ພະເຢໂຫວາຊີ້ນຳປະຊາຊົນຂອງພະອົງໄປໃນທາງສູ່ຊີວິດ
“ອັນນີ້ທາງແມ່ນ. ຈົ່ງທຽວທາງນີ້ເຖີ້ນ.”—ເອຊາອີ 30:21
ເພງ: 65, 48
1, 2. (ກ) ຄຳເຕືອນອັນໃດທີ່ຊ່ວຍປົກປ້ອງຊີວິດຂອງຫຼາຍຄົນ? (ເບິ່ງຮູບທຳອິດ) (ຂ) ປະຊາຊົນຂອງພະເຈົ້າມີຄຳເຕືອນຫຍັງທີ່ສາມາດປົກປ້ອງຊີວິດຂອງເຂົາເຈົ້າໄດ້?
“ຢຸດ ເບິ່ງ ຟັງ.” ເປັນເວລາຫຼາຍກວ່າ 100 ປີທີ່ຄຳເຫຼົ່ານີ້ປາກົດໃນປ້າຍໃຫຍ່ຢູ່ທາງຂ້າມລາງລົດໄຟໃນທະວີບອາເມລິກາເໜືອ. ຍ້ອນຫຍັງຈຶ່ງມີຄຳເຫຼົ່ານີ້? ກໍເພື່ອລົດໃຫຍ່ທີ່ຂ້າມລາງລົດໄຟຈະບໍ່ຖືກລົດໄຟຄວາມໄວສູງຕຳ. ການໃສ່ໃຈຕໍ່ປ້າຍຄຳເຕືອນເຫຼົ່ານີ້ຊ່ວຍປົກປ້ອງຊີວິດຂອງຫຼາຍຄົນໄວ້ໄດ້.
2 ພະເຢໂຫວາເຮັດບາງສິ່ງທີ່ດີກວ່າການໃຫ້ປ້າຍເຕືອນເລື່ອງຄວາມປອດໄພແກ່ເຮົາ. ພະອົງຊີ້ນຳປະຊາຊົນຂອງພະອົງເພື່ອເຂົາເຈົ້າຈະໄດ້ຮັບຊີວິດຕະຫຼອດໄປແລະຢູ່ຫ່າງໄກຈາກອັນຕະລາຍຕ່າງໆ. ພະເຢໂຫວາເປັນຄືກັບຜູ້ລ້ຽງແກະທີ່ມີຄວາມຮັກເຊິ່ງຊີ້ນຳແລະເຕືອນປະຊາຊົນຂອງພະອົງເພື່ອເຂົາເຈົ້າສາມາດຫຼີກລ່ຽງອັນຕະລາຍໄດ້.—ອ່ານເອຊາອີ 30:20, 21
ພະເຢໂຫວາຊີ້ນຳປະຊາຊົນຂອງພະອົງສະເໝີ
3. ຄອບຄົວມະນຸດຕົກເຂົ້າສູ່ຄວາມຕາຍໄດ້ແນວໃດ?
3 ຕັ້ງແຕ່ຕອນເລີ່ມຕົ້ນໃນປະຫວັດສາດຂອງມະນຸດ ພະເຢໂຫວາໄດ້ໃຫ້ຄຳແນະນຳຫຼືການຊີ້ນຳທີ່ເຈາະຈົງແກ່ປະຊາຊົນຂອງພະອົງ. ຕົວຢ່າງເຊັ່ນ: ໃນສວນເອເດນ ພະເຢໂຫວາໄດ້ໃຫ້ຄຳແນະນຳທີ່ຈະແຈ້ງເຊິ່ງຈະຊີ້ນຳຄອບຄົວມະນຸດໃຫ້ມີຊີວິດຕະຫຼອດໄປແລະມີຄວາມສຸກ. (ຕົ້ນເດີມ 2:15-17) ແຕ່ອາດາມແລະເອວາບໍ່ຍອມຮັບການຊີ້ນຳຈາກພໍ່ທີ່ຮັກເຂົາເຈົ້າ. ເອວາໄດ້ຟັງຄຳແນະນຳທີ່ເບິ່ງຄືວ່າມາຈາກງູ ແລະຈາກນັ້ນອາດາມກໍຟັງຄວາມເມຍຂອງລາວ. ແລ້ວຜົນເປັນແນວໃດ? ທັງສອງຄົນໄດ້ຮັບຄວາມເສຍຫາຍ ແລະເຂົາເຈົ້າກໍຕາຍໂດຍທີ່ບໍ່ມີຄວາມຫວັງໃດໆເລີຍ. ນອກຈາກນັ້ນ ຍ້ອນການບໍ່ເຊື່ອຟັງຂອງທັງສອງ ຄອບຄົວທັງໝົດຂອງມະນຸດຈຶ່ງຕົກເຂົ້າສູ່ຄວາມຕາຍ.
