ສະແດງຄວາມເຊື່ອໂດຍຕັດສິນໃຈຢ່າງສຸຂຸມ!
“ຂໍ [ຢູ່ເລື້ອຍໆ] ດ້ວຍຄວາມເຊື່ອ ຢ່າສົງໄສສັກເທື່ອ.”—ຢາໂກໂບ 1:6
ເພງ: 81, 70
1. ອັນໃດເຮັດໃຫ້ກາອີນຕັດສິນໃຈຜິດພາດ ແລະຜົນເປັນແນວໃດ?
ກາອີນຕ້ອງຕັດສິນໃຈໃນເລື່ອງໜຶ່ງທີ່ສຳຄັນ ນັ້ນຄື ລາວຈະເລືອກຄວບຄຸມຄວາມຮູ້ສຶກທີ່ຊົ່ວຮ້າຍຂອງຕົວເອງເຊິ່ງມັນຈະເປັນຜົນດີ ຫຼືລາວຈະປ່ອຍຕົວໃຫ້ເຮັດຕາມຄວາມຮູ້ສຶກເຊິ່ງມັນຈະເປັນຜົນຮ້າຍ. ຄຳພີໄບເບິນບອກວ່າກາອີນຕັດສິນໃຈຜິດພາດ ແລະສິ່ງນັ້ນເຮັດໃຫ້ອາເບນນ້ອງຊາຍຂອງລາວເສຍຊີວິດ ແລະກາອີນເອງກໍສູນເສຍສາຍສຳພັນທີ່ດີກັບຜູ້ສ້າງ.—ຕົ້ນເດີມ 4:3-16
2. ເປັນຫຍັງການຕັດສິນໃຈໃຫ້ດີຈຶ່ງສຳຄັນ?
2 ໃນຊີວິດຂອງເຮົາ ເຮົາເອງກໍຕ້ອງໄດ້ເລືອກແລະຕັດສິນໃຈ. ການຕັດສິນໃຈບາງຢ່າງສຳຄັນຫຼາຍ ແລະບາງຢ່າງກໍບໍ່ສຳຄັນ. ແຕ່ການເລືອກແລະການຕັດສິນໃຈຫຼາຍຢ່າງສາມາດສົ່ງຜົນກະທົບທີ່ຍິ່ງໃຫຍ່ຕໍ່ຊີວິດເຮົາ. ເມື່ອຕັດສິນໃຈຖືກຕ້ອງ ເຮົາອາດຈະມີບັນຫາໜ້ອຍລົງແລະມີຊີວິດທີ່ສະຫງົບສຸກຫຼາຍຂຶ້ນ. ແຕ່ເມື່ອຕັດສິນໃຈຜິດ ຊີວິດຂອງເຮົາອາດຈະມີແຕ່ບັນຫາແລະຄວາມຜິດຫວັງ.—ສຸພາສິດ 14:8
3. (ກ) ເພື່ອຈະຕັດສິນໃຈຢ່າງສຸຂຸມ ເຮົາຄວນມີຄວາມເຊື່ອໃນສິ່ງໃດ? (ຂ) ເຮົາຈະເບິ່ງຄຳຖາມຫຍັງແດ່?
3 ສິ່ງໃດຈະຊ່ວຍເຮົາໃຫ້ຕັດສິນໃຈຢ່າງສຸຂຸມ? ເຮົາຕ້ອງມີຄວາມເຊື່ອໃນພະເຢໂຫວາ ໂດຍໝັ້ນໃຈວ່າພະອົງຢາກຊ່ວຍເຮົາແລະຈະໃຫ້ເຮົາມີສະຕິປັນຍາເພື່ອຕັດສິນໃຈຢ່າງຖືກຕ້ອງ. ນອກຈາກນັ້ນ ເຮົາຍັງຕ້ອງເຊື່ອໃນພະຄຳຂອງພະເຢໂຫວາ ໂດຍໄວ້ວາງໃຈຄຳແນະນຳຈາກພະອົງ. (ອ່ານຢາໂກໂບ 1:5-8) ເມື່ອເຮົາໃກ້ຊິດກັບພະເຢໂຫວາແລະຮັກພະອົງຫຼາຍຂຶ້ນ ສິ່ງນີ້ຈະຊ່ວຍເຮົາໃຫ້ໝັ້ນໃຈວ່າພະອົງຮູ້ສິ່ງທີ່ດີທີ່ສຸດສຳລັບເຮົາ. ດັ່ງນັ້ນ ກ່ອນຈະຕັດສິນໃຈເຮົາຄວນຄົ້ນຄວ້າໃນຄຳພີໄບເບິນ. ແຕ່ເຮົາຈະປັບປຸງຄວາມສາມາດເພື່ອຕັດສິນໃຈຢ່າງຖືກຕ້ອງໄດ້ແນວໃດ? ແລະເຮົາຄວນປ່ຽນການຕັດສິນໃຈທີ່ໄດ້ເຮັດໄປແລ້ວບໍ?
