ບົດທີ 52

ເປັນຫຍັງການເລືອກເຄື່ອງນຸ່ງແລະການແຕ່ງໂຕຈຶ່ງເປັນເລື່ອງສຳຄັນ?

ເປີດ

ເມື່ອເວົ້າເຖິງການເລືອກເຄື່ອງນຸ່ງແລະການແຕ່ງໂຕ ເຮົາແຕ່ລະຄົນມັກບໍ່ຄືກັນ. ແຕ່ຖ້າເຮົາເຮັດຕາມຫຼັກການໃນຄຳພີໄບເບິນ ເຮົາກໍຈະສາມາດເລືອກເຄື່ອງນຸ່ງແລະແຕ່ງໂຕໃນແບບທີ່ເຮົາມັກໄດ້ແລະຍັງເຮັດໃຫ້ພະເຢໂຫວາພໍໃຈນຳ. ໃຫ້ເຮົາມາເບິ່ງຫຼັກການເຫຼົ່ານີ້ນຳກັນ.

1. ມີຫຼັກການຫຍັງແດ່ທີ່ຈະຊ່ວຍເຮົາໄດ້ກ່ຽວກັບການເລືອກເຄື່ອງນຸ່ງແລະການແຕ່ງໂຕ?

ເພື່ອຄົນອື່ນຈະເຫັນວ່າເຮົາ “ນັບຖືພະເຈົ້າ” ເຄື່ອງນຸ່ງແລະການແຕ່ງໂຕຂອງເຮົາຄວນສະອາດຢູ່ສະເໝີແລະເຮົາຄວນ “ແຕ່ງໂຕໃຫ້ເໝາະສົມ ເປັນແບບສຸພາບຮຽບຮ້ອຍແລະແບບຄົນທີ່ມີສະຕິດີ.” (1 ຕີໂມທຽວ 2:9, 10) ມາເບິ່ງຫຼັກການ 4 ຢ່າງກ່ຽວກັບເລື່ອງນີ້ນຳກັນ: (1) ແຕ່ງໂຕໃຫ້ “ເໝາະສົມ.” ເຈົ້າຄືຊິເຫັນແລ້ວວ່າພະຍານພະເຢໂຫວາກໍແຕ່ງໂຕຫຼາກຫຼາຍຕອນໄປປະຊຸມ ແຕ່ເຖິງຈະເປັນແນວນັ້ນ ເຄື່ອງນຸ່ງແລະຊົງຜົມຂອງເຂົາເຈົ້າກໍໃຫ້ກຽດພະເຈົ້າສະເໝີ. (2) ແຕ່ງໂຕໃຫ້ “ສຸພາບຮຽບຮ້ອຍ” ນີ້ໝາຍຄວາມວ່າເຮົາຈະບໍ່ແຕ່ງໂຕໃນແບບທີ່ຍົວະເຍົ້າແລະເຮັດໃຫ້ຄົນອື່ນເກີດຄວາມຮູ້ສຶກທາງເພດ ຫຼືເຮັດໃຫ້ຄົນອື່ນສົນໃຈໂຕເຮົາຫຼາຍເກີນໄປ. (3) ເຮົາເຮັດໃຫ້ເຫັນວ່າເຮົາ “ມີສະຕິດີ” ໂດຍບໍ່ມົວແຕ່ຕິດຕາມແຟຊັ້ນທີ່ອອກມາໃໝ່ໆແລະແຕ່ງໂຕຕາມນັ້ນຢູ່ຕະຫຼອດ. ແລະ (4) ການແຕ່ງໂຕຂອງເຮົາຄວນເຮັດໃຫ້ຄົນອື່ນເຫັນສະເໝີວ່າເຮົາ “ນັບຖືພະເຈົ້າ.”—1 ໂກຣິນໂທ 10:31

2. ເຄື່ອງນຸ່ງແລະການແຕ່ງໂຕຂອງເຮົາອາດມີຜົນຕໍ່ພີ່ນ້ອງຄລິດສະຕຽນຄົນອື່ນແນວໃດ?

