Lipaki za Jehova babapila mwa Bulgaria bapatehile mwa musebezi wa kuluta batu niti ka za Mulimu ni Linzwi lahae, yona Bibele. Mi kuzwa feela ka silimo sa 2000, Lipaki babañata-ñata babazwa mwa linaha lisili batutezi mwa Bulgaria kuli batusane ni bona. Ki bufi butata bobuñwi bobakopananga ni bona batu babatutela kwa naha isili kuyo sebeleza kwateñi? Ki bufi bunde bwa kueza cwalo? Halunyakisiseñi litaba zeñwi zene babulezi Bakreste bane batutezi kwa Bulgaria.

 Muzwale wa libizo la Darren yapila kwa England, utalusa kuli: “Kuzwa feela kwamulaho, neluitomezi sikonkwani sa kuyo sebeleza mwa naha isili, kwa sibaka kone kutokwahala hahulu bakutazi ba Mubuso. Hamulaho wa kunyalana ni bo Dawn, lwatutela kwa London kuli luyo tusa mwa musebezi wa kuluta Bibele mwa puo ya Sirussia. Nelubatanga kututela kwa naha isili, kono bakeñisa mabaka amañwi, nelupalezwi kueza cwalo. Nese luzwafile, kono cwale mulikanaa luna alutusa kulemuha kuli miinelo yaluna neicincize mi nelusa kona kutaleleza sikonkwani saluna.” Bo Darren ni bo Dawn bakala kubata naha kone kutokwahala hahulu bakutazi ba Mubuso, ili kone bakona luli kututela. Mwa silimo sa 2011, batutela kwa Bulgaria.

 Mitala yeminde ya mizwale ni likaizeli babanani tabo kabakala kusebeleza mwa naha isili, isusuelize hahulu Bakreste babañwi bane basika nahana za kueza cwalo. Bo Giada bane bapila kwa Italy ni bakubona bo Luca, batalusa kuli: “Nenikopani ni Lipaki za Jehova babanani tukufalelo, ili bane baikola kusebeleza Jehova kwa South America ni mwa Africa. Nenisusuelizwe hahulu ki tabo yene banani yona ni zebonwi zabona. Neba nitusize kuitomela likonkwani za kwa moya.”

 Muzwale wa libizo la Tomasz ni bakubona bo Veronika, nebatutile mwa Czech Republic kuya kwa Bulgaria mwa silimo sa 2015, hamoho ni bana babona bababeli bababizwa Klara ni Mathias. Ki lika mañi zenee basusuelize kututa? Bo Tomasz batalusa kuli: “Nelunyakisisize mitala ya batu babañwi ni bahabo luna bane baizo sebeleza kwa linaha lisili, ni kunahanisisa litaba zebonwi zabona. Nelususuelizwe hahulu ki tabo yene banani yona, mi lwaambola ka za teñi kwa ndu hamoho sina lubasi.” Ba mwa lubasi lo, cwale basebeleza mwa naha isili, ili mwa muleneñi wa Montana ofumaneha kwa Bulgaria.

 Bo Linda ki babañwi ba batu bane batutezi kwa naha ya Bulgaria. Batalusa kuli: “Lilimo zeñata kwamulaho, hane nipotezi naha ya Ecuador, nakopana ni Lipaki bane batutezi kwateñi kuli bayo kutaza. Taba yeo yatahisa kuli nikale kunahana kuli mwendi ni na muta omuñwi nikasebeleza kwa sibaka kokutokwahala hahulu bakutazi ba Mubuso.” Muzwale wa libizo la Petteri ni bakubona bo Nadja, ili babapila kwa Finland, ni bona nebanyakisisize mutala wa babañwi. Batalusa kuli: “Mwa puteho yeluswalisana ni yona, nekunani bahasanyi babañwi babayezi seli bane bayo sebeleza kwa libaka lisili kuli batuse batu kuziba niti ya mwa Bibele. Kamita, nebabulelanga ka mafulo-fulo habakandeka zene baikozi mwahalaa lilimo zene basebeleza kwa libaka zeo. Nebabulelanga kuli yeo neli yona nako yene banani tabo yetuna mwa bupilo.”

 Batu bababata kuyo sebeleza kwa naha isili baswanela pili kuitukiseza basika eza kale cwalo. (Luka 14:28-30) Kaizeli yabizwa Nele yapila kwa Belgium, utalusa kuli: “Hane nikalile kunahana hahulu ka za haiba nenika kona kuyo sebeleza mwa naha isili, nalapela ka za teñi mi nabata mwa lihatiso zaluna litaba zenebulela za kusebeleza mwa naha isili. Nanyakisisa litaba zeo ni kubona zene nitokwa kueza kuli nibe yaitukiselize kututa.”

 Muzwale yabizwa Kristian ni kaizeli yabizwa Irmina, ba kwa Poland, sebapilile mwa Bulgaria ka lilimo zefitelela 9. Balemuhile kuli kuswalisana ni sikwata sa batu bane baitusisa puo ya Sibulgaria mwa Poland basika tuta kale, neku batusize hahulu. Sikwata seo nesi basusuelize hahulu mi nesi batusize kuituta puo yeo. Bo Kristian ni bo Irmina batalusa kuli: “Neluiponezi kuli haiba mutu aitatela kusebeleza Jehova Mulimu, uka mutusa kufumana lika zatokwa; taba yeo yatabisa luli. Haiba mutaluseza Jehova kuli: ‘Ki na yo! Haku nilume!’ mukakona kueza lika zene musanahani kuli nemuka kona kueza.”—Isaya 6:8.”