4. (ກ) ຫຼັງຈາກນໍ້າຖ້ວມໂລກ ເປັນຫຍັງຈຶ່ງຕ້ອງມີການຊີ້ນຳເພີ່ມເຕີມ? (ຂ) ສະພາບການໃໝ່ເປີດເຜີຍໃຫ້ເຫັນຄວາມຄິດຂອງພະເຈົ້າຄືແນວໃດ?
4 ພະເຢໂຫວາໄດ້ໃຫ້ການຊີ້ນຳຕ່າງໆແກ່ໂນເອເພື່ອຈະປົກປ້ອງຊີວິດໃຫ້ລອດ. ຫຼັງຈາກນໍ້າຖ້ວມໂລກ ພະເຢໂຫວາໄດ້ສັ່ງບໍ່ໃຫ້ຜູ້ຄົນກິນຫຼືດື່ມເລືອດ. ຍ້ອນຫຍັງ? ກໍຍ້ອນວ່າຕອນນີ້ພະເຢໂຫວາຈະຍອມໃຫ້ມະນຸດກິນຊີ້ນໄດ້. ເນື່ອງຈາກຢູ່ໃນສະພາບການໃໝ່ ເຂົາເຈົ້າຈຶ່ງຕ້ອງມີການຊີ້ນຳໃໝ່ຄືວ່າ: “ຊີ້ນນັ້ນ ທ່ານທັງຫຼາຍຢ່າຊູ່ກິນກັບຊີວິດຂອງມັນ ຄືວ່າເລືອດ.” (ຕົ້ນເດີມ 9:1-4) ຈາກຄຳສັ່ງຂໍ້ນີ້ເຮົາໄດ້ຮຽນຮູ້ວ່າພະເຢໂຫວາຄິດແນວໃດກ່ຽວກັບຊີວິດທີ່ພະອົງເປັນເຈົ້າຂອງ. ພະເຢໂຫວາເປັນຜູ້ສ້າງແລະພະອົງໃຫ້ເຮົາມີຊີວິດ ດັ່ງນັ້ນ ພະອົງຈຶ່ງມີສິດທີ່ຈະຕັ້ງກົດກ່ຽວກັບຊີວິດ. ຕົວຢ່າງເຊັ່ນ: ພະອົງສັ່ງມະນຸດບໍ່ໃຫ້ຂ້າກັນ. ພະເຢໂຫວາຖືວ່າຊີວິດແລະເລືອດເປັນສິ່ງທີ່ສັກສິດ ແລະພະອົງຈະລົງໂທດຜູ້ທີ່ໃຊ້ຊີວິດແລະເລືອດໃນທາງທີ່ຜິດ.—ຕົ້ນເດີມ 9:5, 6
5. ຕອນນີ້ເຮົາຈະພິຈາລະນາເລື່ອງໃດ ແລະຍ້ອນຫຍັງ?
5 ຫຼັງຈາກສະໄໝຂອງໂນເອ ພະເຢໂຫວາໄດ້ຊີ້ນຳປະຊາຊົນຂອງພະອົງຕໍ່ໆໄປ. ໃນບົດຄວາມນີ້ ເຮົາຈະເບິ່ງສອງສາມຕົວຢ່າງກ່ຽວກັບວິທີທີ່ພະອົງຊີ້ນຳເຂົາເຈົ້າ. ການທົບທວນສິ່ງເຫຼົ່ານີ້ຈະເສີມສ້າງການຕັດສິນໃຈຂອງເຮົາທີ່ຈະເຮັດຕາມການຊີ້ນຳຂອງພະເຢໂຫວາເພື່ອເຂົ້າໄປສູ່ໂລກໃໝ່.
ຊາດໃໝ່ ການຊີ້ນຳໃໝ່
6. ເປັນຫຍັງຈຶ່ງເປັນເລື່ອງຈຳເປັນທີ່ປະຊາຊົນຂອງພະເຈົ້າຈະເຊື່ອຟັງພະບັນຍັດທີ່ໃຫ້ຜ່ານທາງໂມເຊ ແລະເຂົາເຈົ້າຕ້ອງມີທັດສະນະແນວໃດ?
