bakosekwa bakofanda wapi?
Nzambe asalaki bato mpo báfanda na likoló? Te. Nzambe asalaki baanzelu mpo báfanda na likoló. Asalaki bato mpo báfanda na mabele. (Ebandeli 1:28; Yobo 38:4, 7) Na kotalela likanisi yango, tólobela bato oyo Yesu asekwisaki. Bato oyo asekwisaki bazongaki na bomoi awa na mabele. Ndenge moko mpe, bato mingi oyo bakosekwa na mikolo ezali koya bakozonga na bomoi awa na mabele.—Tángá Yoane 5:28, 29; 11:44.
Kasi, Nzambe aponi bato moke oyo bakosekwa mpo na bomoi na likoló, epai bakozala na nzoto ya elimo. (Luka 12:32; 1 Bakorinti 15:49, 50) Baoyo bakosekwa mpo na kokende na likoló bakoyangela mabele elongo na Kristo lokola bakonzi.—Tángá Emoniseli 5:9, 10.
Talá mpe...
LINƆ́NGI YA MOSƐNZƐLI
Elikya mpo na bakufi—Nini ekoki kotinda yo otyela yango motema?
Biblia epesi ntina mibale oyo ebongi kotyela lisekwa motema.
BIYANO NA MITUNA YA BIBLIA
Lisekwa ezali nini?
Okoki kokamwa ntango okoyeba soki banani bakozonga na bomoi.
BIYANO NA MITUNA YA BIBLIA
Nani akokende na likoló?
Bato mingi bazali na likanisi ya lokuta ete bato malamu nyonso bakokende na likoló. Biblia eteyaka mpenza nini?