ເຮົາທຸກຄົນຕ້ອງຕັດສິນໃຈ
4. ອາດາມຕ້ອງຕັດສິນໃຈໃນເລື່ອງໃດ ແລະຜົນເປັນແນວໃດ?
4 ນັບຕັ້ງແຕ່ເລີ່ມມີມະນຸດ ຄົນເຮົາຕ້ອງຕັດສິນໃຈໃນເລື່ອງຕ່າງໆທີ່ສຳຄັນ. ອາດາມມະນຸດຄົນທຳອິດຕ້ອງຕັດສິນໃຈວ່າຈະເຊື່ອຟັງພະເຢໂຫວາເຊິ່ງເປັນຜູ້ສ້າງລາວ ຫຼືຈະເຊື່ອຟັງເອວາເມຍຂອງລາວ. ແຕ່ອາດາມເລືອກເຊື່ອຟັງເອວາຜູ້ທີ່ກະຕຸ້ນລາວໃຫ້ຕັດສິນໃຈຜິດພາດຫຼາຍ. ຜົນກໍຄື ພະເຢໂຫວາໄດ້ໄລ່ອາດາມອອກຈາກສວນເອເດນ ແລະຕໍ່ມາລາວກໍຕາຍ. ໃນທຸກມື້ນີ້ ເຮົາກໍກຳລັງປະສົບກັບຜົນຮ້າຍຈາກການຕັດສິນໃຈທີ່ຜິດພາດຂອງອາດາມ.
ພະເຢໂຫວາຈັດໃຫ້ມີຄຳພີໄບເບິນເພື່ອສອນເຮົາໃຫ້ຮູ້ວິທີຕັດສິນໃຈຢ່າງສຸຂຸມ
5. ເຮົາຄວນມີທັດສະນະແນວໃດຕໍ່ຄວາມຮັບຜິດຊອບໃນການຕັດສິນໃຈ?
5 ບາງຄົນຄິດວ່າຊີວິດຈະງ່າຍຂຶ້ນຫຼາຍຖ້າບໍ່ຕ້ອງຕັດສິນໃຈໃນເລື່ອງໃດເລີຍ. ບາງທີເຈົ້າກໍອາດຮູ້ສຶກແບບນັ້ນຄືກັນ. ແຕ່ເປັນສິ່ງທີ່ດີສຳລັບເຮົາທີ່ຈະຈື່ໄວ້ວ່າພະເຢໂຫວາບໍ່ໄດ້ສ້າງເຮົາໃຫ້ເປັນຄືກັບຫຸ່ນຍົນທີ່ບໍ່ສາມາດຄິດຫຼືເລືອກໄດ້. ພະອົງຈັດໃຫ້ມີຄຳພີໄບເບິນເພື່ອສອນເຮົາໃຫ້ຮູ້ວິທີຕັດສິນໃຈຢ່າງສຸຂຸມ. ພະເຢໂຫວາຢາກໃຫ້ເຮົາຕັດສິນໃຈ ແລະຄວາມຮັບຜິດຊອບນີ້ເປັນປະໂຫຍດຕໍ່ເຮົາ. ໃຫ້ເບິ່ງຕົວຢ່າງຕໍ່ໄປນີ້.
