Emoniseli epai ya Yoane 3:1-22
3 “Komelá anzelu ya lisangá ya Sarde boye: Moto oyo azali na bilimo nsambo ya Nzambe+ mpe na minzoto nsambo+ alobi makambo oyo: ‘Nayebi misala na yo, oyebani* ete ozali na bomoi, nzokande okufá.+
2 Kebá,+ mpe lendisá biloko oyo etikali oyo ekómaki pene ya kokufa, mpo namoni te ete osilisi makambo nyonso oyo Nzambe alingi osala.*
3 Yango wana, kanisá ntango nyonso oyo ozwi mpe oyo oyoki, kobá kobatela yango, mpe bongolá motema.+ Ya solo soki olamuki te, nakoya lokola moyibi,+ mpe okoyeba ata moke te ngonga oyo nakobimela yo.+
4 “‘Nzokande, ozali na mwa bato* na Sarde oyo bakómisaki te bilamba na bango mbindo,+ mpe bakotambola elongo na ngai na bilamba ya mpɛmbɛ,+ mpo babongi na yango.
5 Moto oyo alongi+ bakolatisa ye bilamba ya mpɛmbɛ,+ mpe nakoboma nkombo na ye te na buku ya bomoi,+ kasi nakondima nkombo na ye liboso ya Tata na ngai mpe liboso ya baanzelu na ye.+
6 Moto oyo azali na matoi ayoka oyo elimo ezali koloba na masangá.’
7 “Komelá anzelu ya lisangá ya Filadelfia boye: Moto oyo azali mosantu,+ oyo alobaka solo,+ oyo azali na fungola ya Davidi,+ oyo soki afungoli, moto moko te akoki kokanga, mpe soki akangi, moto moko te akoki kofungola, alobi makambo oyo:
8 ‘Nayebi makambo oyo osalaka—talá! natye liboso na yo porte oyo efungwami,+ oyo moto moko te akoki kokanga. Nayebi ete ozali na nguya moke, atako bongo otosaki liloba na ngai mpe owanganaki nkombo na ngai te.
9 Talá! Bato ya sinagoga ya Satana oyo balobaka ete bazali Bayuda, nzokande bazali Bayuda te+ kasi bazali nde kokosa—talá! nakosala ete báya kogumbama na makolo na yo mpe nakosala ete báyeba ete ngai nalingá yo.
10 Lokola otosaki liloba oyo oyokaki mpo na ezaleli* na ngai ya koyika mpiko,+ ngai mpe nakobatela yo na ngonga ya komekama,+ oyo ekoya na mabele mobimba esika bato bafandi, mpo na komeka bato oyo bafandi na mabele.
11 Nazali koya nokinoki.+ Kangamá makasi na oyo ozali na yango, mpo moto moko te azwa motole na yo.+
12 “‘Moto oyo alongi—nakokómisa ye likonzí na tempelo ya Nzambe na ngai; akobima lisusu te, mpe nakokoma likoló na ye nkombo ya Nzambe na ngai+ mpe nkombo ya engumba ya Nzambe na ngai, Yerusaleme ya Sika+ oyo ezali kouta na likoló epai ya Nzambe na ngai mpe kokita, mpe nkombo na ngai ya sika.+
13 Moto oyo azali na matoi ayoka oyo elimo ezali koloba na masangá.’
14 “Komelá anzelu ya lisangá ya Laodikia+ boye: Talá makambo oyo Amen,+ motatoli+ ya sembo mpe ya solo,+ ebandeli ya bozalisi ya Nzambe,+ alobi:
15 ‘Nayebi makambo oyo osalaka, ozali mpiɔ te mɔtɔ mpe te. Nalingaki ozala mpiɔ to mɔtɔ.
16 Bongo lokola ozali kaka mwa molunge, mɔtɔ te+ mpiɔ mpe te,+ nakosanza yo na monɔkɔ na ngai.
17 Lokola olobaka: “Nazali mozwi+ mpe nanduki bomɛngo mpe nazali ata na mposa ya eloko moko te,” kasi oyebi te ete ozali moto ya mpasi mpe moto ya mawa, mobola, moto oyo akufá miso mpe bolumbu.
18 Nazali kopesa yo toli osomba epai na ngai wolo oyo epɛtolami na mɔtɔ mpo okóma mozwi, osomba bilamba ya mpɛmbɛ mpo olata mpe mpo nsɔni ya bolumbu na yo emonana te,+ mpe osomba nkisi ya miso mpo opakola na miso na yo+ bongo omona.+
19 “‘Bato nyonso oyo ngai nalingaka mingi, namonisaka bango mabunga na bango mpe napesaka bango disiplini.+ Yango wana, zalá na molende mpe bongolá motema.+
20 Talá! Natɛlɛmi na porte mpe nazali kobɛta kɔkɔkɔ. Soki moto ayoki mongongo na ngai mpe afungoli porte, nakokɔta na ndako na ye mpe nakolya bilei ya mpokwa elongo na ye mpe ye elongo na ngai.
21 Moto oyo alongi+ nakopesa ye nzela afanda elongo na ngai na kiti na ngai ya bokonzi,+ kaka ndenge ngai mpe nalongaki mpe nafandi+ elongo na Tata na ngai na kiti na ye ya bokonzi.
22 Moto oyo azali na matoi ayoka oyo elimo ezali koloba na masangá.’”
Maloba na nse
^ Lil., “ozali na nkombo.”
^ To, “namoni te ete okokisi misala na yo nyonso liboso ya Nzambe na ngai.”
^ Lil., “mwa bankombo.”
^ To mbala mosusu, “olandaki ndakisa ya ezaleli.”
