Taba Yende Yeneñozwi ki Mark 9:1-50

MUBAPALE

Kufetuha kwa Jesu (1-13)
Mushimani yakenwi ki mudimona wafoliswa (14-29)
- Lika kaufela zakonahala ku mutu yanani tumelo (23)
Lifu la Jesu lapolofitwa hape (30-32)
Balutiwa bakananisana ka za kuli ki mañi yomutuna (33-37)
Mutu kaufela yasa lulwanisi u kwa lineku laluna (38-41)
Lisitataliso (42-48)
“Mube ni lizwai ku mina” (49, 50)

9 Hape ali ku bona: “Kaniti namibulelela nili, kunani babañwi ku babayemi fa babasike bashwa nikamuta kufitela pili babona Mubuso wa Mulimu hase utile mwa maata aona.”+ ² Hamulaho wa mazazi a 6, Jesu aanga Pitrosi ni Jakobo ni Joani mi abaisa fa lilundu lelilumbile bali banosi. Mi ponahalo yahae yafetuha fapilaa bona;+ ³ liapalo zahae za fahalimu zakala kubenya, zaba zesweu hahulu kuli mane hakuna mutapisi wa liapalo mwa lifasi yanaakona kulibisa zesweu cwalo. ⁴ Hape Elia ni Mushe baiponahaza ku bona, mi nebaambola ni Jesu. ⁵ Pitrosi kihaa li ku Jesu: “Rabbi, neikaba hande hane lukaina hona fa. Cwale lulumeleze kutoma litende zetaalu, yeñwi ibe yahao, yeñwi ibe ya Mushe, mi yeñwi ibe ya Elia.” ⁶ Mane naasazibi sa kueza, kakuli nebasabile hahulu. ⁷ Mi kwataha lilu, labaapesa, mi kwautwahala linzwi+ lelizwa mwa lilu, lelili: “Yo ki Mwanaka, yalatwa.+ Mumuteeleze.”+ ⁸ Honafo batalima kafa ni kafa mi babona kuli nekusina mutu yomuñwi yanaali ni bona hape kwandaa Jesu. ⁹ Hane banze bashetumuka kuzwa fa lilundu, Jesu abalaela ka taata kuli basike bakandekela mutu ufi kamba ufi zebaboni+ kufitela Mwanaa mutu hasaazuhile kwa bafu.+ ¹⁰ Bamamela manzwi ao,* kono baikambota mwahalaa bona zene italusa taba yeo ya kuzuha kwa bafu. ¹¹ Mi bakala kumubuza, bali: “Ki kabakalañi bañoli habali Elia+ ulukela kutaha pili?”+ ¹² Ali ku bona: “Elia ki yena yataha pili mi ulukisa sinca lika kaufela;+ kono kiñi hakuñozwi ka za Mwanaa mutu kuli ulukela kukopana ni manyando amañata+ ni kuezwa sina yasina tuso?+ ¹³ Kono nimibulelela kuli Elia+ mane utile, mi bamuezize ka mone balatela kaufela, sina feela mokuñolezwi ka za hae.”+ ¹⁴ Hase batile kwa balutiwa babañwi, babona buñata bobutuna bone bubabeile mwahali, mi nekunani bañoli bane bakanana ni bona.+ ¹⁵ Kono buñata kaufela busa mubona feela, bwakomoka hahulu, mi bwamatela ku yena kuyo mulumelisa. ¹⁶ Kihaa babuza, ali: “Mukananañi ni bona?” ¹⁷ Mi yomuñwi mwahalaa buñata amualaba, ali: “Muluti, nitisize mwanaka ku wena kakuli unani moya omupalelwisa kubulela.+ ¹⁸ Kai ni kai kou muswalela, umuwisezanga fafasi, mi uzwanga lufulo kwa mulomo ni kukweca meeno mi ufelelwanga ki maata. Nenikupile balutiwa bahao kuli bauleleke kono nebapalezwi kueza cwalo.” ¹⁹ Jesu abaalaba, ali: “Mina lusika lolusina tumelo,+ nikaina ni mina kuisa lili? Nikaitiisa ni mina kuisa lili? Hamu mutise ku na.”+ ²⁰ Kiha bamutiseza mushimani yo, kono moya wo haubona Jesu, wanyakaulisa mwanana. Mwanana hasaawezi fafasi, aswalelela kualabana, anzaazwa lufulo kwa mulomo. ²¹ Jesu kihaa buza ndatahe mushimani, ali: “Ukalile lili kuezanga cwana?” Yena ali: “Kuzwa feela kwa bwanana bwahae, ²² mi hañata moya wo umunepelanga mwa mulilo ni mwa mezi kuli umubulaye. Kono haiba wena wakona kueza sesiñwi, haku luutwele makeke mi ulutuse.” ²³ Jesu ali ku yena: “Uli, ‘Haiba wakona’! Hanili lika kaufela zakonahala ku mutu yanani tumelo.”