“Usike wasaba, kakuli niinzi ni wena. Usike wabilaela, kakuli ki na Mulimu wahao. Nika kutiisa, ee, nika kutusa, nika kukumalela ka lizoho laka la bulyo la kuluka.”—Isaya 41:10, Bibele ya Toloko ya Lifasi Lelinca.

 “Sisabi kakuli niinzi ni wena; sibilaeli kakuli ki na Mulimu wahao. Ni ka kufa mata, ee, ni ka kutusa; ee, ni ka kutiisa ka lizoho laka la bulyo la niti yaka.”—Isaya 41:10, Bibele ya New King James Version.

 Jehova a Mulimu usepisa batanga bahae kuli uka batusa kusina taba ni miinelo yetaata yebakopana ni yona.

 “Niinzi ni wena.” Jehova ukolwisa batanga bahae ka kubataluseza libaka habasa swaneli kusaba, kakuli habayo banosi. Bakeñisa kuli wabona miinelo yetaata yebakopana ni yona mi wautwanga litapelo zabona, kuswana feela inge kuli uinzi ni bona.—Samu 34:15; 1 Pitrosi 3:12.

 “Ki na Mulimu wahao.” Jehova utusa batanga bahae kuutwisisa kuli kusina taba ni miinelo yetaata yebakopana ni yona, usali Mulimu wabona mi ubaanga kuba batanga bahae. Bakona kukolwa kuli hakuna nto yekona kupaleliswa Mulimu kutusa batanga bahae.—Samu 118:6; Maroma 8:32; Maheberu 13:6.

 “Nika kutiisa, ee, nika kutusa, nika kukumalela ka lizoho laka la bulyo la kuluka.” Jehova ukoñomeka taba ya kuli ukatusa batanga bahae ka kukutela kubulela manzwi atalusa taba yeswana yeo halaalu. Jehova uitusisa pulelo ya kuli uka lukumalela ka lizoho lahae la bulyo kuli abonise zakona kueza kwa batanga bahae babatokwa tuso. Haiba mutu awa, Mulimu wakona kumuswala ka lizoho lahae la bulyo ni kumuyemisa.—Isaya 41:13.

 Nzila yetuna yatusa ka yona batanga bahae Mulimu ki ka kuitusisa Linzwi lahae, yona Bibele. (Joshua 1:8; Maheberu 4:12) Ka mutala, mwa Linzwi la Mulimu, kunani kelezo yende yekona kutusa batu babatalimana ni miinelo yetaata yecwale ka bubotana, kukula, kamba kushwelwa ki mutu yebalata. (Liproverbia 2:6, 7) Mulimu hape wakona kuitusisa moya hae okenile kamba maata asebeza, kuli atuse batanga bahae kutiyela miliko yebakopana ni yona.—Isaya 40:29; Luka 11:13.

 Manzwi a kwa liñolo le naaomba-ombile Majuda babasepahala, ili bane baisizwe mwa buhapiwa kwa Babilona hasamulaho. Jehova naapolofitile kuli Majuda hane batuha balukululwa mwa buhapiwa kwa Babilona, nekukaba ni lipiho za kuli sila nesika taha kuto yundisa macaba anaapotolohile muleneñi wa Babilona ni kulwanisa muleneñi. (Isaya 41:2-4; 44:1-4) Nihaike kuli batu bane bali mwa Babilona ni macaba anaayahile bukaufi ni bona nebaka ikalelwa hane bakautwa piho yeo, Majuda bona nebasike basaba kakuli Jehova naaka basileleza. Jehova naabasepisize kuli naaka basileleza ka kukutela kubulela manzwi ali, “musike mwasaba” halaalu.—Isaya 41:5, 6, 10, 13, 14.

 Nihaike kuli manzwi afumaneha kwa Isaya 41:10 naañolezwi kuomba-omba Majuda babasepahala bane bali mwa buhapiwa kwa Babilona, Jehova Mulimu naaboni teñi kuli abukelezwa kuli aomba-ombe batanga bahae kaufela kacenu. (Isaya 40:8; Maroma 15:4) Jehova kacenu utusa batanga bahae sina feela mwanaaezelize kwamulaho.