Mokanda ya mibale ya Ntango 3:1-17
3 Bongo Salomo abandaki kotonga ndako ya Yehova+ na Yerusaleme na Ngomba Moria,+ epai Yehova abimelaki tata na ye Davidi,+ na esika oyo Davidi abongisaki na esika ya kotutatuta mbuma ya Ornane+ Moyebusi.
2 Abandaki kotonga na mokolo ya mibale ya sanza ya mibale, na mbula ya minei ya boyangeli na ye.
3 Moboko oyo Salomo atyaki mpo na kotonga ndako ya Nzambe ya solo ezalaki na bolai ya mapeko 60 mpe na bonene ya mapeko 20,+ na kolanda bimekeli ya kala.*
4 Ndako ya kokɔtela oyo ezalaki liboso ezalaki na bolai ya mapeko 20; bolai na yango ekokanaki na bonene ya ndako.* Bosanda na yango ezalaki mapeko 20;* mpe azipaki bifelo ya kati na wolo ya pɛto.+
5 Azipaki bifelo ya ndako monene na mabaya ya nzete ya jenevriye, na nsima azipaki mabaya yango na wolo ya malamu,+ mpe akómisaki yango kitoko na bililingi ya banzete ya mbila+ mpe bashɛni ya mike.+
6 Lisusu, azipaki ndako yango na mabanga kitoko ya ntalo;+ mpe wolo+ oyo asalelaki ezalaki wolo oyo eutaki na Parvaime.
7 Azipaki ndako yango mobimba na wolo, ezala mabaya ya nsamba, minɔkɔ ya ndako, bifelo mpe baporte;+ asalaki mpe mayemi ya bakeruba na bifelo.+
8 Na nsima asalaki eteni* ya Esika Eleki Mosantu;+ bolai na yango ekokanaki na bonene ya ndako; ezalaki mapeko 20, mpe bonene na yango ezalaki mapeko 20. Asalelaki talanta* 600 ya wolo ya malamu mpo na kozipa yango.+
9 Kilo ya wolo oyo basalelaki bansɛtɛ ezalaki shekele 50;* mpe azipaki bashambrɛ ya likoló na wolo.
10 Na nsima, na eteni* ya Esika Eleki Mosantu, asalaki bakeruba mibale ya bikeko, mpe azipaki yango na wolo.+
11 Bolai ya mapapu ya bakeruba+ nyonso ezalaki mapeko 20: lipapu moko ya keruba ya liboso ezalaki na bolai ya mapeko mitano mpe etutaki efelo ya ndako; lipapu na yango mosusu ezalaki na bolai ya mapeko mitano mpe etutanaki na lipapu moko ya keruba ya mibale.
12 Lipapu moko ya keruba ya mibale ezalaki na bolai ya mapeko mitano, mpe etutaki efelo mosusu ya ndako; lipapu na yango mosusu ezalaki na bolai ya mapeko mitano mpe etutanaki na lipapu moko ya keruba ya liboso.
13 Mapapu ya bakeruba yango esembolamaki mpe esalaki mapeko 20; batɛlɛmaki na makolo na bango mpe bilongi na bango ezalaki kotala na kati.*
14 Asalaki mpe rido+ na nsinga ya bulé, na lɛnɛ ya mwa motane-bulé, na nsinga ya motane makasi, mpe na elamba ya kitoko. Mpe asalaki bililingi ya bakeruba likoló na yango.+
15 Liboso ya ndako, asalaki makonzí mibale+ oyo ezalaki na bolai ya mapeko 35; mpe motó oyo ezalaki likoló ya likonzí mokomoko ezalaki ya mapeko mitano.+
16 Asalaki mpe bashɛni, lokola oyo balataka na nkingo, mpe atyaki yango na nsɔngɛ ya makonzí; asalaki mpe bambuma 100 ya nzete ya grenade mpe atyaki yango na bashɛni yango.
17 Atɛlɛmisaki makonzí liboso ya tempelo, moko na ngámbo ya lobɔkɔ ya mobali* mpe moko na ngámbo ya lobɔkɔ ya mwasi;* apesaki oyo ya ngámbo ya lobɔkɔ ya mobali nkombo Yakine* mpe oyo ya ngámbo ya lobɔkɔ ya mwasi nkombo Boaze.*
Maloba na nse
^ Lipeko moko = 44,5 cm, kasi bato mosusu balobaka ete “bimekeli ya kala” ezali lipeko ya molai oyo ezalaki 51,8 cm. Talá Ap. B14.
^ Baminiskri mosusu ya kala elobi “120,” kasi baminiskri mosusu mpe mabongoli mosusu elobi “mapeko 20.”
^ To, “mapeko 20, banda nsuka tii nsuka ya ndako.”
^ Lil., “ndako.”
^ Lil., “ndako.”
^ Elingi koloba, na ngámbo ya Esika Mosantu.
^ To, “na sudi.”
^ To, “na nɔrdi.”
^ Elimboli, “tiká Ye [elingi koloba, Yehova] apika makasi.”
^ Mbala mosusu elimboli, “na makasi.”
