ຄຳພີໄບເບິນປ່ຽນຊີວິດຄົນ
ຂ້ອຍບໍ່ຢາກຕາຍ!
ປີເກີດ 1964
ປະເທດບ້ານເກີດ ອັງກິດ
ອະດີດ ເດັກນ້ອຍໃຈແຕກທີ່ຖືພາຕັ້ງແຕ່ໄວລຸ້ນ
ຊີວິດທີ່ຜ່ານມາ
ຂ້ອຍເກີດຢູ່ແພດດິງຕັນ ເຂດທີ່ຜູ້ຄົນຢູ່ຢ່າງໜາແໜ້ນໃນເມືອງລອນດອນ ປະເທດອັງກິດ. ຂ້ອຍຢູ່ກັບແມ່ແລະເອື້ອຍ 3 ຄົນ. ສ່ວນພໍ່ກໍຕິດເຫຼົ້າເລີຍບໍ່ຄ່ອຍໄດ້ຢູ່ກັບພວກເຮົາປານໃດ.
ຕອນຍັງນ້ອຍ ແມ່ບອກໃຫ້ຂ້ອຍອະທິດຖານກ່ອນນອນທຸກຄືນ. ຂ້ອຍມີຄຳພີໄບເບິນຫົວນ້ອຍໆທີ່ມີແຕ່ປຶ້ມຄຳເພງ ຂ້ອຍເລີຍໃຊ້ເນື້ອຫາຂອງປຶ້ມຄຳເພງມາຮ້ອງເປັນເພງໂດຍແຕ່ງທຳນອງເອົາເອງ. ຂ້ອຍຈື່ໄດ້ວ່າເຄີຍອ່ານປຶ້ມທີ່ຂາຍທົ່ວໄປຫົວໜຶ່ງແລະຝັງໃຈກັບຂໍ້ຄວາມໃນນັ້ນທີ່ບອກວ່າ: “ມື້ໃດມື້ໜຶ່ງຈະບໍ່ມີມື້ອື່ນອີກຕໍ່ໄປ.” ຂໍ້ຄວາມນັ້ນເຮັດໃຫ້ຂ້ອຍນອນຄິດໝົດຄືນກ່ຽວກັບອະນາຄົດ. ຂ້ອຍຄິດວ່າ ‘ຊີວິດຄົນເຮົາຕ້ອງມີຫຍັງຫຼາຍກວ່ານີ້. ຂ້ອຍເກີດມາເຮັດຫຍັງຖ້າມື້ໃດມື້ໜຶ່ງກໍຕ້ອງຕາຍ?’ ຂ້ອຍບໍ່ຢາກຕາຍ!
ຂ້ອຍເລີ່ມຢາກຮູ້ຢາກເຫັນເລື່ອງສິ່ງເລິກລັບ. ຂ້ອຍເລີຍພະຍາຍາມຕິດຕໍ່ກັບວິນຍານຄົນຕາຍ ໄປຕາມບ່ອນຝັງສົບກັບໝູ່ ແລະເບິ່ງໜັງຜີນຳກັນ. ພວກເຮົາຄິດວ່າເລື່ອງພວກນີ້ທັງມ່ວນທັງຕື່ນເຕັ້ນແລະເປັນຕາຢ້ານ.
ຂ້ອຍເລີ່ມໃຊ້ຊີວິດເສເພຕອນອາຍຸພຽງແຕ່ 10 ປີ. ຂ້ອຍລອງສູບຢາ ແລ້ວກໍຕິດຢ່າງໄວວາ. ຕໍ່ມາ ຂ້ອຍປ່ຽນໄປສູບກັນຊາ. ແລ້ວເມື່ອອາຍຸ 11 ປີ ຂ້ອຍກໍເລີ່ມກິນເຫຼົ້າ. ຂ້ອຍບໍ່ຄ່ອຍມັກລົດຊາດຂອງມັນດອກ ແຕ່ມັກຕອນທີ່ໄດ້ເມົາ. ຂ້ອຍມັກດົນຕີແລະມັກເຕັ້ນນຳ ກໍເລີຍໄປງານລ້ຽງແລະທ່ຽວກາງຄືນເລື້ອຍໆ. ຂ້ອຍຈະລັກອອກໄປຕອນເດິກໆແລະລັກເຂົ້າເຮືອນກ່ອນຈະເຊົ້າ. ເມື່ອຮອດຕອນເຊົ້າ ກໍໂຕນຮຽນຍ້ອນໄປຮຽນບໍ່ໄຫວ. ແຕ່ຖ້າມື້ໃດໄປໄຫວ ກໍຈະລັກກິນເຫຼົ້າລະຫວ່າງປ່ຽນຊົ່ວໂມງຮຽນ.
