Lelo oyo, Batatoli ya Yehova bazali kozwa bilei ya elimo na nzela ya baaparɛyi koleka ndenge ezalaki liboso. Kasi na bisika mingi na mokili, bandeko na biso mingi bazali te na likoki ya kosalela Internet. Basusu bafandaka bisika oyo kura ezalaka te, Internet esalaka malɛmbɛ, to mpe Internet ezalaka te.

 Ata bongo, bandeko na biso mingi na mokili mobimba bakoki sikoyo kozwa mikanda na nzela ya baaparɛyi kozanga ete básalela Internet! Na ndenge nini?

 JW Box ezali mwa aparɛyi oyo bapesaka masangá epai Internet esalaka malamu te. Ezali aparɛyi oyo basombaka epai ya bakomelesa, Departema ya Informatique ebakisaka makambo mosusu na kati mpe etyaka mikanda mpe bavideo oyo ezalaka na jw.org. Mwa aparɛyi yango ezali na motuya ya dolare 75.

 Na Ndako ya Bokonzi, bandeko basalelaka wifi ya baaparɛyi na bango mpo na kozwa mikanda mpe bavideo oyo ezali na JW Box. Ata baoyo basalelaka baaparɛyi ya kala to oyo ezali na motuya mingi te bakoki kozwa mikanda mpe bavideo. Kasi soki lisangá ezali epai oyo Internet ezalaka te, ndenge nini bakoki kotya mikanda mpe bavideo ya sika na JW Box? Filiale etindaka mbala na mbala flash disque (USB), oyo ezalaka na motuya ya dolare 4, oyo ezali na mikanda mpe bavideo ya sika ya jw.org mpe bakɔtisaka yango na JW Box.

 Ndenge nini JW Box esalisi bandeko na biso? Nathan Adruandra, tata moko oyo afandaka na République démocratique du Congo, alobi boye: “Nazalaki komeka kozwa video ‘Ee Yehova, . . . natyeli yo motema’ mpe Kanisá mwasi ya Lota. Kasi nazwaki bavideo yango te mpe yango elɛmbisaki ngai. Sikoyo nakoki kozwa bavideo yango na aparɛyi na ngai mpe yango esalisaka biso baboti tóteya bana na biso.”

 Na Nigeria, ndeko moko oyo asalisaka masangá mpo na kotya JW Box alobi boye: “Bandeko bamonaka JW Box lokola likabo oyo euti epai ya Yehova. Bazali na esengo ndenge bakoki sikoyo na pɛtɛɛ nyonso kozwa mikanda mpe bavideo oyo ezali na bisaleli na biso mpo na koteya.”

 Baaparɛyi yango koleka 1 700 esili kokabolama na Afrika, na Oseania, mpe na Amerika ya Sudi, mpe bazali kokana kotinda yango na masangá mingi. Mbongo ya kosomba baaparɛyi yango eutaka wapi? Eutaka na makabo oyo bato bapesaka mpo na kosimba mosala ya kosakola na mokili mobimba, bato mingi bapesaka makabo yango na nzela ya donate.ps8318.com. Matɔndi mingi mpo na bokabi mpe lisungi na bino.