6 ໃນສະໄໝຂອງໂມເຊ ພະເຢໂຫວາໄດ້ໃຫ້ການຊີ້ນຳທີ່ຈະແຈ້ງແກ່ປະຊາຊົນຂອງພະອົງໃນເລື່ອງການປະຕິບັດແລະການນະມັດສະການ. ຍ້ອນຫຍັງ? ອີກເທື່ອໜຶ່ງ ກໍຍ້ອນວ່າສະພາບການຕ່າງໆໄດ້ປ່ຽນໄປ. ເປັນເວລາຫຼາຍກວ່າສອງຮ້ອຍປີ ຊາວອິດສະລາແອນໄດ້ເປັນທາດຢູ່ໃນປະເທດເອຢິບເຊິ່ງເຂົາເຈົ້າຢູ່ໃນທ່າມກາງຄົນທີ່ນະມັດສະການຄົນຕາຍ ໃຊ້ຮູບປັ້ນ ແລະເຮັດຫຼາຍສິ່ງທີ່ບໍ່ໄດ້ໃຫ້ກຽດພະເຈົ້າ. ເມື່ອປະຊາຊົນຂອງພະເຈົ້າພົ້ນຈາກການເປັນທາດໃນປະເທດເອຢິບ ເຂົາເຈົ້າຈຶ່ງຕ້ອງມີການຊີ້ນຳໃໝ່. ເຂົາເຈົ້າຈະກາຍເປັນຊາດໜຶ່ງທີ່ເຮັດຕາມພະບັນຍັດຂອງພະເຢໂຫວາເທົ່ານັ້ນ. ປຶ້ມອ້າງອີງບາງຫົວກ່າວເຖິງຄຳໃນພາສາເຫບເລີສຳລັບຄຳວ່າ “ພະບັນຍັດ” ແມ່ນມີຄວາມກ່ຽວຂ້ອງກັບຄຳທີ່ມີຄວາມໝາຍວ່າ “ຊີ້ນຳ ແນະນຳ ສັ່ງສອນ.” ພະບັນຍັດໄດ້ປົກປ້ອງຊາວອິດສະລາແອນຈາກການເຮັດຜິດສິນລະທຳທາງເພດ ແລະຈາກສາສະໜາທີ່ສອນບໍ່ຖືກຕ້ອງຂອງຊາດຕ່າງໆທີ່ຢູ່ອ້ອມຂ້າງເຂົາເຈົ້າ. ເມື່ອຊາວອິດສະລາແອນເຊື່ອຟັງພະເຈົ້າ ພະອົງກໍອວຍພອນໃຫ້ເຂົາເຈົ້າ ແຕ່ເມື່ອບໍ່ເຊື່ອຟັງພະອົງ ເຂົາເຈົ້າກໍໄດ້ຮັບຄວາມທຸກລຳບາກທີ່ຮ້າຍແຮງ.—ອ່ານພະບັນຍັດ 28:1, 2, 15
7. (ກ) ຂໍໃຫ້ອະທິບາຍວ່າເປັນຫຍັງພະເຢໂຫວາຈຶ່ງໃຫ້ການຊີ້ນຳແກ່ປະຊາຊົນຂອງພະອົງ. (ຂ) ພະບັນຍັດເປັນຜູ້ດູແລສຳລັບຊາວອິດສະລາແອນຄືແນວໃດ?
7 ຍັງມີເຫດຜົນອື່ນອີກທີ່ຕ້ອງມີການຊີ້ນຳໃໝ່. ພະບັນຍັດໄດ້ກຽມຊາວອິດສະລາແອນໄວ້ສຳລັບເຫດການທີ່ສຳຄັນໃນຈຸດປະສົງຂອງພະເຢໂຫວາ ນັ້ນຄືການມາຂອງພະເຍຊູຄລິດຜູ້ເປັນເມຊີ. ພະບັນຍັດເຕືອນຊາວອິດສະລາແອນໃຫ້ຮູ້ວ່າເຂົາເຈົ້າເປັນຄົນທີ່ບໍ່ສົມບູນແບບ. ພະບັນຍັດຍັງຊ່ວຍໃຫ້ເຂົາເຈົ້າເຂົ້າໃຈວ່າເຂົາເຈົ້າຈຳເປັນຕ້ອງມີຄ່າໄຖ່ ເຊິ່ງກໍຄືເຄື່ອງບູຊາທີ່ສົມບູນພ້ອມທີ່ຈະກຳຈັດບາບຂອງເຂົາເຈົ້າໃຫ້ໝົດສິ້ນໄປ. (ຄາລາຊີ 3:19; ເຫບເລີ 10:1-10) ນອກຈາກນັ້ນ ພະບັນຍັດຍັງປົກປ້ອງເຊື້ອສາຍຂອງເມຊີແລະຊ່ວຍຊາວອິດສະລາແອນໃຫ້ລະບຸຕົວເມຊີໄດ້ເມື່ອເພິ່ນມາປາກົດຕົວ. ແມ່ນແລ້ວ ພະບັນຍັດເປັນຄືກັບການຊີ້ນຳຊົ່ວຄາວ ຫຼືເປັນຄືກັບ “ຜູ້ດູແລ” ທີ່ພາໄປເຖິງພະຄລິດ.—ຄາລາຊີ 3:23, 24
8. ເປັນຫຍັງເຮົາຄວນໄດ້ຮັບການຊີ້ນຳຈາກຫຼັກການຕ່າງໆທີ່ຢູ່ໃນພະບັນຍັດທີ່ໃຫ້ຜ່ານທາງໂມເຊ?
