Mokanda ya liboso ya Samwele 16:1-23
16 Nsukansuka, Yehova alobaki na Samwele boye: “Tii ntango nini okozala na mawa boye mpo na Saulo,+ awa ngai nasili koboya ye azala mokonzi ya Yisraele?+ Tondisá liseke na yo na mafuta+ mpe kende. Nakotinda yo epai ya Yese,+ moto ya Beteleme, mpo naponi mokonzi kati na bana na ye ya mibali.”+
2 Kasi Samwele alobaki: “Nakokende ndenge nini? Ntango Saulo akoyoka yango, akoboma ngai.”+ Yehova azongisaki: “Zwá mwana-ngɔmbɛ moko ya mwasi elongo na yo, mpe okoloba: ‘Nayei kopesa Yehova mbeka.’
3 Ntango okopesa mbeka, obengisa Yese; bongo nakoyebisa yo oyo okosala. Osengeli kotya moto oyo nakolakisa yo mafuta.”+
4 Samwele asalaki oyo Yehova alobaki. Ntango akómaki na Beteleme,+ bankulutu ya engumba yango bazalaki kolɛnga ntango bakutanaki na ye, mpe batunaki ye: “Koya na yo elimboli kimya?”
5 Na yango alobaki: “Ɛɛ, elimboli kimya. Nayei kopesa Yehova mbeka. Bómisantisa, mpe bóya elongo na ngai na mbeka yango.” Bongo asantisaki Yese ná bana na ye ya mibali mpe nsima na yango, abengisaki bango na esika ya kopesa mbeka.
6 Bongo ntango bakómaki mpe Samwele amonaki Eliabe,+ alobaki: “Na ntembe te moto oyo Yehova aponi,* ye oyo liboso na ye.”
7 Kasi Yehova alobaki na Samwele: “Kolanda elongi na ye te mpe bolai na ye te,+ mpo ngai naboyi ye. Mpo ndenge oyo moto atalaka ekeseni na ndenge oyo Nzambe atalaka. Moto atalaka oyo emonanaka na miso, kasi Yehova atalaka oyo ezali na kati ya motema.”+
8 Bongo Yese abengaki Abinadabe+ mpe alekisaki ye liboso ya Samwele, kasi ye alobaki: “Yehova aponi mpe oyo te.”
9 Na nsima Yese alakisaki ye Shama,+ kasi Samwele alobaki: “Oyo mpe, Yehova aponi ye te.”
10 Na yango, Yese abimisaki bana na ye nsambo ya mibali liboso ya Samwele, kasi Samwele alobaki na Yese: “Yehova aponi baoyo te.”
11 Nsukansuka, Samwele alobaki na Yese boye: “Bana na yo nyonso ya mibali bango oyo?” Yese alobaki: “Etikali leki na bango ya nsuka;+ azali koleisa bampate.”+ Bongo Samwele alobaki na Yese: “Tindá bato bákende kozwa ye, mpo tokolya te tii ntango akoya awa.”
12 Na yango atindaki bato mpe bayaki na ye. Davidi azalaki nzoto motane, miso kitoko, mpe bonzenga.+ Bongo Yehova alobaki: “Tɛlɛmá, tyá ye mafuta, mpo ye nde naponi!”+
13 Na yango, Samwele azwaki liseke ya mafuta+ mpe atyaki ye mafuta na miso ya bandeko na ye. Mpe banda mokolo wana, elimo ya Yehova ebandaki kosala makasi kati na Davidi.+ Na nsima, Samwele atɛlɛmaki mpe azongaki na Rama.+
14 Bongo elimo ya Yehova elongwaki epai ya Saulo.+ Mpe Yehova atikaki ete elimo ya mabe* ekóma kotungisa ye.+
15 Basaleli ya Saulo balobaki na ye: “Lokola Nzambe atiki ete elimo ya mabe ekóma kotungisa yo,
16 tobondeli yo nkolo na biso, pesá basaleli na yo oyo bazali liboso na yo mitindo ete báluka mobali moko oyo ayebi kobɛta nzɛnzɛ.+ Mbala nyonso oyo Nzambe akotika ete elimo ya mabe etungisa yo, mobali yango akobɛta nzɛnzɛ, mpe okomiyoka malamu.”
17 Na yango, Saulo alobaki na basaleli na ye: “Nabondeli bino, bólukela ngai mobali moko oyo abɛtaka nzɛnzɛ, mpe bómemela ngai ye.”
18 Moko ya basaleli yango alobaki: “Talá! Namonaki ndenge mwana mobali moko ya Yese moto ya Beteleme azali kobɛta nzɛnzɛ. Abɛtaka yango malamu mpenza! Azali mobali ya mpiko, mpe elombe ya etumba.+ Ayebi mpenza koloba, azali mobali kitoko,+ mpe Yehova azali na ye.”+
19 Bongo Saulo atindaki bamemi-nsango epai ya Yese mpe alobaki: “Tindelá ngai naino mwana na yo Davidi, oyo azali kobatela bampate.”+
20 Na yango Yese atindaki Davidi epai ya Saulo. Azwaki mampa, molangi moko ya mposo ya nyama oyo ezali na vinyo, mwana moko ya ntaba, atyaki yango likoló ya mpunda, mpe apesaki yango Davidi mpo amemela Saulo.
21 Na ndenge wana nde Davidi akendaki epai ya Saulo mpe akómaki kosalela ye.+ Saulo akómaki kolinga ye mingi, mpe Davidi akómaki momemi-bibundeli na ye.
22 Saulo atindelaki Yese maloba oyo: “Nabondeli yo, tiká Davidi akoba kosalela ngai, mpo andimami na miso na ngai.”
23 Mbala nyonso oyo Nzambe azalaki kotika ete elimo ya mabe etungisa Saulo, Davidi azalaki kozwa nzɛnzɛ mpe kobɛtɛla ye, mpe yango ezalaki kokitisa Saulo motema mpe elimo ya mabe ezalaki kotungisa ye lisusu te.+