ຂ້ອຍຈົບມາແບບຄະແນນສະເລ່ຍບໍ່ຄ່ອຍດີປານໃດ ເລີຍເຮັດໃຫ້ແມ່ຜິດຫວັງແລະໃຈຮ້າຍຫຼາຍຍ້ອນແມ່ບໍ່ຮູ້ວ່າປົກກະຕິຂ້ອຍເສເພສ່ຳໃດ. ພວກເຮົາຜິດກັນ ຂ້ອຍເລີຍໜີອອກຈາກເຮືອນແລ້ວໄປຢູ່ກັບແຟນຊື່ໂທນີໄລຍະໜຶ່ງ. ໂທນີເປັນສະມາຊິກລັດທິຣາດສ໌ຕາຟາຣີ. ລາວມັກເຮັດຜິດກົດໝາຍແລະຍັງຄ້າຢານຳ ຜູ້ໃດກໍຮູ້ວ່າລາວເປັນພວກມັກໃຊ້ຄວາມຮຸນແຮງ. ບໍ່ດົນຂ້ອຍກໍຖືພາແລະເກີດລູກຊາຍຕອນອາຍຸ 16 ປີ.
ຄຳພີໄບເບິນປ່ຽນຊີວິດຂ້ອຍແນວໃດ
ຕໍ່ມາ ຂ້ອຍໄປຢູ່ເຮືອນພັກຂອງລັດຖະບານທີ່ຈັດໄວ້ສຳລັບຜູ້ຍິງຖືພາໂດຍບໍ່ໄດ້ແຕ່ງດອງ. ຂ້ອຍໄດ້ເຈິພະຍານພະເຢໂຫວາເທື່ອທຳອິດຢູ່ຫັ້ນ. ຍ້ອນມີພະຍານພະເຢໂຫວາ 2 ຄົນມາຫາພວກຜູ້ຍິງທີ່ມີລູກຕັ້ງແຕ່ໄວລຸ້ນເປັນປະຈຳ. ມື້ໜຶ່ງຂ້ອຍກໍເຂົ້າໄປນັ່ງຟັງນຳ. ຂ້ອຍຕັ້ງໃຈຈະໄປຈັບຜິດພວກພະຍານ. ແຕ່ເຂົາເຈົ້າພັດຕອບຄຳຖາມຫຼາຍຂໍ້ຂອງຂ້ອຍຢ່າງໃຈເຢັນແລະຈະແຈ້ງໂດຍໃຊ້ຄຳພີໄບເບິນ. ຂ້ອຍມັກທີ່ເຂົາເຈົ້າໃຈດີແລະອ່ອນໂຍນຫຼາຍ. ຂ້ອຍກໍເລີຍຕັດສິນໃຈສຶກສາຄຳພີໄບເບິນກັບເຂົາເຈົ້າ.
ຕໍ່ມາ ຂ້ອຍໄດ້ຮຽນເລື່ອງໜຶ່ງຈາກຄຳພີໄບເບິນທີ່ປ່ຽນຊີວິດ. ຕັ້ງແຕ່ຍັງນ້ອຍ ຂ້ອຍຢ້ານຕາຍມາຕະຫຼອດ. ແຕ່ຕອນນີ້ຂ້ອຍໄດ້ຮູ້ເລື່ອງທີ່ພະເຢຊູສອນວ່າຈະມີການຄືນມາຈາກຕາຍ! (ໂຢຮັນ 5:28, 29) ແລະຍັງຮູ້ອີກວ່າພະເຢໂຫວາຫ່ວງໃຍຂ້ອຍແທ້ໆ. (1 ເປໂຕ 5:7) ຂ້ອຍປະທັບໃຈຂໍ້ຄວາມຈາກເຢເຣມີ 29:11, ລ.ມ. ຫຼາຍ ຂໍ້ນັ້ນ “ພະເຢໂຫວາບອກວ່າ ‘ເພາະເຮົາຮູ້ວ່າເຮົາຈະເຮັດຫຍັງໃຫ້ພວກເຈົ້າ ເຮົາຈະໃຫ້ພວກເຈົ້າມີສັນຕິສຸກ ບໍ່ຕ້ອງເຈິຫາຍະນະ ແລະພວກເຈົ້າຈະມີອະນາຄົດທີ່ດີແລະມີຄວາມຫວັງ.’” ຂ້ອຍເລີຍເລີ່ມເຊື່ອວ່າຂ້ອຍຈະມີຊີວິດຕະຫຼອດໄປໃນໂລກທີ່ເປັນສວນອຸທິຍານໄດ້.—ຄຳເພງ 37:29