6, 7. ຊາວອິດສະລາແອນຕ້ອງຕັດສິນໃຈໃນເລື່ອງໃດ ແລະເປັນຫຍັງຈຶ່ງຍາກສຳລັບເຂົາເຈົ້າທີ່ຈະຕັດສິນໃຈ? (ເບິ່ງຮູບທຳອິດ)
6 ຕອນຢູ່ໃນແຜ່ນດິນທີ່ພະເຈົ້າສັນຍາໄວ້ ຊາວອິດສະລາແອນຕ້ອງເລືອກວ່າຈະນະມັດສະການພະເຢໂຫວາຫຼືວ່າຮັບໃຊ້ພະເຈົ້າອົງອື່ນ. (ອ່ານໂຢຊວຍ 24:15) ການຕັດສິນໃຈນີ້ອາດເບິ່ງຄືວ່າເປັນເລື່ອງງ່າຍໆ ແຕ່ການເລືອກຂອງເຂົາເຈົ້າໝາຍເຖິງຊີວິດຫຼືຄວາມຕາຍ. ໃນສະໄໝຂອງຜູ້ຕັດສິນ ຊາວອິດສະລາແອນເລືອກຜິດຢູ່ເລື້ອຍໆ. ເຂົາເຈົ້າເຊົານະມັດສະການພະເຢໂຫວາແລະເລີ່ມນະມັດສະການພະເຈົ້າປອມ. (ຜູ້ຕັດສິນ 2:3, 11-23) ຕໍ່ມາໃນສະໄໝຂອງຜູ້ພະຍາກອນເອລີຢາ ເຂົາເຈົ້າຕ້ອງຕັດສິນໃຈວ່າຈະຮັບໃຊ້ພະເຢໂຫວາຫຼືບາອານທີ່ເປັນພະເຈົ້າປອມ. (1 ກະສັດ 18:21) ເລື່ອງນີ້ອາດເບິ່ງຄືວ່າເລືອກໄດ້ບໍ່ຍາກເພາະວ່າການຮັບໃຊ້ພະເຢໂຫວາເປັນສິ່ງທີ່ດີທີ່ສຸດສະເໝີ ແລະຄົນສະຫຼາດຈະຢາກຮັບໃຊ້ພະເຈົ້າທີ່ມີຊີວິດ. ແຕ່ຊາວອິດສະລາແອນກໍຕັດສິນໃຈບໍ່ໄດ້. ຄຳພີໄບເບິນບອກວ່າເຂົາເຈົ້າຢູ່ “ຫວ່າງກາງທາງ 2 ຝ່າຍ.” ດ້ວຍຄວາມສຸຂຸມ ເອລີຢາກະຕຸ້ນເຂົາເຈົ້າໃຫ້ເລືອກນະມັດສະການພະເຢໂຫວາພະເຈົ້າທ່ຽງແທ້.
7 ເປັນຫຍັງຈຶ່ງຍາກທີ່ຊາວອິດສະລາແອນຈະຕັດສິນໃຈຢ່າງສຸຂຸມ? ສິ່ງທຳອິດ ເຂົາເຈົ້າຂາດຄວາມເຊື່ອໃນພະເຢໂຫວາແລະບໍ່ຍອມຟັງພະອົງ. ເຂົາເຈົ້າບໍ່ໄວ້ວາງໃຈພະເຢໂຫວາແລະບໍ່ໄດ້ໃຊ້ເວລາຮຽນຮູ້ກ່ຽວກັບພະອົງຫຼືສະຕິປັນຍາຂອງພະອົງ. ຖ້າຊາວອິດສະລາແອນໄດ້ເຮັດສິ່ງເຫຼົ່ານີ້ກໍຈະຊ່ວຍເຂົາເຈົ້າໃຫ້ຕັດສິນໃຈຢ່າງສຸຂຸມ. (ຄຳເພງ 25:12) ສິ່ງທີສອງ ຊາວອິດສະລາແອນໄດ້ຮັບອິດທິພົນຈາກຊາດທີ່ຢູ່ອ້ອມຂ້າງ. ຄົນເຫຼົ່ານັ້ນມີອິດທິພົນຕໍ່ຄວາມຄິດແລະເຖິງຂັ້ນຕັດສິນໃຈແທນເຂົາເຈົ້າຊໍ້າ. ຜົນກໍຄື ຊາວອິດສະລາແອນເລີ່ມເຮັດຕາມຄົນເຫຼົ່ານັ້ນແລະນະມັດສະການພະປອມນຳເຂົາເຈົ້າ. ທີ່ຈິງພະເຢໂຫວາໄດ້ເຕືອນຊາວອິດສະລາແອນຕັ້ງແຕ່ຫຼາຍປີແລ້ວວ່າສິ່ງແບບນີ້ອາດຈະເກີດຂຶ້ນ.—ອົບພະຍົບ 23:2
ຄົນອື່ນຄວນຕັດສິນໃຈແທນເຮົາບໍ?
8. ເຮົາໄດ້ບົດຮຽນຫຍັງທີ່ສຳຄັນຈາກຊາວອິດສະລາແອນ?
8 ຕົວຢ່າງຂອງຊາວອິດສະລາແອນສອນເຮົາວ່າຖ້າເຮົາຢາກຕັດສິນໃຈຢ່າງສຸຂຸມ ເຮົາຄວນໃຊ້ຄຳພີໄບເບິນ. ຄາລາຊີ 6:5 ເຕືອນວ່າແຕ່ລະຄົນຕ້ອງຮັບຜິດຊອບໃນສິ່ງທີ່ຕົວເອງຕັດສິນໃຈ. ເຫັນໄດ້ແຈ້ງວ່າເຮົາບໍ່ຄວນໃຫ້ຄົນອື່ນເຮັດໜ້າທີ່ຕັດສິນໃຈແທນເຮົາ. ແຕ່ເຮົາຄວນຮຽນຮູ້ໃນສິ່ງທີ່ພະເຈົ້າບອກວ່າຖືກຕ້ອງແລະເລືອກເຮັດຕາມນັ້ນ.
