LITIMANA ZA MWA BIBELE ZETALUSIZWE

Mareka 1:15—“Mubuso wa Mulimu U Fakaufi”

MUBAPALE

“Nako yetomilwe ifitile, mi Mubuso wa Mulimu usutelezi fakaufi. Mubake, mi mulumele taba yende.”—Mareka 1:15, Bibele ya Toloko ya Lifasi Lelinca.

“Nako italelelizwe, mi mubuso wa Mulimu u fakaufi; mubake mi mulumele evangeli.”—Mareka 1:15, Bibele ya English Standard Version.

Taluso ya Liñolo la Mareka 1:15

Jesu Kreste naabulelezi batu bane bateeleza ku yena kuli Mubuso wa Mulimu a “u fakaufi,” kamba ‘neusutelezi fakaufi,’ bakeñisa kuli yena yanaakaba Mulena wa Mubuso wo, naainzi ni bona hanaabulela litaba zeo.

Jesu naasatalusi kuli Mubuso wo neukalile kale kubusa. Mane hasamulaho, naabulelezi balutiwa bahae kuli Mubuso neusa taha. (Likezo 1:6, 7) Nihakulicwalo, Jesu naabonahezi ka nako yeswanela luli, mwa silimo sene sipolofitilwe mwa Bibele kuli naakabonahala sina Mulena b wa kwapili. Ki lona libaka Jesu hanaabulezi kuli: “Nako yetomilwe ifitile,” yona nako ya kuli akalise musebezi wa kukutaza evangeli, kamba taba yende ka za Mubuso.—Luka 4:16-21, 43.

Kuli batu banaaambola ni bona batusiwe ki taba yende ya Mubuso, nebaswanela kubaka, ili kutalusa kuli nebaswanela kuikutwa bumaswe ka za libi zene baezize kwamulaho ni kupila ka kuya ka likuka za Mulimu. Batu bane babakile nebabonisize kuli nebanani tumelo ya kuli Mubuso wa Mulimu neuka tahisa zende kwapili.

Litaba zeñwi zeswalisana ni litaba ze kwa Mareka 1:15

Jesu naabulezi manzwi a, ka nako yakalisa bukombwa bwahae mwa Galilea. Liñolo la Mateu 4:17 lelibulela za taba yeswana libala kuli: “Kuzwa ka yona nako yeo,” Jesu akala kukutaza za Mubuso wa Mulimu. Taba yanaakalile kukutaza hahulu Jesu neli ya Mubuso wa Mulimu. Mane mwa Libuka za Evangeli c zeene, linzwi la Mubuso libulezwi kufitelela hamwanda, mi lifumaneha hahulu mwa litaba zanaabulezi Jesu. Mwa litaba zebulezwi mwa Bibele, Jesu naabulelanga hahulu za Mubuso wa Mulimu kufita litaba zeñwi kaufela.

Mubale Mareka kauhanyo 1 ni litaluso ze kwatasi, mi mubone ni mañolo abonisizwe fa litaku zelibisa kwa mañolo amañwi.

a Mubuso wa Mulimu ki mulonga o kwa lihalimu otomilwe ki Mulimu kuli upete tato yahae fa lifasi. (Daniele 2:44; Mateu 6:10) Kuli muzibe litaba zeñata ka za Mubuso wo, mubone taba yeli, “Mubuso wa Mulimu ki Nto Mañi?”

b Jesu naatokwa kuba mulena ilikuli apete buikalabelo bwahae ka kuba Mesia yanaapolofitilwe, yena muyemeli yaipitezi wa Mulimu. Kuli muzibe litaba zeñata ka za bupolofita bwa mwa Bibele bobubonisa kuli Jesu ki yena Mesia, mubone taba yeli, “Kana Bupolofita Bobubulela ka za Mesia Bwabonisa Kuli Jesu Neli Yena Mesia?”

c Libuka za Evangeli ki zona libuka zeene zapili mwa Mañolo A Sikreste A Sigerike, zebabiza batu babañata kuli ki Testamente Yenca, ili zebulela za bupilo ni bukombwa bwa Jesu bwa fa lifasi.