8 ເນື່ອງຈາກເປັນຄລິດສະຕຽນ ເຮົາເອງກໍສາມາດໄດ້ຮັບປະໂຫຍດຈາກການຊີ້ນຳທີ່ພະເຢໂຫວາໃຫ້ໄວ້ຢູ່ໃນພະບັນຍັດ. ໃນທາງໃດ? ເຮົາສາມາດຢຸດແລະເບິ່ງທີ່ຫຼັກການຕ່າງໆເຊິ່ງເປັນພື້ນຖານຂອງພະບັນຍັດນັ້ນ. ເຖິງວ່າເຮົາບໍ່ໄດ້ຢູ່ພາຍໃຕ້ພະບັນຍັດເຫຼົ່ານັ້ນແລ້ວກໍຕາມ ແຕ່ເຮົາຍັງສາມາດອາໄສຫຼາຍສິ່ງທີ່ຢູ່ໃນພະບັນຍັດນັ້ນເພື່ອຊີ້ນຳຊີວິດປະຈຳວັນຂອງເຮົາແລະເພື່ອນະມັດສະການພະເຢໂຫວາ. ພະອົງໃຫ້ມີພະບັນຍັດເຫຼົ່ານັ້ນຂຽນໄວ້ໃນຄຳພີໄບເບິນກໍເພື່ອເຮົາຈະຮຽນຮູ້ຈາກພະບັນຍັດນັ້ນ ໄດ້ຮັບການຊີ້ນຳໂດຍທາງຫຼັກການຕ່າງໆໃນພະບັນຍັດນັ້ນ ແລະຮູ້ຄຸນຄ່າທີ່ພະເຍຊູໄດ້ສອນເຮົາບາງສິ່ງທີ່ໃຫຍ່ກວ່າພະບັນຍັດນັ້ນ. ເຮົາຟັງສິ່ງທີ່ພະເຍຊູກ່າວໄວ້ທີ່ວ່າ: “ທ່ານທັງຫຼາຍໄດ້ຍິນວ່າມີຄຳກ່າວໄວ້ວ່າ ‘ຢ່າຫຼິ້ນຊູ້ສູ່ຜົວເມຍທ່ານ.’ ແຕ່ວ່າຝ່າຍເຮົາ ເຮົາກ່າວແກ່ທ່ານທັງຫຼາຍວ່າ ຄົນທຸກຄົນທີ່ເບິ່ງຍິງຜູ້ໜຶ່ງດ້ວຍໃຈຄຶດຢາກໄດ້ໃນຍິງນັ້ນ ຜູ້ນັ້ນໄດ້ຫຼິ້ນຊູ້ສູ່ໃນໃຈເອງກັບຍິງນັ້ນແລ້ວໆ.” ດັ່ງນັ້ນ ເຮົາບໍ່ພຽງແຕ່ຫຼີກລ່ຽງການຫຼິ້ນຊູ້ເທົ່ານັ້ນ ແຕ່ເຮົາຕ້ອງປະຕິເສດຄວາມຄິດແລະຄວາມປາຖະໜາໃນເລື່ອງການເຮັດຜິດສິນລະທຳທາງເພດ.—ມັດທາຍ 5:27, 28
9. ສະພາບການໃໝ່ແບບໃດທີ່ຈຳເປັນຕ້ອງມີຄຳແນະນຳໃໝ່ຈາກພະເຈົ້າ?
9 ຫຼັງຈາກທີ່ພະເຍຊູມາໃນຖານະເປັນເມຊີ ພະເຢໂຫວາໄດ້ໃຫ້ຄຳແນະນຳໃໝ່ແລະເປີດເຜີຍລາຍລະອຽດເພີ່ມເຕີມກ່ຽວກັບຈຸດປະສົງຂອງພະອົງ. ຍ້ອນຫຍັງເລື່ອງນີ້ຈຶ່ງຈຳເປັນ? ກໍຍ້ອນວ່າໃນປີ ຄ.ສ. 33 ພະເຢໂຫວາໄດ້ປະຕິເສດຊາດອິດສະລາແອນແລະໄດ້ເລືອກປະຊາຄົມຄລິດສະຕຽນໃຫ້ເປັນປະຊາຊົນຂອງພະອົງ. ດັ່ງນັ້ນ ປະຊາຊົນຂອງພະເຈົ້າຈຶ່ງຢູ່ໃນສະພາບການໃໝ່ອີກຄັ້ງໜຶ່ງ.
ການຊີ້ນຳສຳລັບອິດສະລາແອນໂດຍໄນ
10. ເປັນຫຍັງຈຶ່ງມີການໃຫ້ພະບັນຍັດໃໝ່ແກ່ປະຊາຄົມຄລິດສະຕຽນ ແລະພະບັນຍັດເຫຼົ່ານີ້ແຕກຕ່າງແນວໃດຈາກພະບັນຍັດທີ່ໃຫ້ແກ່ຊາວອິດສະລາແອນ?