ເຮົາມີອິດສະຫຼະທີ່ຈະເລືອກໄດ້ວ່າເຮົາຈະໃສ່ເຄື່ອງນຸ່ງແບບໃດແລະຈະແຕ່ງໂຕແນວໃດ ແຕ່ເຮົາກໍຕ້ອງຄິດນຳວ່າຄົນອື່ນຈະຮູ້ສຶກແນວໃດກັບການແຕ່ງໂຕຂອງເຮົາ. ເຮົາບໍ່ຢາກເຮັດໃຫ້ຄົນອື່ນຮູ້ສຶກບໍ່ສະບາຍໃຈ ແຕ່ເຮົາຢາກຈະ “ເຮັດສິ່ງທີ່ຄົນອື່ນພໍໃຈເພື່ອປະໂຫຍດຂອງລາວ ແລະເພື່ອຊ່ວຍລາວໃຫ້ເຂັ້ມແຂງຂຶ້ນ.”—ອ່ານໂຣມ 15:1, 2

3. ການແຕ່ງໂຕແບບໃດທີ່ອາດເຮັດໃຫ້ຄົນອື່ນຢາກຮຽນຮູ້ກ່ຽວກັບພະເຢໂຫວາຫຼາຍຂຶ້ນ?

ບໍ່ວ່າເຮົາຈະຢູ່ໃສຫຼືເຮັດຫຍັງ ເຮົາຈະແຕ່ງໂຕໃນແບບທີ່ເໝາະສົມຢູ່ສະເໝີ ແຕ່ເຮົາຈະໃສ່ໃຈການແຕ່ງໂຕຂອງເຮົາເປັນພິເສດເມື່ອເຮົາໄປປະຊຸມຫຼືໄປປະກາດ. ເຮົາບໍ່ຢາກໃຫ້ຄົນອື່ນສົນໃຈການແຕ່ງໂຕຂອງເຮົາຫຼາຍກວ່າສົນໃຈຂ່າວດີທີ່ເຮົາປະກາດ. ດັ່ງນັ້ນ ຖ້າເຮົາແຕ່ງໂຕຮຽບຮ້ອຍແລະເໝາະສົມ ເຮົາກໍຈະເຮັດໃຫ້ຄົນອື່ນຢາກຮຽນຮູ້ກ່ຽວກັບພະເຢໂຫວາຫຼາຍຂຶ້ນແລະຈະ “ເຮັດໃຫ້ຄຳສອນຂອງພະເຈົ້າຜູ້ຊ່ວຍໃຫ້ລອດຂອງພວກເຮົາງົດງາມຂຶ້ນ.”—ຕີໂຕ 2:10

ຮຽນຮູ້ຫຼາຍຂຶ້ນ

ເຮົາຈະແຕ່ງໂຕແນວໃດໃຫ້ເໝາະສົມກັບການເປັນຄລິດສະຕຽນ.

ການແຕ່ງໂຕຂອງເຮົາສະແດງໃຫ້ເຫັນວ່າເຮົາໃຫ້ກຽດຄົນທີ່ມີອຳນາດ. ເຖິງວ່າພະເຢໂຫວາຈະແນມເຫັນສິ່ງທີ່ຢູ່ໃນຫົວໃຈຂອງເຮົາ ແຕ່ການແຕ່ງໂຕຂອງເຮົາກໍຄວນສະແດງໃຫ້ເຫັນວ່າເຮົາໃຫ້ກຽດເພິ່ນ

4. ຖ້າເຮົາແຕ່ງໂຕຮຽບຮ້ອຍແລະເໝາະສົມເຮົາກໍໃຫ້ກຽດພະເຢໂຫວາ

ມາເບິ່ງເຫດຜົນສຳຄັນທີ່ສຸດທີ່ເຮົາໃສ່ໃຈເຄື່ອງນຸ່ງແລະການແຕ່ງໂຕຂອງເຮົາ? ອ່ານພະນິມິດ 4:11 ແລ້ວລົມກັນກ່ຽວກັບຄຳຖາມຕໍ່ໄປນີ້:

