ຄື​ທີ່​ເຫັນ​ໃນ​ຮູບ​ທາງ​ຂວາ​ມື ຫຼາຍ​ຄົນ​ຄິດ​ວ່າ​ໃນ​ວັນ​ພິພາກສາ​ຜູ້​ຄົນ​ຫຼາຍ​ພັນ​ລ້ານ​ຄົນ​ຈະ​ຖືກ​ນຳ​ມາ​ຢືນ​ຢູ່​ຕໍ່​ໜ້າ​ບັນລັງ​ຂອງ​ພະເຈົ້າ​ເພື່ອ​ຮັບ​ການ​ພິພາກສາ​ຕາມ​ການ​ກະທຳ​ຂອງ​ເຂົາເຈົ້າ​ໃນ​ອະດີດ. ບາງ​ຄົນ​ຈະ​ໄດ້​ຮັບ​ລາງວັນ​ທີ່​ຈະ​ມີ​ຊີວິດ​ໃນ​ສະຫວັນ ສ່ວນ​ຄົນ​ອື່ນ​ໆ​ຈະ​ຖືກ​ທໍລະມານ​ໃນ​ນາລົກ. ແຕ່​ຄຳພີ​ໄບເບິນ​ບອກ​ໃຫ້​ຮູ້​ວ່າ​ວັນ​ພິພາກສາ​ເປັນ​ວັນ​ທີ່​ຈະ​ຊ່ວຍ​ໃຫ້​ມະນຸດ​ລອດ​ຈາກ​ຄວາມ​ບໍ່​ຍຸຕິທຳ. (ເພງ​ສັນລະເສີນ 96:13) ພະເຈົ້າ​ໄດ້​ແຕ່ງຕັ້ງ​ພະ​ເຢຊູ​ໃຫ້​ເປັນ​ຜູ້​ພິພາກສາ​ເພື່ອ​ເຮັດ​ໃຫ້​ສັງຄົມ​ມະນຸດ​ມີ​ຄວາມ​ຍຸຕິທຳ​ອີກ​ເທື່ອ​ໜຶ່ງ.—ອ່ານ​ເອຊາຢາ 11:1-5; ກິດຈະການ 17:31

ເມື່ອ​ອາດາມ​ມະນຸດ​ຄົນ​ທຳອິດ​ຕັ້ງໃຈ​ກະບົດ​ຕໍ່​ພະເຈົ້າ ລາວ​ເຮັດ​ໃຫ້​ລູກ​ຫຼານ​ຂອງ​ລາວ​ທຸກ​ຄົນ​ຕ້ອງ​ກາຍ​ເປັນ​ທາດ​ຂອງ​ບາບ ຄວາມ​ທຸກ​ແລະ​ຄວາມ​ຕາຍ. (ໂຣມ 5:12) ເພື່ອ​ຈະ​ແກ້ໄຂ​ຄວາມ​ບໍ່​ຍຸຕິທຳ​ນີ້ ພະ​ເຢຊູ​ຈະ​ປຸກ​ຫຼາຍ​ລ້ານ​ຄົນ​ທີ່​ຕາຍ​ໄປ​ໃຫ້​ກັບ​ມາ​ມີ​ຊີວິດ​ອີກ. ປຶ້ມ​ພະ​ນິມິດ​ເປີດເຜີຍ​ວ່າ​ພະ​ເຢຊູ​ຄລິດ​ຈະ​ເຮັດ​ແບບ​ນັ້ນ​ໃນ​ຊ່ວງ​ໜຶ່ງ​ພັນ​ປີ​ທີ່​ເພິ່ນ​ປົກຄອງ.—ອ່ານ​ພະ​ນິມິດ 20:4, 11, 12

ຄົນ​ທີ່​ຟື້ນ​ຄືນ​ມາ​ຈາກ​ຕາຍ​ຈະ​ບໍ່​ຖືກ​ພິພາກສາ​ຕາມ​ການ​ກະທຳ​ຂອງ​ລາວ​ກ່ອນ​ຕາຍ. ແຕ່​ພະ​ນິມິດ​ບົດ 20 ບອກ​ວ່າ ເຂົາເຈົ້າ​ຈະ​ຖືກ​ພິພາກສາ​ຕາມ​ການ​ກະທຳ​ຂອງ​ຕົວເອງ ຫຼັງ​ຈາກ​ທີ່​ຂໍ້​ຄວາມ​ໃນ “ມ້ວນ​ໜັງສື” ຫຼື​ຂໍ້​ກຳນົດ​ເພີ່ມ​ເຕີມ​ຈາກ​ພະເຈົ້າ​ຖືກ​ເປີດເຜີຍ​ແລ້ວ. (ໂຣມ 6:7) ອັກຄະສາວົກ​ໂປໂລ​ບອກ​ວ່າ “ທັງ​ຄົນ​ດີ​ແລະ​ຄົນ​ຊົ່ວ​ຈະ​ຄືນ​ມາ​ຈາກ​ຕາຍ” ແລະ​ມີ​ໂອກາດ​ໄດ້​ຮຽນ​ຮູ້​ກ່ຽວກັບ​ພະເຈົ້າ.—ອ່ານ​ກິດຈະການ 24:15

