Zakaria 7:1-14
7 Mi ka silimo sabune sa puso ya Mulena Dariusi, linzwi la Jehova lataha ku Zakaria+ fa lizazi labune mwa kweli yabu 9, yona kweli ya Kisilevu.*
2 Batu ba mwa Betele baluma Sharezeri ni Regemi-meleki ni baana bahae kuli bayo kupa Jehova kuli abashemube,*
3 kuyo bulelela baprisita ba ndu* ya Jehova wa limpi ni bapolofita kuli: “Kana naswanela kulila mwa kweli yabuketalizoho+ ni kuitima lico sina moniezelize mwahalaa lilimo zeñata hahulu?”
4 Linzwi la Jehova wa limpi hape lataha ku na, lali:
5 “Ubulelele batu kaufela ba mwa naha ni baprisita, uli: ‘Hane muitimile lico ni kubokolola mwa kweli yabuketalizoho ni mwa kweli yabu 7+ mwa lilimo ze 70,+ kana luli nemuitimile lico kabakala ka?
6 Mi hane muca ni kunwa, kana nemusa iceli ni kuinwela ili mina?
7 Kana hamuswaneli kumamela manzwi anaabulezi Jehova ka bapolofita bakwaikale,+ Jerusalema ni mileneñi yene imupotolohile hane iyahilwe ki batu ni hane ku na ni kozo, ni naha ya Negebe ni ya Shefela* hane liyahilwe?’”
8 Linzwi la Jehova hape lataha ku Zakaria, lali:
9 “Jehova wa limpi sabulela ki se, uli: ‘Muatule ka kuya ka niti ya taba,+ mi mupilisane ni babañwi ka lilato lelisa feli+ ni ka sishemo.
10 Musike mwabukula mbelwa kamba mwana yasina ndatahe,*+ muzwahule+ kamba mubotana;+ mi musike mwalelela babañwi zemaswe mwa lipilu zamina.’+
11 Kono bazwelapili kuhana kuutwa,+ mi banifulalela+ ka mahañi, mi batiba mazebe abona kuli basike bautwa.+
12 Batatafaza lipilu zabona sina daimani*+ mi nebasa mameli mulao* ni manzwi anaalumile Jehova wa limpi ka moya wahae, ili ka bapolofita bakwaikale.+ Cwale buhali bwa Jehova wa limpi bwabatukela.”+
13 “‘Sina feela hanebasa utwangi hane nibiza,*+ ni na nenisika utwa hane babiza,’+ kubulela Jehova wa limpi.
14 ‘Mi nabahasanyeza mwa macaba kaufela ene basazibi+ ka moya wa liñungwa, mi naha yasiyala matota, kusina yafita mwateñi kamba kukutela mwateñi;+ kakuli nebafetuzi naha yende kuba nto yesabisa.’”
Litaluso ze kwatasi
^ Mubone Litaba Zeekelizwe B15.
^ Kamba “banolofaze pata.”
^ Kamba “tempele.”
^ Kamba “sibaka sesipatami.”
^ Kamba “ndiala.”
^ Kamba mwendi, “licwe lelitiile,” sina moliinezi licwe la emeri.
^ Kamba “taelo.”
^ Linzwi ka linzwi, “hanaabiza.”