ຖ້າເຮົາຍອມໃຫ້ຄົນອື່ນຕັດສິນໃຈແທນເຮົາ ນັ້ນກໍໝາຍຄວາມວ່າເຮົາຕັດສິນໃຈທີ່ຈະເຮັດຕາມເຂົາເຈົ້າ
9. ເປັນຫຍັງຈຶ່ງເປັນອັນຕະລາຍທີ່ຈະປ່ອຍໃຫ້ຄົນອື່ນຕັດສິນໃຈແທນເຮົາ?
9 ໂດຍວິທີໃດທີ່ເຮົາອາດປ່ອຍໃຫ້ຄົນອື່ນຕັດສິນໃຈແທນເຮົາ? ກໍໂດຍທີ່ເຮົາຍອມໃຫ້ເຂົາເຈົ້າກົດດັນເຮົາໃຫ້ຕັດສິນໃຈແບບຜິດໆ. (ສຸພາສິດ 1:10, 15) ການຍອມແບບນີ້ເປັນອັນຕະລາຍຫຼາຍ. ເປັນຄວາມຮັບຜິດຊອບຂອງເຮົາທີ່ຈະເຮັດຕາມສະຕິຮູ້ສຶກຜິດຊອບທີ່ໄດ້ຮັບການຝຶກສອນຈາກຄຳພີໄບເບິນ. ຖ້າເຮົາຍອມໃຫ້ຄົນອື່ນຕັດສິນໃຈແທນເຮົາ ນັ້ນກໍໝາຍຄວາມວ່າເຮົາຕັດສິນໃຈທີ່ຈະເຮັດຕາມເຂົາເຈົ້າ. ການເລືອກແບບນັ້ນສາມາດນຳໄປສູ່ຄວາມເສຍຫາຍທີ່ໃຫຍ່ຫຼວງ.
10. ໂປໂລໃຫ້ຄຳເຕືອນຫຍັງແກ່ພີ່ນ້ອງໃນເມືອງຄາລາຊີ?
10 ອັກຄະສາວົກໂປໂລເຕືອນພີ່ນ້ອງໃນເມືອງຄາລາຊີວ່າ ໃນເລື່ອງສ່ວນຕົວ ຢ່າປ່ອຍໃຫ້ຄົນອື່ນຕັດສິນໃຈແທນເຂົາເຈົ້າ. (ອ່ານຄາລາຊີ 4:17) ພີ່ນ້ອງບາງຄົນໃນເມືອງນີ້ກຳລັງພະຍາຍາມຕັດສິນໃຈແທນຄົນອື່ນໃນປະຊາຄົມ. ອັນໃດຄືແຮງຈູງໃຈຂອງເຂົາເຈົ້າ? ຜູ້ຊາຍທີ່ເຫັນແກ່ຕົວເຫຼົ່ານັ້ນຢາກໃຫ້ພີ່ນ້ອງເຮັດຕາມເຂົາເຈົ້າ ແທນທີ່ຈະເຮັດຕາມພວກອັກຄະສາວົກ. ເຂົາເຈົ້າບໍ່ໄດ້ເປັນຄົນຖ່ອມແລະບໍ່ໄດ້ນັບຖືສິດໃນການຕັດສິນໃຈຂອງພີ່ນ້ອງ.
11. ເມື່ອຄົນອື່ນຕ້ອງຕັດສິນໃຈໃນບາງເລື່ອງ ເຮົາຈະຊ່ວຍເຂົາເຈົ້າແນວໃດ?
