“Maladi ya makanisi ekómi mingi epai ya bilenge​—mpe emonani ete ba-réseaux sociaux ezali moko ya makambo oyo ezali kobebisa makanisi ya bana mingi.”​—Dr. Vivek Murthy, U.S. surgeon general, New York Times, 17/06/2024.

 Ndenge nini baboti bakoki kobatela bana na bango na makama ya ba-réseaux sociaux? Biblia epesi batoli oyo ekoki kosalisa baboti.

 Bótalela batoli oyo ya Biblia.

 “Moto ya ekɛngɛ akanisaka liboso ya kosala likambo.”​—Masese 14:15.

 Lokola basite yango etondi na makama mingi, osengeli kotalela malamumalamu soki mwana na yo asengeli kosalela yango to te. Liboso ya kopesa mwana na yo nzela asalela basite yango, mindimisá ete azali na makoki ya kokanisa oyo ekosalisa ye ayeba kotya ntango, apona baninga ya malamu, mpe atalaka makambo oyo ebongi.

 “Bósalela ntango na bino malamu mpenza.”​—Baefese 5:16.

 Soki opesi mwana na yo nzela asalelaka ba-réseaux sociaux, tyelá ye mibeko mpo na ndenge ya kosalela yango, mpe monisá ye ndenge mibeko yango ekobatela ye. Landeláká mwana na yo; soki omoni ete eloko moko ebongwani na bizaleli na ye oyo esɛngi ete asalelaka lisusu basite yango mingi te, salisá ye asala yango.

 Biblia elobi ete tozali kobika na “ntango moko ya mpasi mpenza mpe ya mikakatano.” (2 Timote 3:1-5) Kasi, epesi biso mpe batoli ya malamu oyo ekoki kosalisa biso na bantango yango ya mpasi. Masolo koleka 20 oyo eyokani na Biblia mpe oyo etali bana ná baboti ezali na lisolo lokola oyo elobeli maladi ya makanisi epai ya bilenge.