10 ພະເຢໂຫວາໄດ້ໃຫ້ພະບັນຍັດຂອງໂມເຊແກ່ຊາວອິດສະລາແອນເພື່ອສອນເຂົາເຈົ້າກ່ຽວກັບວິທີການໃຊ້ຊີວິດແລະນະມັດສະການພະອົງ. ໃນຕອນເລີ່ມຕົ້ນຂອງສະຕະວັດທຳອິດ ປະຊາຊົນຂອງພະເຈົ້າບໍ່ໄດ້ມາຈາກຊາດດຽວເທົ່ານັ້ນ ແຕ່ມາຈາກຫຼາຍໆຊາດແລະຫຼາຍໆພູມຫຼັງ ແລະເຂົາເຈົ້າຖືກເອີ້ນວ່າຊາດອິດສະລາແອນໂດຍໄນ. ເຂົາເຈົ້າໄດ້ຮັບການຈັດຕັ້ງໃຫ້ເປັນປະຊາຄົມຄລິດສະຕຽນແລະຢູ່ພາຍໃຕ້ຄຳສັນຍາໃໝ່. ພະເຢໂຫວາໄດ້ໃຫ້ຄຳແນະນຳໃໝ່ແກ່ເຂົາເຈົ້າຫຼືໄດ້ເຮັດໃຫ້ຄຳແນະນຳນັ້ນກວ້າງອອກໃນເລື່ອງວິທີດຳລົງຊີວິດແລະນະມັດສະການພະອົງ. ທີ່ຈິງ “ພະເຈົ້າບໍ່ເລືອກໜ້າຄົນ ແຕ່ວ່າໃນທຸກປະເທດຜູ້ໜຶ່ງຜູ້ໃດທີ່ຢ້ານຢຳພະເຈົ້າແລະກະທຳການຊອບທຳກໍເປັນທີ່ຊອບໃຈແກ່ພະອົງ.” (ກິດຈະການ 10:34, 35) ເຂົາເຈົ້າເຮັດຕາມ “ພະບັນຍັດຂອງພະຄລິດ” ເຊິ່ງອາໄສຫຼັກການຕ່າງໆທີ່ຖືກຂຽນໄວ້ຢູ່ໃນໃຈຂອງເຂົາເຈົ້າ ບໍ່ແມ່ນຢູ່ເທິງແຜ່ນຫີນ. ພະບັນຍັດນີ້ຈະຊີ້ນຳແລະເປັນປະໂຫຍດຕໍ່ຄລິດສະຕຽນບໍ່ວ່າເຂົາເຈົ້າຈະອາໄສຢູ່ບ່ອນໃດກໍຕາມ.—ຄາລາຊີ 6:2
11. ໃນຊີວິດຂອງຄລິດສະຕຽນມີສອງແງ່ມຸມອັນໃດແດ່ເຊິ່ງໄດ້ຮັບຜົນກະທົບຈາກ “ພະບັນຍັດຂອງພະຄລິດ”?
11 ອິດສະລາແອນໂດຍໄນໄດ້ຮັບປະໂຫຍດຫຼາຍແທ້ໆຈາກການຊີ້ນຳຂອງພະເຢໂຫວາທີ່ໃຫ້ຜ່ານທາງພະເຍຊູ. ບໍ່ດົນກ່ອນທີ່ພະເຍຊູໃຫ້ຄຳສັນຍາໃໝ່ ພະອົງໄດ້ໃຫ້ຄຳສັ່ງ 2 ຂໍ້ທີ່ສຳຄັນຫຼາຍ. ຂໍ້ທຳອິດແມ່ນກ່ຽວກັບວຽກການປະກາດ ແລະຂໍ້ທີສອງແມ່ນກ່ຽວກັບວິທີທີ່ຄລິດສະຕຽນຄວນປະພຶດແລະປະຕິບັດຕໍ່ກັນ. ຄຳສັ່ງເຫຼົ່ານີ້ແມ່ນສຳລັບຄລິດສະຕຽນທຸກຄົນ ດັ່ງນັ້ນ ຄຳສັ່ງເຫຼົ່ານີ້ຈຶ່ງໃຊ້ໄດ້ກັບພວກເຮົາທຸກຄົນໃນທຸກມື້ນີ້ ທັງຜູ້ທີ່ມີຄວາມຫວັງທີ່ຈະມີຊີວິດຕະຫຼອດໄປໃນສະຫວັນຫຼືຢູ່ທີ່ໂລກນີ້.
12. ສິ່ງໃດເປັນເລື່ອງໃໝ່ກ່ຽວກັບການປະກາດ?