 Bo mutu ni musalaa hae bo Reto ni bo musalaa bona bo Cornelia, ba kwa Switzerland, nebaikatulezi kunolofaza bupilo bwabona ilikuli baitukiseze kututa ni kubuluka masheleñi. Batalusa kuli: “Silimo silisiñwi pili lusika tuta kale, lwapotela naha ya Bulgaria ka sunda iliñwi kuli luzibe hande naha yeo. Teñi ko, lwaikambota ni bo mutu ni musalaa hae bane bali balumiwa babayezi seli, mi balufa kelezo yende.” Bo Reto ni bo Cornelia nebasebelisize liakalezo zene bafilwe, mi cwale sebasebelelize mwa naha ya Bulgaria ka lilimo zefitelela 20.

 Batu babatutela kwa naha isili batokwanga kutwaela miinelo yeminca mi fokuñwi mwendi bakona kukopana ni butata bobuñwi. (Likezo 16:9, 10; 1 Makorinte 9:19-23) Butata bobutuna bobakopananga ni bona batu babañata ki bwa kuituta puo isili. Bo Luca bababulezwi kwamulaho, batalusa kuli: “Kamita neluikolanga kufa likalabo zezwelela kwatasaa pilu haluli kwa mikopano ya puteho. Kono ka nakonyana, na ni bakuluna neku lubelanga taata kufa nihaiba kalabo iliñwi yebunolo mwa puo ya Sibulgaria! Nekuswana feela inge kuli nelukutezi kuba banana. Mane likalabo zene bafanga banana bane babulela puo yeo neli zende hahulu kufita zaluna.”

 Muzwale yabizwa Ravil, wa kwa Germany, naabulezi kuli: “Kuituta puo ya Sibulgaria nesi nto yebunolo. Kono neniipulelisanga kuli: ‘Usike wabilaela haueza mafosisa, ki mona mokuinezi mutu haituta puo.’ Haninze nisebeleza Jehova mwa naha isili, naziba kuli nikakopana ni butata, mi nikatokwa kutwaela miinelo yemiñwi, kacwalo hanizwafangi.”

 Bo Linda bababulezwi kwamulaho, batalusa kuli: “Kunibelanga taata kuituta puo isili. Haki nto yebunolo kuituta puo ya Sibulgaria, mi nibatile kuitulela kuituta yona hañata-ñata. Niikutwanga bulutu hanipalelwa kuambola ni batu ni kupalelwa kuutwisisa zebabulela. Kuli nitiise silikani saka ni Jehova, neniitutanga lika kaufela mwa Siswidishi. Hamulaho wa nako, ka tuso ya mizwale ni likaizeli, naituta puo ya Sibulgaria.”

 Butata bobuñwi bwakona kukopana ni bona mutu ki kutonda naha yahabo. Batu babatutelanga kusili, basiyanga bahabo bona ni balikani babona. Bo Eva bane batutezi kwa Bulgaria ni bakubona bo Yannis, batalusa kuli: “Kwa makalelo, neniikutwanga bulutu. Nto yenee lutusize ki kuambolanga ni balikani baluna hamohocwalo ni bahabo luna ba mwa naha yahabo, mi hape luezize silikani ni batu ba kwanu.”

 Hape kunani butata bobuñwi. Bo Robert ni bo Liana bane batutile kuzwa kwa Switzerland, batalusa kuli: “Neku lubezi taata kuituta puo ni sizo sa kwanu, mi nelusika libelela kuli kubata hahulu.” Niteñi, kuzwelapili kuba ni mubonelo oswanela kutusize bo mutu ni musalaa hae ba kuzwelapili kusebeleza mwa Bulgaria ka busepahali ka lilimo ze 14.

 Kaizeli yabizwa Lilly, utalusa kuli kusebeleza kwa sibaka kokutokwahala hahulu bakutazi ki nto yende hahulu. Uli: “Kusebeleza mwa naha isili kunitusize kuiponela hande mwatusezanga Jehova, mi mwendi nenisike naziba taba yeo kambe nenili mwa naha yahesu. Nisweli kueza monikonela kaufela kutusa babañwi, mi kueza cwalo kunitusa kuhula kwa moya ni kuba ni tabo mwa bupilo.” Bakubona bo Ravil ni bona baikutwa cwalo. Bali: “Bo ki bona bupilo bobunde ka kufitisisa, lunani kolo ya kuzibana ni Bakreste babanani tukufalelo ba mwa linaha zeshutana-shutana, ili babanani yeloseli mwa musebezi wa kuluta batu niti ya mwa Bibele. Niitutile lika zeñata ku bona.”

 Moya wa buitateli ni wa buitomboli obabonisize mizwale ni likaizeli babañata, utusize kuli musebezi wa kukutaza ‘taba yende ya Mubuso . . . mwa lifasi kaufela’ ukonde. (Mateu 24:14) Bakeñisa kuli nebaitatezi kutusa babañwi, mizwale ni likaizeli babatutezi mwa Bulgaria baiponezi mo Jehova abafezi zeilakaza pilu yabona ni kubatusa kukondisa milelo yabona kaufela.—Samu 20:1-4.