+ ²⁴ Honafo ndatahe mwana ahuwa, ali: “Ninani tumelo! Haku nituse moifokola tumelo yaka!”+ ²⁵ Jesu cwale halemuhile kuli buñata nebuakufela ku bona, akalimela moya omasila, ali ku ona: “Wena moya otahiseza mutu kuba simumu ni susu, nakulaela, zwa ku mushimani yo mi usike wakena ku yena hape!”+ ²⁶ Hamulaho wa kuhuwa ni kunyakaulisa mushimani, moya wo wazwa, mi mwanana abonahala inge yashwile, kuli mane buñata bwa batu nebabulela kuli: “Ushwile!” ²⁷ Kono Jesu amuswala kwa lizoho ni kumuyemisa, mi mushimani ayema. ²⁸ Cwale hasaakeni mwa ndu, balutiwa bahae bamubuza kwa mukunda, bali: “Ki kabakalañi luna hane lupalezwi kuuleleka?”+ ²⁹ Ali ku bona: “Mufuta wo ukona feela kuzwa ka tapelo.” ³⁰ Bazwa mwa sibaka seo mi bafita mwa Galilea, kono naasalati kuli mutu ufi kamba ufi azibe zateñi. ³¹ Kakuli naaluta balutiwa bahae ni kubabulelela kuli: “Mwanaa mutu ukabetekiwa ka kufiwa mwa mazoho a batu, mi baka mubulaya, kono nihaka bulaiwa cwalo,+ ukazuha hamulaho wa mazazi amalaalu.”+ ³² Kono nebasika utwisisa taba yanaabulezi, mi nebasaba kumubuza. ³³ Mi bataha mwa Kapernauma. Cwale hanaali mwa ndu, ababuza, ali: “Nemukananañi mwa nzila?”+ ³⁴ Bakuza feela, kakuli mwa nzila nebasweli kukananisana za kuli ki mañi yomutuna mwahalaa bona. ³⁵ Jesu kihaa ina, abiza ba 12 mi ali ku bona: “Haiba mutu ubata kuba wapili, ulukela kuba yena wamafelelezo kwa batu kaufela mi ibe yena sikombwa kwa batu kaufela.”+ ³⁶ Cwale aanga mwanana yomunyinyani mi amuyemisa mwahalaa bona; mi hasaa mukambekile mazoho fahalimu, ali ku bona: ³⁷ “Mutu kaufela yaamuhela yomuñwi wa banana babanyinyani babacwana+ ka libizo laka uamuhela ni na; mi mutu kaufela yaniamuhela haamuheli na ninosi kono uamuhela ni yena yanilumile.”+ ³⁸ Joani ali ku yena: “Muluti, luboni mutu yomuñwi yaleleka madimona ka kuitusisa libizo lahao, mi selulika kumuhanisa, kakuli naasa lulateleli.”+ ³⁹ Kono Jesu ali: “Musike mwalika kumuhanisa, kakuli hakuna mutu yakaeza musebezi omaata ka libizo laka yakaakufela kubulela sesimaswe ka zaka. ⁴⁰ Kakuli mutu kaufela yasa lulwanisi u kwa lineku laluna.+ ⁴¹ Mi mutu kaufela yamifa komoki ya mezi a kunwa kabakala kuli muba Kreste,+ kaniti namibulelela nili, haana kulatehelwa ki mupuzo wahae.+ ⁴² Kono mutu kaufela yasitatalisa alimuñwi ku babanyinyani babanani tumelo ba, nekukaba hande ku yena hanaaka tamelelwa mwa mulala licwe lelituna la kubelisa lelipikuluswa ki mbongolo, ni kunepelwa mwa liwate.+ ⁴³ “Haiba lizoho lahao likusitatalisa, ulipume. Sesinde ku wena ki kufumana bupilo uli siyanga kufita kukena ni mazoho amabeli mwa Gehena,* mwa mulilo osakoni kutimiwa.+ ⁴⁴ *—— ⁴⁵ Mi haiba lihutu lahao likusitatalisa, ulipume. Sesinde ku wena ki kufumana bupilo uli sihole kufita kunepelwa ni mahutu amabeli mwa Gehena.*+ ⁴⁶ *—— ⁴⁷ Mi haiba liito lahao likusitatalisa, ulikule.+ Sesinde ku wena ki kukena mwa Mubuso wa Mulimu inze unani liito lililiñwi kufita kunepelwa inze una ni meeto amabeli mwa Gehena,*+ ⁴⁸ mo mabuku asashwi, ni mo mulilo usatimi.+ ⁴⁹ “Kakuli mutu kaufela ulukela kulungiwa lizwai la mulilo.+ ⁵⁰ Lizwai ki lelinde, kono haiba lizwai lisampuka, mukakutisa ka ñi maata alona?+ Mube ni lizwai ku mina,+ mi mubukeleze kozo mwahalaa mina.”+