12 ໃນອະດີດ ຜູ້ຄົນຈາກຊາດຕ່າງໆໄດ້ມາປະເທດອິດສະລາແອນເພື່ອຮັບໃຊ້ພະເຢໂຫວາ. (1 ກະສັດ 8:41-43) ແຕ່ຈາກນັ້ນ ພະເຍຊູໄດ້ໃຫ້ຄຳສັ່ງທີ່ເຮົາພົບໃນມັດທາຍ 28:19, 20 (ອ່ານ). ພະເຍຊູໄດ້ບອກພວກລູກສິດວ່າໃຫ້ “ໄປ” ຫາທຸກຄົນ. ໃນວັນເພນເຕກອດປີ ຄ.ສ. 33 ພະເຢໂຫວາໄດ້ສະແດງໃຫ້ເຫັນວ່າພະອົງຕ້ອງການໃຫ້ມີການປະກາດຂ່າວດີໄປທົ່ວໂລກ. ໃນມື້ນັ້ນປະມານ 120 ຄົນຂອງປະຊາຄົມໃໝ່ເຊິ່ງໄດ້ຮັບການເຈີມດ້ວຍພະລັງບໍລິສຸດ ເຂົາເຈົ້າກໍເລີ່ມເວົ້າພາສາຕ່າງໆກັບຄົນຢິວແລະຄົນທີ່ປ່ຽນມານັບຖືສາສະໜາຢິວ. (ກິດຈະການ 2:4-11) ຕໍ່ມາ ເຂດປະກາດກໍກວ້າງອອກໄປເຖິງຄົນສະມາລີ. ຈາກນັ້ນ ໃນປີ ຄ.ສ. 36 ເຂດປະກາດກໍຂະຫຍາຍອອກໄປເຖິງຄົນຕ່າງຊາດທີ່ບໍ່ໄດ້ຮັບສິນຕັດ. ໃນນີ້ຈຶ່ງໝາຍຄວາມວ່າຄລິດສະຕຽນຕ້ອງປະກາດກັບທຸກຄົນທີ່ຢູ່ໃນໂລກນີ້!
13, 14. (ກ) ໃນ “ຄຳສັ່ງໃໝ່” ຂອງພະເຍຊູມີຫຍັງກ່ຽວຂ້ອງຢູ່ນຳ? (ຂ) ເຮົາຮຽນຮູ້ຫຍັງຈາກຕົວຢ່າງທີ່ພະເຍຊູວາງໄວ້?
13 ພະເຍຊູຍັງໄດ້ໃຫ້ “ຄຳສັ່ງໃໝ່ຂໍ້ໜຶ່ງ” ທີ່ກ່ຽວຂ້ອງກັບວິທີປະຕິບັດຕໍ່ພີ່ນ້ອງຊາຍຍິງ. (ອ່ານໂຢຮັນ 13:34, 35) ເຮົາຕ້ອງສະແດງຄວາມຮັກຕໍ່ພີ່ນ້ອງຂອງເຮົາທຸກໆມື້ ແລະເຮົາຍັງຕ້ອງເຕັມໃຈທີ່ຈະມອບຊີວິດຂອງເຮົາໃຫ້ແກ່ເຂົາເຈົ້າ ເຖິງວ່າໃນພະບັນຍັດບໍ່ໄດ້ຮຽກຮ້ອງໃຫ້ເຮົາເຮັດແບບນັ້ນກໍຕາມ.—ມັດທາຍ 22:39; 1 ໂຢຮັນ 3:16
14 ພະເຍຊູເປັນຕົວຢ່າງທີ່ດີທີ່ສຸດໃນເລື່ອງການສະແດງຄວາມຮັກແບບບໍ່ເຫັນແກ່ຕົວ. ພະອົງຮັກພວກລູກສິດຫຼາຍຈົນເຖິງຂັ້ນໄດ້ເຕັມໃຈຕາຍເພື່ອເຂົາເຈົ້າ ແລະພະອົງກໍຄາດໝາຍໃຫ້ພວກລູກສິດທຸກຄົນເຮັດຄືກັບທີ່ພະອົງໄດ້ເຮັດ. ດັ່ງນັ້ນ ເຮົາຄວນເຕັມໃຈທີ່ຈະອົດທົນກັບຄວາມຫຍຸ້ງຍາກຕ່າງໆແລະເຖິງຂັ້ນຍອມຕາຍເພື່ອພີ່ນ້ອງຊາຍຍິງຂອງເຮົາ.—1 ເທຊະໂລນີກ 2:8
ການຊີ້ນຳສຳລັບທຸກມື້ນີ້ ແລະສຳລັບອະນາຄົດ
15, 16. ໃນປັດຈຸບັນນີ້ເຮົາມີສະພາບການໃໝ່ອັນໃດ ແລະພະເຢໂຫວາຊີ້ນຳເຮົາແນວໃດ?