11 ເຮົາທຸກຄົນສາມາດຮຽນຮູ້ຈາກຕົວຢ່າງທີ່ດີຂອງອັກຄະສາວົກໂປໂລ. ລາວຮູ້ວ່າພີ່ນ້ອງມີສິດຕັດສິນໃຈເອງ ແລະລາວກໍນັບຖືສິດນັ້ນ. (ອ່ານ 2 ໂກລິນໂທ 1:24) ໃນທຸກມື້ນີ້ ຜູ້ເຖົ້າແກ່ສາມາດເຮັດຕາມຕົວຢ່າງນີ້ເມື່ອໃຫ້ຄຳແນະນຳໃນເລື່ອງໃດເລື່ອງໜຶ່ງທີ່ກ່ຽວຂ້ອງກັບການຕັດສິນໃຈສ່ວນຕົວ. ເຂົາເຈົ້າຍິນດີຊ່ວຍພີ່ນ້ອງຊາຍຍິງໃຫ້ຮູ້ຂໍ້ມູນໃນຄຳພີໄບເບິນ. ແຕ່ຜູ້ເຖົ້າແກ່ຈະໃຫ້ແຕ່ລະຄົນຕັດສິນໃຈເອງ ເພາະແຕ່ລະຄົນຈະຕ້ອງຮັບຜົນຈາກການຕັດສິນໃຈແບບນັ້ນ. ບົດຮຽນທີ່ສຳຄັນກໍຄື: ເຮົາສາມາດຊ່ວຍພີ່ນ້ອງໃຫ້ເຂົ້າໃຈຄຳແນະນຳໃນຄຳພີໄບເບິນເຊິ່ງໃຊ້ໄດ້ກັບສະຖານະການຂອງເຂົາເຈົ້າ. ແຕ່ພີ່ນ້ອງມີສິດແລະມີຄວາມຮັບຜິດຊອບທີ່ຈະຕັດສິນໃຈເອງ. ເມື່ອຕັດສິນໃຈເອງຢ່າງສຸຂຸມ ເຂົາເຈົ້າກໍຈະໄດ້ຮັບປະໂຫຍດ. ເຫັນໄດ້ແຈ້ງວ່າ ເຮົາບໍ່ຄວນຄິດວ່າເຮົາມີສິດອຳນາດທີ່ຈະຕັດສິນໃຈວ່າພີ່ນ້ອງຊາຍຍິງຄວນເຮັດແນວໃດ.
ຜູ້ເຖົ້າແກ່ທີ່ມີຄວາມຮັກຊ່ວຍຄົນອື່ນໃຫ້ຕັດສິນໃຈດ້ວຍຕົວເອງ (ເບິ່ງຂໍ້ 11)
ຢ່າຕັດສິນໃຈຕາມຄວາມຮູ້ສຶກ
12, 13. ເປັນຫຍັງຈຶ່ງເປັນອັນຕະລາຍຖ້າເຮົາຕັດສິນໃຈໃນຕອນທີ່ໃຈຮ້າຍຫຼືທໍ້ໃຈ?
12 ໃນທຸກມື້ນີ້ ຫຼາຍຄົນຕັດສິນໃຈຕາມຄວາມຮູ້ສຶກຂອງຕົວເອງ ແຕ່ເລື່ອງນີ້ເປັນອັນຕະລາຍຫຼາຍ. ຄຳພີໄບເບິນເຕືອນວ່າ ເຮົາບໍ່ຄວນຕັດສິນໃຈຕາມຫົວໃຈທີ່ມີບາບຫຼືຕາມຄວາມຮູ້ສຶກຂອງເຮົາ. (ສຸພາສິດ 28:26) ເຮົາເຊື່ອໃຈຕົວເອງບໍ່ໄດ້ ເພາະ “ໃຈມະນຸດຮູ້ລໍ້ລວງເກີນກວ່າສິ່ງທັງປວງແລະມັນຊົ່ວຮ້າຍ.” (ເຢເຣມີ 17:9) ໃນຄຳພີໄບເບິນມີຫຼາຍຕົວຢ່າງທີ່ສະແດງໃຫ້ເຫັນຜົນໄດ້ຮັບທີ່ໜ້າເສົ້າຍ້ອນໄວ້ວາງໃຈຫົວໃຈທີ່ມີບາບ. (1 ກະສັດ 11:9; ເຢເຣມີ 3:17; 13:10) ດັ່ງນັ້ນຈະມີຫຍັງເກີດຂຶ້ນຖ້າເຮົາຕັດສິນໃຈຕາມໃຈຕົວເອງ?
13 ພະເຢໂຫວາສັ່ງໃຫ້ເຮົາຮັກພະອົງໝົດຫົວໃຈແລະໃຫ້ຮັກເພື່ອນບ້ານເໝືອນຮັກຕົວເອງ. (ມັດທາຍ 22:37-39) ແຕ່ເຮົາຕ້ອງລະວັງ. ຂໍ້ພະຄຳພີຕ່າງໆທີ່ກ່າວເຖິງກ່ອນໜ້ານີ້ໄດ້ສະແດງໃຫ້ເຫັນວ່າຈະເກີດຜົນເສຍຫາຍຖ້າເຮົາປ່ອຍໃຫ້ຄວາມຮູ້ສຶກຄວບຄຸມຄວາມຄິດແລະການກະທຳຂອງເຮົາ. ຕົວຢ່າງເຊັ່ນ: ອາດເກີດຫຍັງຂຶ້ນຖ້າເຮົາຕັດສິນໃຈໃນຕອນທີ່ໃຈຮ້າຍ? (ສຸພາສິດ 14:17; 29:22) ເມື່ອທໍ້ໃຈເຮົາສາມາດຕັດສິນໃຈຢ່າງສຸຂຸມໄດ້ບໍ? (ຈົດເຊັນບັນຊີ 32:6-12; ສຸພາສິດ 24:10) ເຮົາຄວນໃຫ້ຄຳພີໄບເບິນຊີ້ນຳຄວາມຄິດຂອງເຮົາ. (ໂລມ 7:25) ເມື່ອຕັດສິນໃຈໃນເລື່ອງຕ່າງໆທີ່ສຳຄັນ ເຮົາບໍ່ຄວນເຮັດຕາມຄວາມຮູ້ສຶກຂອງເຮົາ.
