Mokolo ya mitano 24/02/2023, ezali mokolo oyo likambo moko ya nsɔmɔ ebandaki na Ukraine eleki sikoyo mbula moko: Etumba ya Ukraine. Balapolo emonisi ete basoda ya Ukraine mpe ya Russie soki 300 000 bakufi to bazoki makasi, mpe balobi ete bana-mboka soki 30 000 bakufi na etumba yango. Kasi, motángo yango mobimba ekoki kozala mingi koleka.

 Likambo ya mawa, emonani lokola nsuka ya etumba yango eyebani naino te.

•   “Kobanda Russie ekómi kobundisa Ukraine esali sikoyo mbula pene na moko, kasi emonani polele ete elembo ata moko te ezali komonisa ete kondongwana yango ekosila. Ezali komonana polele ete ata ngambo moko te ekoki kolonga moninga, mpe ezali komonana lokola elikya ezali te ete bamboka yango mibale ekoyokana.” (NPR [National Public Radio], 19/02/2023.)

 Bato mingi bazali kotungisama mpo na mpasi mpe minyoko oyo bitumba ya Ukraine mpe bitumba mosusu na mokili mobimba ezali kobimisela bato oyo basali eloko te. Elikya nini Biblia epesi? Mokolo mosusu bitumba ekosila?

 Biblia elobeli etumba moko oyo ekobikisa bato, kasi ekoboma bango te. Etumba yango ebengami Armagedone, mpe ezali “etumba ya mokolo monene ya Nzambe Mozwi-ya-Nguya-Nyonso.” (Emoniseli 16:14, 16) Na nzela ya etumba yango Nzambe akotya nsuka na boyangeli ya bato, oyo ebomisi bato mingi na bitumba. Mpo na koyeba ndenge oyo etumba ya Armagedone ekotya kimya ya seko, tángá masolo oyo elandi:

•   “Etumba ya Armagedone ezali nini?”

•   “Armagedone ezali mpenza nsango malamu!”