Kwa naha yeñwi ya kwa upa wa Isilaele nekunani batu bane balumela kuli linaleli nelikona kubaetelela. Zazi leliñwi busihu, baana babañwi ba kwa Upa babona nto yenebonahala inge naleli yebenya hahulu inze izamaya mwa halimu, kacwalo bailatelela. “Naleli” yeo yabalibisa kwa Jerusalema. Baana bao bakala kubuza batu kuli: ‘Ukai mwana yakaba mulena wa Majuda? Lutile kuto mukubamela.’

Heroda, mulena wa Jerusalema, hautwile za mulena yomunca yo, aikalelwa hahulu. Abuza baprisita babahulu kuli: ‘Mulena yo uswanela kupepelwa kai?’ Bamualaba bali: ‘Bapolofita nebali naakapepelwa mwa Betelehema.’ Kacwalo, Heroda abiza baana ba kwa Upa mi ali ku bona: ‘Muye kwa Betelehema muyo nifumanela mwanana yo. Hase mumufumani, mukute muto nibulelela kwafumaneha. Ni na nibata kuyo mukubamela.’ Kono naapuma.

“Naleli” yakala kuzamaya hape. Baana bao bailatelela mane kuyo fita ni yona kwa Betelehema. “Naleli” yatoyema fahalimwaa ndu yeñwi mi baana bao bakena mwa ndu yeo. Bafumana Jesu ni mahe, yena Maria. Bakubamela mwanana mi bamufa limpo ili gauda, insense yesweu, ni mira. Kana ki Jehova yanaalumile baana ba kuli bafumane Jesu? Batili.

Busihu bobuswana bo, Jehova abulelela Josefa mwa tolo kuli: ‘Heroda ubata kubulaya Jesu. Uunge musalaa hao ni mwanaa hao mi musabele kwa Egepita. Uyo ina kwateñi kufitela nikubulelela kuli ukute.’ Honafo feela, Josefa ni lubasi lwahae baya kwa Egepita.

Jehova naabulelezi baana babazwa kwa Upa kuli basike bakutela ku Heroda. Heroda hasaalemuhile kuli nebasika kuta, anyema hahulu. Bakeñisa kuli naapalezwi kufumana Jesu, alaela kuli bana babashimani kaufela ba lilimo zanaanani zona Jesu, mwa Betelehema, babulaiwe. Kono Jesu naasilelelizwe, naali kwa Egepita.

 Hamulaho wa nako, Heroda ashwa. Jehova abulelela Josefa kuli: ‘Cwale wakona kukuta kakuli lila zahao halisaliyo.’ Josefa, Maria, ni Jesu bakutela kwa Isilaele, mi bakala kupila mwa muleneñi wa Nazareta.