ເມື່ອຕ້ອງປ່ຽນການຕັດສິນໃຈ
14. ເຮົາຮູ້ໄດ້ແນວໃດວ່າເປັນສິ່ງຖືກຕ້ອງທີ່ຈະປ່ຽນການຕັດສິນໃຈບາງຢ່າງ?
14 ເຮົາຕ້ອງຕັດສິນໃຈຢ່າງສຸຂຸມ. ແຕ່ຄົນທີ່ສຸຂຸມຮູ້ວ່າບາງຄັ້ງລາວອາດຕ້ອງເບິ່ງຄືນໃນສິ່ງທີ່ຕັດສິນໃຈໄປແລ້ວແລະບາງທີອາດຕ້ອງປ່ຽນການຕັດສິນໃຈນັ້ນ. ພະເຢໂຫວາວາງຕົວຢ່າງທີ່ດີເລີດໃນເລື່ອງນີ້. ຂໍໃຫ້ສັງເກດສິ່ງທີ່ພະອົງເຮັດກັບຊາວນີນີເວໃນສະໄໝຂອງໂຢນາ: “ພະເຈົ້າໄດ້ເຫັນກິດຈະການຂອງເຂົາວ່າເຂົາໄດ້ປະໃຈເກົ່າເອົາໃຈໃໝ່ແຕ່ຮີດຄອງຮ້າຍຂອງເຂົາ ແລະພະເຈົ້າໄດ້ຫຼົບໃຈແຕ່ການອັນຕະລາຍທີ່ພະອົງໄດ້ບອກຈະກະທຳ ແລະພະອົງບໍ່ໄດ້ກະທຳການນັ້ນ.” (ໂຢນາ 3:10) ເມື່ອພະເຢໂຫວາເຫັນວ່າຊາວນີນີເວປ່ຽນແປງແລະເຊົາເຮັດສິ່ງທີ່ຊົ່ວຮ້າຍ ພະອົງໄດ້ປັບປ່ຽນການຕັດສິນໃຈຂອງຕົວເອງ. ເລື່ອງນີ້ສະແດງໃຫ້ເຫັນວ່າພະອົງມີເຫດຜົນ ຖ່ອມ ແລະເຫັນອົກເຫັນໃຈ. ບໍ່ຄືກັບມະນຸດຫຼາຍຄົນ ພະເຢໂຫວາຕັດສິນໃຈຢ່າງລະມັດລະວັງ ແມ່ນແຕ່ເມື່ອໃຈຮ້າຍ.
ເມື່ອພະເຢໂຫວາເຫັນວ່າຊາວນີນີເວປ່ຽນແປງແລະເຊົາເຮັດສິ່ງທີ່ຊົ່ວຮ້າຍ ພະອົງໄດ້ປັບປ່ຽນການຕັດສິນໃຈຂອງຕົວເອງ
15. ເປັນຫຍັງເຮົາອາດຕ້ອງປ່ຽນການຕັດສິນໃຈ?