ພວກພະຍານພະເຢໂຫວາຮັກແລະຈິງໃຈຕໍ່ຂ້ອຍ. ຕອນໄປປະຊຸມກັບເຂົາເຈົ້າເທື່ອທຳອິດ ຂ້ອຍໄດ້ຮັບການຕ້ອນຮັບຢ່າງອົບອຸ່ນ ທຸກຄົນເປັນກັນເອງຫຼາຍ! (ໂຢຮັນ 13:34, 35) ບັນຍາກາດຈັ່ງແມ່ນຕ່າງຈາກໂບດແຖວເຮືອນທີ່ຂ້ອຍເຄີຍໄປແທ້ໆ. ພະຍານຕ້ອນຮັບຂ້ອຍບໍ່ວ່າຂ້ອຍຈະເປັນແນວໃດ. ເຂົາເຈົ້າໃຫ້ເວລາ ຫ່ວງໃຍ ແລະສົນໃຈຂ້ອຍ ແລະຍັງໃຫ້ຄວາມຊ່ວຍເຫຼືອທີ່ຈຳເປັນນຳ. ຂ້ອຍຮູ້ສຶກຄືໄດ້ເປັນສ່ວນໜຶ່ງຂອງຄອບຄົວໃຫຍ່ທີ່ຮັກກັນ.
ເມື່ອໄດ້ຮຽນຄຳພີໄບເບິນ ຂ້ອຍກໍຮູ້ວ່າຕ້ອງປ່ຽນແປງຫຼາຍຢ່າງໃນຊີວິດເພື່ອໃຫ້ເປັນໄປຕາມມາດຕະຖານຂອງພະເຈົ້າ. ແຕ່ການເຊົາສູບຢາມັນຍາກຫຼາຍ. ນອກຈາກນັ້ນ ຂ້ອຍຍັງຕ້ອງປ່ຽນໄປຟັງເພງແບບອື່ນນຳ ຍ້ອນບາງເພງທີ່ເຄີຍຟັງກະຕຸ້ນໃຫ້ຢາກສູບກັນຊາ. ແລະຂ້ອຍກໍຕ້ອງເຊົາກິນເຫຼົ້ານຳ ຂ້ອຍເລີຍບໍ່ໄປງານລ້ຽງແລະບໍ່ທ່ຽວກາງຄືນອີກ ຍ້ອນໄປເທື່ອໃດກໍຢາກກິນໃຫ້ເມົາທຸກເທື່ອ. ຂ້ອຍເລີ່ມຄົບໝູ່ໃໝ່ທີ່ຊ່ວຍສະໜັບສະໜູນໃຫ້ໃຊ້ຊີວິດຕາມແນວທາງທີ່ຕັ້ງໃຈໄວ້ໄດ້.—ສຸພາສິດ 13:20
ໃນຊ່ວງນັ້ນໂທນີກໍສຶກສາຄຳພີໄບເບິນກັບພະຍານພະເຢໂຫວານຳ. ພະຍານຕອບຄຳຖາມຫຼາຍຂໍ້ຂອງລາວໂດຍໃຊ້ຄຳພີໄບເບິນ ລາວເລີຍໝັ້ນໃຈໃນຄວາມຈິງທີ່ໄດ້ຮຽນຄືກັນ. ລາວຈຶ່ງເຮັດການປ່ຽນແປງຄັ້ງໃຫຍ່ໃນຊີວິດ ເຊັ່ນ: ລາວເຊົາຄົບຫາກັບໝູ່ທີ່ມັກໃຊ້ຄວາມຮຸນແຮງ ເຊົາເຮັດຜິດກົດໝາຍ ແລະເຊົາສູບກັນຊາ. ເຮົາຢາກເຮັດໃຫ້ພະເຢໂຫວາພໍໃຈຢ່າງເຕັມທີນຳ ເຮົາທັງສອງກໍເລີຍຄິດວ່າຕ້ອງໃຊ້ຊີວິດໃຫ້ຖືກຕ້ອງຕາມມາດຕະຖານທາງສິນລະທຳແລະຕ້ອງລ້ຽງລູກໃຫ້ໃຫຍ່ຂຶ້ນມາໃນສະພາບແວດລ້ອມທີ່ໝັ້ນຄົງ. ພວກເຮົາຈຶ່ງແຕ່ງດອງກັນໃນປີ 1982.
