Watch Tower Bible and Tract Society of Pennsylvania ki kopano yenetomilwe mwa silimo sa 1884 ka kulatelela milao ya kopano ya Commonwealth of Pennsylvania mwa U.S.A., mi haki ya lipisinisi. Iitusiswa ki Lipaki za Jehova kwa kuzwisezapili musebezi wa mwa lifasi kaufela, okopanyeleza kuhatisa Libibele ni lihatiso zeñwi zetomile fa Bibele.

 Pampili yebonisa litukelo zayona za ka mulao italusa kuli mulelo wa kopano ye ki wa kuzwisezapili “bulapeli, kuluta batu, ni kueza misebezi yemiñwi ya kutusa batu babañwi,” kono musebezi wayona omutuna ki wa “kukutaza ni kuluta batu evangeli ya Mubuso wa Mulimu obusiwa ki Kreste Jesu.” Batu babali mwa kopano yeo bamemiwanga feela isiñi kuli bazwisanga hahulu linubu. Baba mwa kopano yeo ni bazamaisi bayona batusa Sitopa Sesietelela sa Lipaki za Jehova.

 Kwandaa kopano ya Watch Tower Bible and Tract Society of Pennsylvania, Lipaki za Jehova baitusisa likopano zeñwi za ka mulao zeñata-ñata mwa linaha zeshutana-shutana. Zeñwi za likopano zeo liekezanga linzwi la “Watch Tower,” “Watchtower” kwa libizo lazona kamba toloko ya yeñwi ya manzwi ao.

 Likopano za ka mulao zeshutana-shutana zeo lilutusize kupeta zeñata kuzwa feela nako yelitomiwa, zecwale ka ze latelela:

•   Kuñola ni kuhatisa. Luhatisize Libibele zebato eza 220 milioni ni lihatiso zetomile fa Bibele zebato eza 40 bilioni. Lihatiso zaluna lifumaneha mwa lipuo zefitelela 900. Batu bakona kuipalela Bibele fa webusaiti ya jw.org mwa lipuo zefitelela 160 kusina kulifa sesiñwi, mi bakona kufumana likalabo kwa lipuzo zecwale ka ye: “Mubuso wa Mulimu ki Nto Mañi?”

•   Kuluta batu. Lunani likolo zeshutana-shutana, ili ko batu baitutanga Bibele. Ka mutala, kuzwa feela ka 1943, Lipaki za Jehova bababato eza 9,000 bafilwe lituto zetungile kwa Sikolo sa Bibele sa Giliadi, ili nto yebakonisa kusebeza sina balumiwa kamba kuzwisezapili musebezi wa kukutaza mwa lifasi kaufela. Mi sunda ni sunda, batu babañata-ñata, kukopanyeleza cwalo ni batu babasi Lipaki, balutiwanga kwa mikopano yeeziwanga mwa liputeho zaluna kaufela. Hape lulutanga batu kubala ni kuñola, mi lulukisize buka yefumaneha mwa lipuo ze 120 yetusa batu kuziba kubala ni kuñola.

•   Kutusa batu babañwi. Lutusize batu babatahezwi ki likozi​—ibe kuli likozi zeo litahisizwe ki batu inge cwalo kozi yenebile teñi ka silimo sa 1994 mwa Rwanda, kamba likozi za ka taho, inge cwalo zikinyeho yenebile teñi ka silimo sa 2010 mwa Haiti.

 Nihaike kuli lupetile zeñata hahulu ka kutusiwa ki likopano zaluna za ka mulao, musebezi waluna hausika itinga fa likopano zeo. Mukreste kaufela unani buikalabelo bwa kupeta musebezi wafilwe ki Mulimu, ona wa kukutaza ni kuluta batu taba yende. (Mateu 24:14; 28:19, 20) Lulumela kuli Mulimu walutusa mwa musebezi wo, mi ukazwelapili ‘kuhulisa.’—1 Makorinte 3:6, 7.