Bo Danielle, babali Lipaki za Jehova babapila mwa naha ya South Africa, nebafumani mukotana wanaalibezi mutu yomuñwi mwa sintolo mokulekiswa kofi. Mwa mukotana wo nekunani sikwama mone kunani masheleñi ni makadi a kwa panga. Bo Danielle nebabata kufumana muñaa mukotana wo ilikuli bamukutiseze ona. Kacwalo, balika kubata keyala kamba nombolo yahae mwa mukotana wo, kono bafumana feela pepa fone kuñozwi libizo la muuna. Balika kubuza panga kwanaakwalulisize akaunti, kono bapalelwa kumufumana. Bo Danielle nebasika zwafa. Balizeza nombolo ya mualafi yeneli fa kapampili ka kwa sipatela kane bafumani mwa mukotana wo. Musali yanaasebeleza mwa sibaka sa kuamuhela baenyi kwa sipatela seo aalaba foni, mi ataluseza bo Danielle kuli naakafa nombolo yabona ku muñaa mukotana.

 Muuna yo naakomokile hahulu ba sipatela hane bamulizelize foni kumutaluseza kuli bo Danielle nebafumani mukotana wanaalatehisize, mi nebabata kumukutiseza ona. Haafitile kwa sipatela, akopana ni bo Danielle ni bo ndataa bona. Bo Danielle ni bo ndataa bona bataluseza muuna yo libaka hane baezize buikatazo bwa kumubata. Bamutaluseza kuli ka kuba Lipaki za Jehova, baeza mobakonela kaufela kupila ka kuya ka likuka za mwa Bibele. Ki lona libaka hababata kusepahala ka nako kaufela.—Maheberu 13:18.

 Lihoranyana kuzwa fo, muuna yo añolela bo Danielle ni bo ndataa bona lushango lwa kuitumela ku bona hape bakeñisa kumukutiseza mukotana wahae ni sikwama sahae. Naañozi cwana mwa lushango lwahae: “Niitumezi hahulu kwa buikatazo bomuezize bwa kunibata kufitela munifumana. Nenitabile hahulu kukopana ni mina ni lubasi lwamina mi nikazwelapili kumihupula bakeñisa silikani samina sesinde. Nibata kubonisa buitumelo bwaka ku mina ka kumifa nubu. Naziba kuli mwaitombolanga luli kuli musebeleze Mulimu. Likezo zamina libonisa kuli mu batu babande, babasepahala, mi ki zona zebaezize bo Danielle. Nisaitumela hape, haike Mulimu afuyaule musebezi wamina.”

 Likwelinyana kuzwa fo, muuna yo azibisa bo ndataa bona bo Danielle muinelo wanaaipumani ku ona nako yeñwi. Muuna yo naaile kwa sibaka sesiñwi kuyo leka lika zanaatokwa mi anopa sikwama sene siwiselizwe fafasi. Hasamulaho, afumana musali yanaalatehisize sikwama seo mi amutaluseza libaka hanaangile muhato wa kumutiseza sona. Muuna yo atalusa kuli naabata kukutisa sikwama seo bakeñisa kuli nakonyana kwamulaho, ni yena naalatehisize sikwama sahae sa masheleñi, mi mutu yomuñwi naamukutiselize sona. Naaize: “Kezo iliñwi yebonisa busepahali ikona kutahisa kuli babañwi ni bona babonise busepahali, mi batu kaufela mwa silalanda bakaba ni tabo.”