Kobima 34:1-35
34 Bongo Yehova alobaki na Moize ete: “Katá bitanda mibale ya mabanga lokola oyo ya liboso,+ mpe nakokoma na bitanda yango maloba oyo ezalaki na bitanda ya liboso,+ oyo obukaki.+
2 Omibongisa mpo na ntɔngɔ, mpo na ntɔngɔ okomata na Ngomba Sinai mpe okotɛlɛma liboso na ngai, kuna na nsɔngɛ ya ngomba.+
3 Kasi moto moko te akomata elongo na yo, mpe moto mosusu te asengeli komonana ata esika moko na ngomba yango. Ezala etonga moko te ya bampate to ya bangɔmbɛ esengeli kolya liboso ya ngomba wana.”+
4 Na yango Moize akataki bitanda mibale ya mabanga lokola oyo ya liboso mpe alamukaki ntɔngɔntɔngɔ mpe amataki na Ngomba Sinai, kaka ndenge Yehova apesaki ye mitindo, mpe azwaki bitanda yango mibale ya mabanga na lobɔkɔ na ye.
5 Bongo Yehova akitaki+ na kati ya lipata mpe atɛlɛmaki elongo na ye kuna mpe asakolaki nkombo ya Yehova.+
6 Yehova azalaki koleka liboso na ye mpe azalaki kosakola ete: “Yehova, Yehova, Nzambe ya motema mawa+ mpe ya ngɔlu,+ ayokaka nkanda noki te+ mpe atondi na bolingo ya sembo*+ mpe na solo,*+
7 amonisaka bolingo ya sembo epai ya bankóto,+ alimbisaka libunga ná kobuka mibeko mpe lisumu,+ kasi akozanga ata moke te kopesa basali mabe etumbu,+ mpe mpo na libunga ya batata, ayeisaka etumbu na bana mpe bana ya bana, na libota ya misato mpe na libota ya minei.”+
8 Moize akendaki mbangu kogumbama mpe afukamaki elongi na nse.
9 Bongo alobaki ete: “Soki sikoyo nandimami na miso na yo, Ee Yehova, nabondeli yo, tiká Yehova atambola kati na biso,+ atako tozali bato ya motó makasi,*+ mpe limbisá libunga na biso mpe lisumu na biso,+ mpe zwá biso tózala eloko na yo moko.”
10 Bongo alobaki ete: “Talá nazali kosala kondimana: Liboso ya bato na yo nyonso, nakosala makambo ya kokamwa oyo esalemá* naino te na mabele mobimba to na kati ya bikólo nyonso,+ mpe bato nyonso oyo ozali kofanda kati na bango bakomona mosala ya Yehova, mpo ezali likambo moko ya nsɔmɔ nde nazali kosala ná bino.+
11 “Tyá likebi na mitindo oyo nazali kopesa yo lelo.+ Talá nazali kobengana liboso na yo Baamore, Bakanana, Bahiti, Baperizi, Bahivi ná Bayebusi.+
12 Kebá ete osala te kondimana na bato oyo bafandi na mokili epai ozali kokende,+ mpo yango ekoki kokómela yo motambo.+
13 Kasi bokokweisa bitumbelo na bango, mpe bokobuka makonzí na bango ya losambo, mpe bokokata banzete* na bango ya losambo.+
14 Osengeli te kogumbamela nzambe mosusu,+ mpo Yehova azali Nzambe oyo asɛngaka* kokangama kaka na ye.* Ya solo, azali Nzambe oyo asɛngaka kokangama kaka ye.+
15 Kebá ete osala te kondimana na bato oyo bafandi na mokili yango, mpo ntango bakosala pite na banzambe na bango mpe bakopesa mbeka epai ya banzambe na bango,+ moto moko akobenga yo, mpe okolya mbeka na ye.+
16 Na ntembe te okozwa bana basi na bango mosusu mpo na bana na yo ya mibali,+ mpe bana na bango ya basi bakosala pite na banzambe na bango mpe bakosala ete bana na yo ya mibali básala pite na banzambe na bango.+
17 “Osengeli te kosala banzambe ya bikeko na ebende oyo enyangwisami.+
18 “Okosala fɛti ya Limpa ezangá levire.+ Okolya limpa ezangá levire, kaka ndenge napesaki yo mitindo; okosala yango mikolo nsambo na ntango oyo etyamá na sanza ya Abibe,*+ mpo na sanza ya Abibe nde obimaki na Ezipito.