15 ພະເຍຊູໄດ້ແຕ່ງຕັ້ງ ‘ຂ້າໃຊ້ຜູ້ສັດຊື່ແລະສຸຂຸມ’ ໃຫ້ແຈກປັນອາຫານເພື່ອບຳລຸງລ້ຽງຄວາມເຊື່ອຂອງພວກລູກສິດຂອງພະອົງໃນ ‘ເວລາທີ່ເໝາະສົມ.’ (ມັດທາຍ 24:45-47) ອາຫານນີ້ລວມມີຄຳຊີ້ນຳຕ່າງໆທີ່ສຳຄັນສຳລັບປະຊາຊົນຂອງພະເຈົ້າເມື່ອສະພາບການຕ່າງໆໄດ້ປ່ຽນໄປ. ເຮົາມີສະພາບການໃໝ່ຄືແນວໃດ?
16 ເຮົາກຳລັງມີຊີວິດຢູ່ໃນ “ສະໄໝສຸດທ້າຍ” ແລະອີກບໍ່ດົນເຮົາຈະປະສົບກັບຄວາມທຸກລຳບາກເຊິ່ງບໍ່ເຄີຍເກີດຂຶ້ນມາກ່ອນ. (2 ຕີໂມເຕ 3:1, ລ.ມ.; ມາລະໂກ 13:19) ຊາຕານແລະພວກຜີປີສາດຂອງມັນຍັງໄດ້ຖືກຖິ້ມລົງມາຈາກຟ້າສະຫວັນໃຫ້ມາຢູ່ໂລກນີ້ ເຊິ່ງເປັນສາເຫດທີ່ເຮັດໃຫ້ມະນຸດມີຄວາມທຸກລຳບາກຫຼາຍ. (ຄຳປາກົດ 12:9, 12) ນອກຈາກນັ້ນ ເຮົາກຳລັງເຊື່ອຟັງຄຳສັ່ງຂອງພະເຍຊູທີ່ໃຫ້ປະກາດໄປທົ່ວໂລກກັບຜູ້ຄົນໃຫ້ຫຼາຍຕື່ມອີກແລະໃນຫຼາຍພາສາກວ່າທີ່ເຄີຍມີມາ!
17, 18. ເຮົາຄວນຕອບສະໜອງແນວໃດຕໍ່ກັບການຊີ້ນຳທີ່ເຮົາໄດ້ຮັບ?
17 ອົງການຂອງພະເຢໂຫວາໄດ້ໃຫ້ເຄື່ອງມືຫຼາຍຢ່າງແກ່ເຮົາເພື່ອຊ່ວຍເຮົາໃນວຽກປະກາດ. ເຈົ້າໄດ້ໃຊ້ເຄື່ອງມືເຫຼົ່ານັ້ນບໍ? ຢູ່ທີ່ການປະຊຸມ ເຮົາໄດ້ຮັບຄຳແນະນຳກ່ຽວກັບການໃຊ້ເຄື່ອງມືເຫຼົ່ານັ້ນໃນວິທີທີ່ດີທີ່ສຸດ. ເຈົ້າຖືວ່າຄຳແນະນຳເຫຼົ່ານີ້ມາຈາກພະເຢໂຫວາບໍ?
18 ເພື່ອພະເຢໂຫວາຈະອວຍພອນ ເຮົາຕ້ອງໃສ່ໃຈຕໍ່ການຊີ້ນຳທຸກຢ່າງທີ່ໃຫ້ເຮົາໂດຍຜ່ານທາງປະຊາຄົມຄລິດສະຕຽນ. ຖ້າເຮົາເຊື່ອຟັງໃນຕອນນີ້ ກໍຈະງ່າຍຂຶ້ນທີ່ຈະເຮັດຕາມການຊີ້ນຳໃນລະຫວ່າງທີ່ມີ “ຄວາມທຸກທໍລະມານຢ່າງໜັກ” ເມື່ອໂລກຊົ່ວທັງໝົດທີ່ຊາຕານປົກຄອງຈະຖືກທຳລາຍ. (ມັດທາຍ 24:21) ຫຼັງຈາກນັ້ນ ເຮົາກໍຈະໄດ້ຮັບການຊີ້ນຳໃໝ່ສຳລັບຊີວິດໃນໂລກໃໝ່ທີ່ຊອບທຳເຊິ່ງຈະພົ້ນຈາກອິດທິພົນຂອງຊາຕານຢ່າງແທ້ຈິງ.
ໃນໂລກໃໝ່ ເຮົາຈະໄດ້ຮັບມ້ວນໜັງສືໃໝ່ພ້ອມກັບການຊີ້ນຳໃໝ່ສຳລັບຊີວິດໃນອຸທິຍານ (ເບິ່ງຂໍ້ 19, 20)
19, 20. ຈະມີການເປີດມ້ວນໜັງສືຫຍັງ ແລະຜົນຈະເປັນຄືແນວໃດ?