15 ບາງຄັ້ງອາດເປັນເລື່ອງດີທີ່ເຮົາຈະເບິ່ງຄືນໃນສິ່ງທີ່ໄດ້ຕັດສິນໃຈໄປແລ້ວ ເຊັ່ນ: ເມື່ອສະພາບການຂອງເຮົາປ່ຽນໄປ. ຂໍໃຫ້ຈື່ໄວ້ວ່າບາງຄັ້ງພະເຢໂຫວາກໍປ່ຽນການຕັດສິນໃຈຂອງພະອົງເຊັ່ນກັນ. (1 ກະສັດ 21:20, 21, 27-29; 2 ກະສັດ 20:1-5) ເຮົາອາດປັບປ່ຽນການຕັດສິນໃຈເມື່ອໄດ້ຮັບຂໍ້ມູນໃໝ່. ໃຫ້ຄິດເຖິງຕົວຢ່າງຂອງກະສັດດາວິດ. ຍ້ອນໄດ້ຮັບຂໍ້ມູນຜິດໆ ລາວຈຶ່ງຕັດສິນຜິດກ່ຽວກັບເມຟີໂບເຊດທີ່ເປັນຫຼານຊາຍຂອງຊາອຶລ. ແຕ່ເມື່ອໄດ້ຮັບຂໍ້ມູນທີ່ຖືກຕ້ອງ ດາວິດກໍປ່ຽນການຕັດສິນໃຈຂອງລາວ. (2 ຊາເມືອນ 19:24-29) ບາງຄັ້ງອາດເປັນເລື່ອງສຸຂຸມສຳລັບເຮົາທີ່ຈະເຮັດແບບດຽວກັນນັ້ນ.
16. (ກ) ເມື່ອຕັດສິນໃຈໃນເລື່ອງຕ່າງໆ ມີຄຳແນະນຳຫຍັງແດ່ທີ່ເປັນປະໂຫຍດ? (ຂ) ເປັນຫຍັງເຮົາຄວນກວດເບິ່ງຄືນໃນສິ່ງທີ່ໄດ້ຕັດສິນໃຈໄປແລ້ວ ແລະເຮົາຈະເຮັດເຊັ່ນນັ້ນໄດ້ແນວໃດ?
16 ຄຳພີໄບເບິນບອກວ່າເຮົາບໍ່ຄວນຟ້າວຟັ່ງເມື່ອຕັດສິນໃຈໃນເລື່ອງທີ່ສຳຄັນ. (ສຸພາສິດ 21:5) ເຮົາຄວນໃຊ້ເວລາຄິດຢ່າງລະອຽດກ່ຽວກັບຄວາມເປັນຈິງທຸກຢ່າງເພື່ອເຮົາຈະຕັດສິນໃຈຢ່າງສຸຂຸມ. (1 ເທຊະໂລນີກ 5:21) ກ່ອນຈະຕັດສິນໃຈເຮັດບາງຢ່າງ ຫົວໜ້າຄອບຄົວຄວນໃຊ້ເວລາຄົ້ນຄວ້າໃນພະຄຳພີແລະໜັງສືຕ່າງໆຂອງອົງການ. ການຟັງຄວາມຄິດເຫັນຫຼືຟັງທັດສະນະຂອງຄົນໃນຄອບຄົວຈະເປັນສິ່ງທີ່ດີຄືກັນ. ຢ່າລືມວ່າພະເຈົ້າກະຕຸ້ນອັບລາຫາມໃຫ້ເຊື່ອຟັງເມຍຂອງລາວ. (ຕົ້ນເດີມ 21:9-12) ຜູ້ເຖົ້າແກ່ກໍເຊັ່ນກັນຄວນໃຊ້ເວລາຄົ້ນຄວ້າ. ເມື່ອມີຂໍ້ມູນໃໝ່ໆທີ່ສະແດງໃຫ້ເຫັນວ່າຈຳເປັນຕ້ອງປ່ຽນແປງສິ່ງທີ່ໄດ້ຕັດສິນໃຈໄປແລ້ວ ຜູ້ເຖົ້າແກ່ບໍ່ຄວນຢ້ານວ່າຄົນອື່ນຈະບໍ່ນັບຖືເຂົາເຈົ້າ. ເມື່ອຈຳເປັນ ຜູ້ເຖົ້າແກ່ທີ່ຖ່ອມແລະມີເຫດຜົນຄວນພ້ອມສະເໝີທີ່ຈະປັບປ່ຽນຄວາມຄິດແລະການຕັດສິນໃຈຂອງເຂົາເຈົ້າ. ນັ້ນເປັນສິ່ງທີ່ດີທີ່ເຮົາຈະຮຽນແບບ ເພາະການເຮັດເຊັ່ນນີ້ຊ່ວຍໃຫ້ປະຊາຄົມມີຄວາມສະຫງົບສຸກແລະສາມັກຄີກັນ.—ກິດຈະການ 6:1-“4
ເຮັດຕາມທີ່ໄດ້ຕັດສິນໃຈໄວ້ແລ້ວ
17. ສິ່ງໃດຈະຊ່ວຍເຮົາໃຫ້ປະສົບຜົນສຳເລັດໃນການຕັດສິນໃຈ?
