Balwanisi ba Jesu bapalelwa kumutama taba kamba kumuswasa kuli bamuise kwa Maroma. (Luka 20:20) Cwale inze asali kwa tempele la Nisani 11, Jesu ufetuhela kwa balwanisi bahae mi ubataluseza niti ya kuli ki yena mañi. Jesu ukalisa kubabuza kuli: “Muliñi ka za Kreste? Ki mwanaa mañi?” (Mateu 22:42) Ki taba yezibahala hande ya kuli Kreste kamba Mesia ukapepiwa mwa lusika lwa Davida. Yeo ki yona kalabo yebafa.—Mateu 9:27; 12:23; Joani 7:42.

Jesu ubabuza kuli: “Cwale kutaha cwañi kuli Davida ka kususumezwa ki moya okenile umubiza kuli Mulena, hali: ‘Jehova naaize ku Mulenaaka: “Ina kwa lizoho laka la bulyo kufitela nibeya lila zahao kwatasaa mahutu ahao”’? Cwale haiba Davida yena umubiza kuli Mulena, uba cwañi mwanaa hae hape?”—Mateu 22:43-45.

Bafalisi habautwa cwalo bakuza, kakuli balibelela kuli mwana yomuñwi yakapepiwa mwa lusika lwa Davida mwendi uka balukulula kwa buhateleli bwa Maroma. Kono Jesu uama kwa manzwi a Davida añozwi kwa Samu 110:1, 2, ilikuli ababonise kuli Mesia ukaba yomutuna kwa babusi ba butu. Ki Mulenaa Davida, mi hakaina ku la bulyo la Mulimu ukaitusisa maata. Kalabo ya Jesu ikuzisa balwanisi bahae.

Balutiwa ni batu babañwi babañata basweli kuteeleza. Cwale Jesu ubulela ku bona, ubalemusa ka za bañoli ni Bafalisi. Baana bao “baipeile mwa situlo sa Mushe” kuli balute batu Mulao wa Mulimu. Jesu ulaela bateelezi bahae kuli: “Lika kaufela zeba mibulelela, mulieze ni kulimamela, kono musike mwalikanyisa likezo zabona, kakuli babulela kono habaezi zebabulela.”—Mateu 23:2, 3.

Jesu cwale ufa mutala obonisa buipi bwabona, uli: “Batunafaza tukwama twa mañolo tobaitama sina lisilelezo.” Majuda babañwi batamanga fa pata kamba fa mazoho tukwama to, totunani litaba zekuswani zezwa mwa Mulao. Bafalisi batunafaza tukwama twabona ilikuli babonise kuli batukufalezwi Mulao. Hape “bashangela mingundo ya liapalo zabona.” Maisilaele nebalaezwi kupanga mingundo kwa liapalo zabona, kono Bafalisi bona baeza mingundo yemitelele hahulu kwa liapalo zabona. (Numere 15:38-40) Baeza zeo kaufela “kuli babonwe ki batu.”—Mateu 23:5.

Nihaiba balutiwa ba Jesu bakona kukenelwa ki moya wa kubata litulo zetuna, ka mukwa ocwalo, Jesu ubaeleza kuli: “Musike mwabizwa Rabbi, kakuli Muluti wamina ki alimuñwi, mi kaufelaa mina mu mizwale. Hape musike mwabiza mutu ufi kamba ufi fa lifasi kuli ndate, kakuli Ndataa mina ki alimuñwi, Yena ya kwa lihalimu. Mi hape musike mwabizwa baeteleli, kakuli Mueteleli wamina ki alimuñwi, yena Kreste.” Cwale balutiwa baswanela kuba ni moya ocwañi mi baswanela kueza cwañi? Jesu ubabulelela kuli: “Yomutuna hahulu mwahalaa mina ulukela kuba yena sikombwa samina. Mutu kaufela yaipahamisa ukakokobezwa, mi mutu kaufela yaikokobeza ukapahamiswa.”—Mateu 23:8-12.

Kutuha fo, Jesu ubulela bumai bobukatela bañoli ni Bafalisi bakeñisa buipi bwabona, uli: “Munani bumai mina bañoli ni Bafalisi, mina baipi! Kakuli mukwalela batu kukena mwa Mubuso wa mahalimu; kakuli mina hamukeni mwateñi, mi hamulumelezi babayo kena mwateñi.”—Mateu 23:13.

Jesu unyaza Bafalisi bakeñisa kuli habaisi pilu kwa lika zanga Jehova kuba za butokwa hahulu. Ka mutala, bali: “Haiba mutu akonka ka tempele, haki sesiñwi; kono haiba mutu akonka ka gauda ya tempele, fohe utamehile kupeta buitamo bwahae.” Ka kueza cwalo, babonisa kuli habazibi lika za butokwa, kakuli baisa hahulu pilu kwa gauda ya tempele kufita kuisa pilu kwa tempele yeitusiswa kwa kulapela Jehova ilikuli basutelele bukaufi ni yena. Mi ‘bakeshebisize litaba zebuima za  mwa Mulao, ili katulo yelukile ni sishemo ni busepahali.’—Mateu 23:16, 23; Luka 11:42.

Jesu ubulela kuli Bafalisi ba ki ‘bazamaisi babashwile meeto, babasefa kambulumbulu mwa lino zabona kono bamiza kamele!’ (Mateu 23:24) Basefa kambulumbulu bakeñisa kuli kaangiwa kuba kakasika kena ka kuya ka sizo sabona. Kono kukeshebisa kwabona litaba za butokwa za mwa Mulao kuswana inge kumiza kamele, mi ni yona ki folofolo yesika kena ka sizo sabona, kono yona ki yetuna hahulu.—Livitike 11:4, 21-24.