Yobo 4:1-21
4 Bongo Elifaze+ Motemane ayanolaki boye:
2 “Soki moto alingi koloba na yo, okolɛmba koyoka ye?
Mpo nani akoki kopekisa maloba?
3 Ya solo, osembolá bato mingi,Mpe ozalaki kolendisa mabɔkɔ oyo elɛmbaki.
4 Maloba na yo ezalaki kotɛlɛmisa moto nyonso oyo azalaki kobɛta libaku,Mpe ozalaki kokembisa bato oyo mabɔlɔngɔ na bango ezalaki kogumbama.
5 Kasi sikoyo ekómeli yo, mpe osili mayele;*Ezwi yo, mpe obulungani.
6 Kobanga oyo obangaka Nzambe, ekotinda yo otyela ye motema te?
Bosembo na yo epai ya Nzambe,+ ekopesa yo elikya te?
7 Nabondeli yo, kanisá naino: Nani oyo akufá mobesu kaka mpamba boye?
Ntango nini bato ya sembo babebisamá?
8 Oyo namoná ezali ete baoyo balonaka makambo ya mabeMpe baoyo balonaka mpasi babukaka yango.
9 Na mpema oyo euti epai ya Nzambe bazali kokufa,Mpe na nkanda makasi na ye bazali kosila.
10 Nkɔsi engulumaka, mpe mongongo ya mwana ya nkɔsi eyokanaka,Kasi ata mino ya bana-nkɔsi ya makasi* ebukani.
11 Nkɔsi ekufaka mpo nyama ya kolya ezali te,Mpe bana ya nkɔsi epalangani.
12 Bayelaki ngai liloba moko na kobombana,Mpe mwa nungunungu na yango ekómaki na litoi na ngai.
13 Na makanisi oyo ebulunganisaka, oyo euti na bimonaneli ya butu,Ntango mpɔngi makasi ekwelaka bato,
14 Kolɛnga makasi ekangaki ngai,Mpe etondisaki mikuwa na ngai nyonso na nsɔmɔ.
15 Elimo moko elekaki likoló ya elongi na ngai;Nsuki ya nzoto na ngai etɛlɛmaki.
16 Mpe elimo yango ezalaki kaka ya kotɛlɛma,Kasi nayebaki lolenge ya elongi na yango te.
Elilingi moko boye ezalaki liboso ya miso na ngai;Kimya ezalaki, kasi na nsima nayokaki mongongo moko elobi ete:
17 ‘Moto, mowei mpamba, akoki nde kozala sembo* koleka Nzambe?
Moto akoki nde kozala pɛto koleka Moto oyo asalá ye?’
18 Talá! andimelaka basaleli na ye te,Mpe amonaka mbeba epai ya baanzelu na ye.*
19 Bongo ekozala boni mpo na baoyo bafandaka na bandako ya mabele,*Oyo moboko ezali na kati ya putulu,+Oyo banyataka na pɛtɛɛ nyonso lokola ndɔngɛ!
20 Bazali kobukabuka bango mpenza kobanda ntɔngɔ tii mpokwa;Bakufi libela mpe moto moko te atye likebi.
21 Bazali te lokola hema oyo balongoli nsinga na yango?
Bakufaka kozanga bwanya.
Maloba na nse
^ Lil., “olɛmbi mpenza.”
^ To, “oyo nkingo etondi na nsuki.”
^ To, “moyengebene.” Talá Ndimbola ya maloba.
^ To, “bamemi-nsango na ye.”
^ To, “mabele ya lima.”