ການແຕ່ງໂຕຂອງເຮົາມີຜົນຕໍ່ຊື່ສຽງຂອງພະເຢໂຫວາ ຖ້າເປັນແນວນັ້ນເຮົາຄວນເລືອກເຄື່ອງນຸ່ງແລະການແຕ່ງໂຕແບບໃດ?
ເມື່ອໄປປະຊຸມຫຼືໄປປະກາດ ເຈົ້າຄິດວ່າສຳຄັນບໍທີ່ເຮົາຕ້ອງໃສ່ໃຈເລື່ອງເຄື່ອງນຸ່ງແລະການແຕ່ງໂຕຂອງເຮົາ? ຍ້ອນຫຍັງເຈົ້າຈຶ່ງຄິດແບບນັ້ນ?

5. ອັນໃດຈະຊ່ວຍໃຫ້ເຮົາຕັດສິນໃຈໄດ້ດີໃນເລື່ອງເຄື່ອງນຸ່ງແລະການແຕ່ງໂຕ?

ເປີດວິດີໂອ.

ວິດີໂອ: “ໃຫ້ພວກເຈົ້າເຮັດທຸກສິ່ງໃນແບບທີ່ເຮັດໃຫ້ພະເຈົ້າໄດ້ຮັບການຍ້ອງຍໍສັນລະເສີນ” (10:18)

ເຄື່ອງນຸ່ງຂອງເຮົາບໍ່ຈຳເປັນຕ້ອງລາຄາແພງ ແຕ່ທີ່ສຳຄັນຄື ເຄື່ອງນຸ່ງຂອງເຮົາຈະຕ້ອງສະອາດແລະເໝາະສົມ. ອ່ານ 1 ໂກຣິນໂທ 10:24 ແລະ 1 ຕີໂມທຽວ 2:9, 10. ແລ້ວລົມກັນວ່າເປັນຫຍັງເຮົາຈຶ່ງບໍ່ຄວນໃສ່ເຄື່ອງນຸ່ງທີ່ . . .

ບໍ່ສະອາດຫຼືບໍ່ເໝາະສົມ.
ຮັດໆ ໂຊຊັດສ່ວນ ເປືອຍ ຫຼືຍົວະເຍົ້າ.

ເຖິງວ່າຄລິດສະຕຽນບໍ່ຕ້ອງເຮັດຕາມກົດໝາຍຂອງໂມເຊແລ້ວ ແຕ່ກົດໝາຍນັ້ນກໍຊ່ວຍໃຫ້ເຮົາຮູ້ວ່າພະເຢໂຫວາຄິດແນວໃດກັບເລື່ອງຕ່າງໆ. ອ່ານພະບັນຍັດ 22:5 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງເຮົາບໍ່ຄວນແຕ່ງໂຕຫຼືໃສ່ເຄື່ອງນຸ່ງໃນແບບທີ່ເຮັດໃຫ້ຜູ້ຊາຍເບິ່ງຄືຜູ້ຍິງແລະເຮັດໃຫ້ຜູ້ຍິງເບິ່ງຄືຜູ້ຊາຍ?

ອ່ານ 1 ໂກຣິນໂທ 10:32, 33 ແລະ 1 ໂຢຮັນ 2:15, 16 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງເຮົາຈຶ່ງບໍ່ຢາກເຮັດໃຫ້ຄົນອື່ນຫຼືພີ່ນ້ອງໃນປະຊາຄົມຮູ້ສຶກບໍ່ສະບາຍໃຈກັບການແຕ່ງໂຕຂອງເຮົາ?
ໃນປະເທດທີ່ເຮົາຢູ່ ຄົນທົ່ວໄປແຕ່ງໂຕແບບໃດແດ່?
ແລ້ວເຈົ້າຄິດວ່າການແຕ່ງໂຕແບບໃດທີ່ບໍ່ເໝາະກັບຄລິດສະຕຽນ? ຍ້ອນຫຍັງເຈົ້າຈຶ່ງຄິດແບບນັ້ນ?

ເຮົາສາມາດໃສ່ເຄື່ອງນຸ່ງແລະແຕ່ງໂຕໄດ້ຫຼາກຫຼາຍແລະເຮັດໃຫ້ພະເຢໂຫວາພໍໃຈນຳ