ຄົນ​ທີ່​ຕາຍ​ໄປ​ໂດຍ​ທີ່​ຍັງ​ບໍ່​ຮູ້​ຈັກ​ພະ​ເຢໂຫວາ​ພະເຈົ້າ​ແລະ​ຮັບໃຊ້​ເພິ່ນ​ຈະ​ມີ​ໂອກາດ​ໄດ້​ປ່ຽນແປງ​ແນວ​ທາງ​ຊີວິດ​ແລະ​ເຮັດ​ສິ່ງ​ທີ່​ຖືກຕ້ອງ. ຖ້າ​ລາວ​ເຮັດ​ແບບ​ນັ້ນ​ລາວ​ຈະ “ຄືນ​ມາ​ແລ້ວ​ໄດ້​ຊີວິດ.” ແຕ່​ບາງ​ຄົນ​ທີ່​ຄືນ​ມາ​ຈາກ​ຕາຍ​ແລ້ວ​ບໍ່​ຕ້ອງການ​ທີ່​ຈະ​ຮຽນ​ຮູ້​ກ່ຽວກັບ​ແນວ​ທາງ​ຂອງ​ພະ​ເຢໂຫວາ​ຈະ “ຄືນ​ມາ​ແລ້ວ​ຖືກ​ຕັດສິນ.”—ອ່ານ​ໂຢຮັນ 5:28, 29; ເອຊາຢາ 26:10; 65:20

ຕອນ​ສິ້ນ​ສຸດ​ຂອງ​ວັນ​ພິພາກສາ​ເຊິ່ງ​ໃຊ້​ເວລາ​ດົນ​ເຖິງ​ໜຶ່ງ​ພັນ​ປີ ພະ​ເຢໂຫວາ​ຈະ​ຊ່ວຍ​ໃຫ້​ມະນຸດ​ທີ່​ເຊື່ອຟັງ​ກັບ​ຄືນ​ສູ່​ຄວາມ​ສົມບູນແບບ​ຄື​ທີ່​ເຄີຍ​ເປັນ​ໃນ​ຕອນ​ທຳອິດ. (1 ໂກຣິນໂທ 15:24-28) ເປັນ​ຄວາມ​ຫວັງ​ທີ່​ດີ​ແທ້​ໆ ສຳລັບ​ທຸກ​ຄົນ​ທີ່​ເຊື່ອຟັງ! ໃນ​ການ​ທົດສອບ​ຄັ້ງ​ສຸດທ້າຍ ພະເຈົ້າ​ຈະ​ປ່ອຍ​ຊາຕານ​ພະຍາມານ​ອອກ​ຈາກ​ເຫວ​ເລິກ​ຫຼັງ​ຈາກ​ທີ່​ຂັງ​ມັນ​ໄວ້​ໜຶ່ງ​ພັນ​ປີ. ມັນ​ຈະ​ພະຍາຍາມ​ຫຼອກລວງ​ຜູ້​ຄົນ​ໃຫ້​ຖິ້ມ​ພະ​ເຢໂຫວາ​ອີກ​ເທື່ອ​ໜຶ່ງ ແຕ່​ຄົນ​ທີ່​ບໍ່​ຍອມ​ເຮັດ​ຕາມ​ຊາຕານ​ຈະ​ໄດ້​ຢູ່​ເທິງ​ແຜ່ນດິນ​ໂລກ​ຢ່າງ​ມີ​ຄວາມ​ສຸກ​ຕະຫຼອດ​ໄປ.—ອ່ານ​ເອຊາຢາ 25:8; ພະ​ນິມິດ 20:7-9

ຄຳ​ວ່າ “ວັນ​ພິພາກສາ” ໃນ​ຄຳພີ​ໄບເບິນ​ຍັງ​ໝາຍເຖິງ​ອີກ​ເຫດການ​ໜຶ່ງ ເຊິ່ງ​ຈະ​ເຮັດ​ໃຫ້​ສະໄໝ​ປັດຈຸບັນ​ເຖິງ​ຈຸດຈົບ. ວັນ​ພິພາກສາ​ນີ້​ຈະ​ເກີດຂຶ້ນ​ຢ່າງ​ກະທັນຫັນ​ຄື​ກັບ​ນ້ຳຖ້ວມ​ໂລກ​ສະໄໝ​ໂນອາ​ທີ່​ກວາດ​ລ້າງ​ຄົນ​ຊົ່ວ​ໃນ​ສະໄໝ​ນັ້ນ​ໄປ​ຈົນ​ໝົດ. ໜ້າ​ດີໃຈ​ທີ່​ການ​ພິພາກສາ “ຄົນ​ທີ່​ໝິ່ນ​ປະໝາດ​ພະເຈົ້າ” ທີ່​ໃກ້​ເຂົ້າ​ມາ​ນີ້​ຈະ​ເປັນ​ການ​ຈັດ​ກຽມ​ແຜ່ນດິນ​ໂລກ​ໃຫ້​ພ້ອມ​ສຳລັບ​ສັງຄົມ​ໃໝ່ ເຊິ່ງ​ຈະ​ມີ “ຄວາມ​ຍຸຕິທຳ​ຕະຫຼອດ​ໄປ.”—ອ່ານ 2 ເປໂຕ 3:6, 7, 13