17 ການຕັດສິນໃຈໃນບາງເລື່ອງອາດສຳຄັນຫຼາຍກວ່າເລື່ອງອື່ນ. ຕົວຢ່າງເຊັ່ນ: ການຕັດສິນໃຈວ່າຈະແຕ່ງດອງຫຼືບໍ່ ຫຼືຈະແຕ່ງດອງກັບໃຜເປັນເລື່ອງທີ່ສຳຄັນຫຼາຍ. ການຕັດສິນໃຈທີ່ສຳຄັນອີກເລື່ອງໜຶ່ງແມ່ນຈະເລີ່ມຮັບໃຊ້ແບບເຕັມເວລາຕອນໃດ. ກ່ອນຈະຕັດສິນໃຈໃນເລື່ອງເຫຼົ່ານີ້ ເຮົາຄວນຄິດຢ່າງລະອຽດກ່ຽວກັບສະພາບການຂອງຕົວເອງແລະອະທິດຖານຂໍໃຫ້ພະເຢໂຫວາຊ່ວຍ. ການເຮັດແບບນີ້ອາດຈະໃຊ້ເວລາ ແຕ່ຖ້າເຮົາຢາກຕັດສິນໃຈຢ່າງສຸຂຸມເຮົາຕ້ອງໄວ້ວາງໃຈພະເຢໂຫວາ ຟັງຄຳແນະນຳຈາກພະອົງ ແລະເຮັດຕາມການຊີ້ນຳນັ້ນ. (ສຸພາສິດ 1:5) ໃນຄຳພີໄບເບິນມີຄຳແນະນຳທີ່ດີທີ່ສຸດຈາກພະເຢໂຫວາ ດັ່ງນັ້ນ ການຄົ້ນຄວ້າແລະການອະທິດຖານເພື່ອຂໍການຊີ້ນຳຈາກພະອົງຈຶ່ງເປັນເລື່ອງທີ່ສຳຄັນ. ພະເຢໂຫວາສາມາດຊ່ວຍເຮົາໃຫ້ມີຄຸນລັກສະນະຕ່າງໆເພື່ອຕັດສິນໃຈແບບທີ່ສອດຄ່ອງກັບຈຸດປະສົງຂອງພະອົງ. ກ່ອນຈະຕັດສິນໃຈໃນເລື່ອງທີ່ສຳຄັນ ເຮົາຄວນຖາມຕົວເອງວ່າ: ‘ການຕັດສິນໃຈແບບນີ້ສະແດງໃຫ້ເຫັນວ່າຂ້ອຍຮັກພະເຢໂຫວາບໍ? ການຕັດສິນໃຈແບບນີ້ຈະເຮັດໃຫ້ຄອບຄົວຂ້ອຍມີຄວາມສະຫງົບແລະມີຄວາມສຸກບໍ? ການຕັດສິນໃຈແບບນີ້ຈະສະແດງໃຫ້ເຫັນບໍວ່າຂ້ອຍເປັນຄົນອົດທົນແລະກະລຸນາ?’
18. ເປັນຫຍັງພະເຢໂຫວາຈຶ່ງຄາດໝາຍໃຫ້ເຮົາຕັດສິນໃຈເອງ?
18 ພະເຢໂຫວາບໍ່ໄດ້ບັງຄັບເຮົາໃຫ້ຮັກແລະຮັບໃຊ້ພະອົງ ແຕ່ເຮົາສາມາດເລືອກເອງ. ເນື່ອງຈາກພະເຢໂຫວາໃຫ້ເຮົາມີສິດໃນການເລືອກ ດັ່ງນັ້ນ ບໍ່ວ່າເຮົາຈະຮັບໃຊ້ພະອົງຫຼືບໍ່ກໍຕາມ ພະອົງນັບຖືສິດແລະຄວາມຮັບຜິດຊອບຂອງເຮົາທີ່ຈະເລືອກເອງ. (ໂຢຊວຍ 24:15; ຜູ້ເທສະໜາປ່າວປະກາດ 5:4) ແຕ່ພະເຢໂຫວາກໍຄາດໝາຍໃຫ້ເຮົາເຮັດຕາມສິ່ງທີ່ຕັດສິນໃຈໄວ້ແລ້ວໂດຍໃຊ້ຫຼັກການໃນຄຳພີໄບເບິນ. ເມື່ອເຮົາໝັ້ນໃຈໃນການຊີ້ນຳຈາກພະອົງແລະໃຊ້ຫຼັກການຕ່າງໆຂອງພະອົງ ເຮົາກໍຈະຕັດສິນໃຈໄດ້ຢ່າງສຸຂຸມ. ນອກຈາກນັ້ນ ເຮົາຍັງຈະສະແດງໃຫ້ເຫັນວ່າເຮົາເປັນຄົນທີ່ໝັ້ນຄົງໃນທາງຂອງເຮົາ.—ຢາໂກໂບ 1:5-8; 4:8
