Kanisá ete ozali Motatoli ya Yehova mpe motuka ya bapolisi ememi yo ntango ozali kosakola ndako na ndako! Yango nde likambo ndeko Joseph na Micronésie akutanaki na yango na 2017. Ye ná Batatoli ya Yehova mosusu misato bapesaki mabɔkɔ na kampanye moko sipesiale ya kosakwela bato oyo bafandaka na bisanga ya mosika.

 Batatoli ya Yehova yango minei bakómaki na mwa esanga moko ya bato soki 600, na ngonga soki ya midi. Guvɛrnɛrɛ ya mwa esanga yango nde ayambaki bango na mbote. Joseph alobi oyo esalemaki na nsima: “Guvɛrnɛrɛ ayebisaki bapolisi bámema biso na motuka na bango na bandako nyonso. Tokamwaki mpe na limemya nyonso toboyaki motuka ya bapolisi emema biso mpo tolingaki ete tókɔta ndako na ndako ndenge tomesaná kosala.”

 Na nsima basakoli yango batambolaki na makolo, bazalaki na ekateli ya kosolola na bato mingi. Bandeko yango balobi boye: “Bato ya esanga yango bayambaki biso malamu mpe basepelaki na nsango na biso. Yango wana tolekisaki ngonga mingi na ndako mokomoko koleka ndenge tokanisaki.”

 Na mpokwa, motuka ya bapolisi elekaki Joseph mbala mibale mobimba mpe na nsima na mbala ya misato, motuka yango etɛlɛmaki. Bapolisi batunaki Joseph soki bakoki komema ye na bandako oyo akɔti naino te. Joseph alobi: “Nayebisaki bango, mwaye ezali te. Kasi na mbala oyo batingamaki mpe balobaki na ngai ‘ntango etikali moke, tokomema yo na bandako oyo etikali.’ Mwaye ya koboya ezalaki lisusu te mpo bandako oyo etikalaki ezalaki mwa mingi. Liboso tókóma na ndako mokomoko, bapolisi bazalaki koyebisa ngai nkombo ya bato ya libota yango mpe balobaki ete soki nabɛti porte mpe moto te ayei kofungola, bakobɛta piololo na bango mpo na koyebisa nkolo-ndako ete bapaya bazali libanda.”

 “Lisungi na bango esalisaki biso tókɔta na bandako nyonso mokolo wana. Tokabolaki ebele ya mikanda mpe tozwaki bibongiseli mpo na kozongela baoyo basepelaki mpenza na nsango malamu.”

 Bapolisi bayebisaki Joseph ete “basepelaki mpenza kopalanganisa nsango malamu.” Ntango Batatoli ya Yehova balongwaki na esanga yango na mpokwa, bapolisi na libongo bapepaki bango mbote ya nsuka na mwa kosɛka mpe basimbaki na mabɔkɔ mikanda oyo bandeko yango bapesaki bango.