19 ໃນສະໄໝຂອງໂມເຊ ຊາດອິດສະລາແອນຈຳເປັນຕ້ອງມີການຊີ້ນຳໃໝ່ ດັ່ງນັ້ນ ພະເຈົ້າຈຶ່ງໃຫ້ພະບັນຍັດແກ່ເຂົາເຈົ້າ. ຕໍ່ມາປະຊາຄົມຄລິດສະຕຽນຕ້ອງເຮັດຕາມ “ພະບັນຍັດຂອງພະຄລິດ.” ຄ້າຍຄືກັນ ຄຳພີໄບເບິນບອກເຮົາວ່າໃນໂລກໃໝ່ ເຮົາຈະໄດ້ຮັບມ້ວນໜັງສືໃໝ່ພ້ອມກັບການຊີ້ນຳໃໝ່. (ອ່ານຄຳປາກົດ 20:12) ເປັນໄປໄດ້ຫຼາຍທີ່ມ້ວນໜັງສືເຫຼົ່ານີ້ຈະອະທິບາຍກ່ຽວກັບຂໍ້ຮຽກຮ້ອງຕ່າງໆຂອງພະເຢໂຫວາສຳລັບມະນຸດໃນເວລານັ້ນ. ໂດຍການສຶກສາມ້ວນໜັງສືເຫຼົ່ານີ້ ມະນຸດທຸກຄົນລວມທັງຄົນທີ່ຖືກປຸກໃຫ້ຟື້ນຄືນມາຈາກຕາຍຈະສາມາດຮູ້ໃນສິ່ງທີ່ພະເຢໂຫວາຕ້ອງການຈາກເຂົາເຈົ້າ. ມ້ວນໜັງສືເຫຼົ່ານີ້ຈະຊ່ວຍເຮົາໃຫ້ຮຽນຮູ້ຕື່ມອີກກ່ຽວກັບວິທີທີ່ພະເຢໂຫວາຄິດ. ນອກຈາກນັ້ນ ໃນອຸທິຍານເຮົາຈະເຂົ້າໃຈຄຳພີໄບເບິນຫຼາຍຂຶ້ນເພື່ອເຮົາຈະປະຕິບັດຕໍ່ກັນດ້ວຍຄວາມຮັກ ຄວາມນັບຖື ແລະໃຫ້ກຽດກັນ. (ເອຊາອີ 26:9) ໃຫ້ນຶກພາບເບິ່ງວ່າມີຫຼາຍສິ່ງແທ້ໆທີ່ເຮົາຈະຮຽນຮູ້ແລະສອນຄົນອື່ນພາຍໃຕ້ການຊີ້ນຳຂອງພະເຍຊູຄລິດກະສັດຂອງເຮົາ!
20 ຖ້າເຮົາເຮັດຕາມການຊີ້ນຳ “ທີ່ຂຽນໄວ້ແລ້ວໃນໜັງສືທັງຫຼາຍນັ້ນ” ແລະເຮົາຮັກສາຄວາມສັດຊື່ຕໍ່ພະເຢໂຫວາໃນລະຫວ່າງທີ່ມີການທົດລອງຄັ້ງສຸດທ້າຍ ພະອົງກໍຈະຂຽນຊື່ຂອງເຮົາຢ່າງຖາວອນໄວ້ໃນ “ໜັງສືສຳລັບຊີວິດ.” ເຮົາສາມາດໄດ້ຮັບຊີວິດຕະຫຼອດໄປໄດ້! ດັ່ງນັ້ນ ເຮົາຕ້ອງຢຸດເພື່ອຈະອ່ານສິ່ງທີ່ຄຳພີໄບເບິນບອກໄວ້ ເຮົາຕ້ອງເບິ່ງເພື່ອຈະເຂົ້າໃຈວ່າສິ່ງທີ່ອ່ານມີຄວາມໝາຍແນວໃດສຳລັບເຮົາ ແລະເຮົາຕ້ອງຟັງໂດຍການເຊື່ອຟັງການຊີ້ນຳຈາກພະເຢໂຫວາໃນຕອນນີ້. ຖ້າເຮົາເຮັດສິ່ງເຫຼົ່ານີ້ ເຮົາກໍສາມາດລອດຊີວິດຈາກຄວາມທຸກລຳບາກຄັ້ງໃຫຍ່ແລະມີຄວາມຍິນດີໃນການຮຽນຮູ້ກ່ຽວກັບພະເຢໂຫວາພະເຈົ້າຂອງເຮົາທີ່ສຸຂຸມແລະມີຄວາມຮັກ.—ຜູ້ເທສະໜາປ່າວປະກາດ 3:11; ໂລມ 11:33