“ຂ້ອຍບໍ່ຕ້ອງນອນຄິດໝົດຄືນຍ້ອນກັງວົນກ່ຽວກັບອະນາຄົດແລະຄວາມຕາຍອີກຕໍ່ໄປແລ້ວ”
ຊ່ວງນັ້ນຂ້ອຍຊອກຫາຂໍ້ມູນຈາກບົດຄວາມໃນວາລະສານຫໍສັງເກດການແລະຕື່ນເຖີດ! * ທີ່ມີເລື່ອງຂອງຜູ້ຄົນທີ່ສາມາດປ່ຽນແປງຊີວິດຂອງເຂົາເຈົ້າໄດ້ສຳເສັດຄືທີ່ຂ້ອຍຢາກເຮັດ. ຂ້ອຍໄດ້ກຳລັງໃຈຫຼາຍ! ຕົວຢ່າງຂອງເຂົາເຈົ້າເຮັດໃຫ້ຂ້ອຍມີແຮງສູ້ຕໍ່ໄປແລະບໍ່ຍອມແພ້. ຂ້ອຍອະທິດຖານຢູ່ຕະຫຼອດຂໍພະເຢໂຫວາຢ່າໝົດຫວັງໃນໂຕຂ້ອຍ. ໃນທີ່ສຸດ ຂ້ອຍກັບໂທນີຮັບບັບເຕມາເພື່ອຈະເປັນພະຍານພະເຢໂຫວາໃນເດືອນກໍລະກົດ ປີ 1982.
ປະໂຫຍດທີ່ໄດ້ຮັບ
ການໄດ້ຮູ້ຈັກແລະມີຄວາມສຳພັນທີ່ດີກັບພະເຢໂຫວາພະເຈົ້າຊ່ວຍຊີວິດຂ້ອຍໄວ້. ຂ້ອຍກັບໂທນີຜ່ານຫຼາຍເລື່ອງລາວທີ່ເຮັດໃຫ້ເຫັນວ່າພະເຢໂຫວາບໍ່ເຄີຍຖິ້ມພວກເຮົາເມື່ອເຈິຄວາມຍາກລຳບາກເຊິ່ງເຮັດໃຫ້ເຮົາຮຽນຮູ້ທີ່ຈະໄວ້ວາງໃຈພະເຈົ້າ. ເຮົາຮູ້ສຶກວ່າເພິ່ນຊ່ວຍເຫຼືອແລະເບິ່ງແຍງຄອບຄົວຂອງເຮົາສະເໝີ.—ຄຳເພງ 55:22
ຂ້ອຍດີໃຈທີ່ໄດ້ຊ່ວຍລູກຊາຍກັບລູກສາວໃຫ້ຮູ້ຈັກພະເຢໂຫວາຄືກັບຂ້ອຍ. ແລະຕອນນີ້ຂ້ອຍກໍດີໃຈຫຼາຍທີ່ໄດ້ເຫັນຫຼານກຳລັງຮຽນຮູ້ເລື່ອງພະເຈົ້ານຳ.
ຂ້ອຍບໍ່ຕ້ອງນອນຄິດໝົດຄືນຍ້ອນກັງວົນກ່ຽວກັບອະນາຄົດແລະຄວາມຕາຍອີກຕໍ່ໄປແລ້ວ. ທຸກອາທິດຂ້ອຍກັບໂທນີຫຍຸ້ງຢູ່ກັບການເດີນທາງໄປປະຊາຄົມຕ່າງໆຂອງພະຍານພະເຢໂຫວາ ເພື່ອໃຫ້ກຳລັງໃຈແລະເຮັດວຽກຮ່ວມກັບເຂົາເຈົ້າໃນການສອນຜູ້ຄົນໃຫ້ສະແດງຄວາມເຊື່ອໃນພະເຢຊູ ເຊິ່ງຄວາມເຊື່ອນີ້ຈະເຮັດໃຫ້ມີໂອກາດໄດ້ຮັບຊີວິດຕະຫຼອດໄປ.
^ ຂໍ້ 19 ຈັດພິມໂດຍພະຍານພະເຢໂຫວາ.
ເລື່ອງທີ່ເຈົ້າອາດຈະມັກ
ກ່ຽວກັບເຮົາ
ເປັນຫຍັງຈຶ່ງສຶກສາຄຳພີໄບເບິນ?
ຄຳພີໄບເບິນໄດ້ຊ່ວຍຫຼາຍລ້ານຄົນທົ່ວໂລກໃຫ້ໄດ້ຮັບຄຳຕອບທີ່ສຳຄັນໃນຊີວິດ. ທ່ານຢາກເປັນຜູ້ໜຶ່ງໃນນັ້ນບໍ?
