Na mokolo ya 19/04/2020, Biblia​—Libongoli ya Mokili ya Sika oyo babongisi lisusu ebimaki na monɔkɔ ya Roumain na liyangani ya sipesiale oyo esalemaki na Buccarest, na Roumanie. Ndeko Jon Brenca, oyo azali na Komite ya filiale ya Roumanie, alakisaki Biblia yango, mpe bandeko nyonso ya masangá oyo elobaka monɔkɔ ya Roumain na Roumanie mpe na Moldavie balandaki programɛ yango mbala moko na video. Programɛ yango mpe ebongolamaki na monɔkɔ ya Hongrois, Romani (oyo ya Roumanie), mpe na elobeli ya bikela ya Roumanie. Bato koleka 69 000 balandaki programɛ yango.

Biblia yango ebongolamaki na boumeli ya mbula koleka misato, mpe baekipi mibale ya babongoli nde esalaki mosala yango. Biblia yango oyo babongisi lisusu esaleli elobeli ya polele, ndenge bato balobaka mpenza, mpe ebimisi ndimbola ya sikisiki ya makomi ya Biblia ya ebandeli. Mobongoli moko alobi boye: “Lokola Biblia​—Libongoli ya Mokili ya Sika ekomami na elobeli ya mikolo oyo, kotánga yango ezali mpasi te. . . . Na ndenge yango, nsango ya Biblia ekoki kosimba motema ya moto oyo azali kotánga yango.”

Mobongoli mosusu alobi boye: “Lokola Biblia oyo esaleli elobeli ya polele mpenza, moto nyonso akoki koyekola yango, ezala elenge to mokóló. Na ntembe te, ekosalisa bato nyonso ya mitema sembo bápusana penepene na Yehova. Ezali buku ya bomoi na elobeli ya mikolo oyo.”

Biblia​—Libongoli ya Mokili ya Sika ebongolami mobimba to ndambo na minɔkɔ 186, mpe na kati na yango minɔkɔ 31 ebongisi lisusu malamu Biblia yango mobimba na kolanda Biblia ya Anglais oyo ebimaki na 2013. Batatoli ya Yehova koleka 65 000 oyo balobaka monɔkɔ ya Roumain na mokili mobimba, bakozwa bolamu mingi na Biblia oyo babongisi lisusu.

Yango ezali likambo ya esengo oyo endimisi ete Yehova azali kopambola bato oyo bazali kolinga ye mpe kosalela ye na bomoko.​—Masese 10:22.