Bababaliwa feela kuli ki Lipaki za Jehova ki babakutazanga taba yende ya Mubuso wa Mulimu kweli ni kweli. (Mateu 24:14) Palo yeo ikopanyeleza batu babakolobelizwe sina Lipaki za Jehova, ni batu babasika kolobezwa, ili babakwanisize zetokwahala kuli bakutaze.

 Batili. Mutu hatokwi kulifa masheleñi kuli abe yomuñwi wa Lipaki za Jehova kamba kuli afiwe musebezi omuñwi mwa kopano yaluna. (Likezo 8:18-20) Mane babafanga linubu hababatangi kuzibiwa. Paki ni Paki ufananga nako yahae, maata ahae, ni maluwo ahae kuli atuse mwa musebezi waluna wa mwa lifasi kaufela kulikana ni mwaatulezi mwa pilu yahae ni muinelo wali ku ona.​—2 Makorinte 9:7.

 Kweli ni kweli, Lipaki balukisanga piho ya musebezi wa kukutaza obaezize, ni kufa piho yeo kwa puteho yebaswalisana ni yona. Bafanga piho yeo kusina kuhapelezwa.

 Lipiho zezwa kwa batu mwa puteho zakopanyiwanga hamoho, mi palo kaufela ilumelwanga kwa ofisi ya mutai yezamaisa musebezi mwa naha. Ofisi ya mutai yona ilumelanga palo kaufela ya lipiho za naha kamba kalulo yeokamelwa ki mutai wo, kwa ofisi yezamaisa musebezi mwa lifasi kaufela.

 Kwa mafelelezo a silimo ni silimo sa sebelezo, a palo yetuna ya Lipaki babafumaneha mwa naha ni naha mwa silimo seo yazibahalanga. Lipalo zeo zakopanyiwanga hamoho kuli kuzibahale kuli ki Lipaki za Jehova babakai babafumaneha mwa lifasi kaufela. Lipiho zebonisa zepetilwe mwa naha ni naha, kukopanyeleza cwalo ni zebakopani ni zona bakutazi mwa musebezi wa kukutaza, zañolwanga mwa buka ya Yearbook of Jehovah’s Witnesses. Lipiho zeo zalususuezanga, sina feela lipiho zeswana hane lisusuelize Bakreste ba mwa linako za baapositola.​—Likezo 2:41; 4:4; 15:3.

 Halubalangi batu babacwalo kuli ki babañwi ba Lipaki za Jehova, kono lwabaamuhelanga mwa liputeho zaluna. Buñata bwa batu babacwalo bafumanehanga kwa mukopano oezwanga ka silimo wa Kupuzo ya lifu la Kreste, mi palo yabona yazibahalanga ka kubapanya palo ya Lipaki kaufela mwa lifasi ni palo ya batu babafumanehile kwa mukopano wo. Ka silimo sa 2023, palo kaufela ya batu bane bafumanehile kwa Kupuzo neli 20,461,767.

 Batu babañata babasa fumanehangi kwa mikopano yaluna batusiwanga ki tukiso yaluna yesalifelwi ya kuituta Bibele. Ka silimo sa 2023, neluzamaisize lituto za Bibele ze 7,281,212 kweli ni kweli ka avareji, mi zeñwi za lituto zeo neli za kuzamaisa kwa likwata za batu babañata babaituta ka nako yeswana.

 Hañata maluko a muuso aabalanga batu, afumananga lipalo zaona ka kubuza batu bulapeli bobaswalisana ni bona. Ka mutala, ba liluko lelibona za sipalo kwa naha ya United States nebatalusize kuli nebaezize lipatisiso ka “kubuza batu bulapeli bobaswalisana ni bona,” mi nebaekelize kutalusa kuli lipalo zebanani zona lizwa fa “likalabo zene bafile batu isiñi fa buniti bwa taba.” Kono luna belubala kuli ki Lipaki za Jehova, ki batu feela babakutazanga ku babañwi ni bababihanga musebezi wabona wa kukutaza, isiñi feela babaipala kuli ki Lipaki za Jehova.