19 “Mwana nyonso ya liboso ya mobali azali* ya ngai,+ ezala bibwɛlɛ na yo nyonso, ata mwana mobali ya liboso ya ngɔmbɛ to ya mpate.+
20 Mwana ya liboso ya mpunda okosikola yango na mpate. Kasi soki osikoli yango te, osengeli kobuka nkingo na yango. Okosikola mwana nyonso ya liboso ya bana na yo ya mibali.+ Moto moko te akomonana liboso na ngai mabɔkɔ mpamba.
21 “Okosala mosala mikolo motoba, kasi na mokolo ya nsambo okopema.*+ Ata na ntango ya kobalola mabele mpe na ntango ya kobuka mbuma, okopema.
22 “Mpe okosala fɛti na yo ya bapɔsɔ na mbuma ya liboso oyo eteli na eleko ya kobuka blé, mpe fɛti ya koyanganisa mbuma* na nsuka ya mbula.+
23 “Mbala misato na mbula, mibali nyonso epai na yo bakomonana liboso ya Nkolo ya solo, Yehova, Nzambe ya Yisraele.+
24 Mpo nakobengana bikólo liboso na yo,+ mpe nakokómisa teritware na yo monene, mpe moto moko te akolula mokili na yo ntango okomata komona elongi ya Yehova Nzambe na yo mbala misato na mbula.
25 “Osengeli te kopesa makila ya mbeka na ngai elongo na eloko nyonso oyo etyami levire.+ Mpe mbeka ya fɛti ya Elekeli esengeli te kotikala butu mobimba tii na ntɔngɔ.+
26 “Mbuma oyo eleki malamu na mbuma ya liboso oyo eteli ya mabele na yo, okomema yango na ndako ya Yehova Nzambe na yo.+
“Osengeli te kotɔkisa mwana-ntaba na kati ya miliki ya mabɛlɛ ya mama na yango.”+
27 Yehova alobaki lisusu na Moize ete: “Komá maloba oyo,+ mpo ezali na boyokani na maloba oyo nde nazali kosala kondimana na yo mpe ná Yisraele.”+
28 Mpe atikalaki kuna elongo na Yehova mikolo 40 butu moi. Alyaki limpa te mpe amɛlaki mai te.+ Mpe akomaki na bitanda maloba ya kondimana yango, Mibeko Zomi.*+
29 Na nsima, Moize akitaki na Ngomba Sinai, mpe mabanga mibale ya Litatoli ezalaki na lobɔkɔ na ye.+ Ntango akitaki na ngomba, Moize ayebaki te ete loposo ya elongi na ye ezalaki kongɛngangɛnga mpo asololaki na Nzambe.
30 Ntango Arona mpe Bayisraele nyonso bamonaki Moize, bamonaki ete loposo ya elongi na ye ezalaki kongɛngangɛnga mpe babangaki kopusana pene na ye.+
31 Kasi Moize abengaki bango, na yango Arona ná bankumu ya liyangani bayaki epai na ye, mpe Moize asololaki na bango.
32 Nsima na yango, Bayisraele bapusanaki pene na ye mpe apesaki bango mitindo nyonso oyo Yehova apesaki ye na Ngomba Sinai.+
33 Ntango Moize azalaki kosilisa kosolola na bango, azalaki kotya litambala na elongi na ye.+
34 Kasi ntango Moize azalaki kokɔta liboso ya Yehova mpo na kosolola na ye, azalaki kolongola litambala yango tii ntango azalaki kobima.+ Bongo azalaki kobima mpe koyebisa Bayisraele mitindo oyo azwaki.+
35 Mpe Bayisraele bamonaki ete loposo ya elongi ya Moize ezalaki kongɛngangɛnga; na yango Moize azalaki kozongisa litambala na elongi na ye tii ntango azalaki kokɔta mpo na kosolola na Nzambe.*+
Maloba na nse
^ To, “bosembo.”
^ To, “motema boboto.”
^ Lil., “nkingo makasi.”
^ To, “ezalisamá.”
^ Talá Ndimbola ya maloba.”
^ To, “andimaka bombanda te.”
^ Lil., “oyo nkombo na ye ezali.”
^ Lil., “Eloko nyonso oyo efungoli libumu ezali.”
^ To, “okotosa sabata.”
^ Eyebani mpe lokola fɛti ya Bandako ya matiti (Batabernakle).
^ Lil., “Maloba Zomi.”
^ Lil., “ye.”
