Muprisita Yapahami Eli naanani bana bababeli babashimani bane basebeza sina baprisita kwa tabernakele. Mabizo abona neli Hofini ni Finehasi. Nebasika latelela milao ya Jehova, mi nebaezize batu maswe. Maisilaele hane batisanga matabelo ku Jehova, Hofini ni Finehasi nebaikungelanga nama yende ka kufitisisa. Eli naautwile zene baeza bana bahae, kono hakuna zanaaezize ka za teñi. Kana Jehova naakatuhelela lika zeo kuzwelapili kuezahala?

Nihaike kuli Samuele naali mwanana hahulu ku Hofini ni Finehasi, naasika balikanyisa. Jehova naatabiswa ki Samuele. Zazi leliñwi busihu hanaalobezi, Samuele autwa mutu yamubiza. Azuha ni kumatela ku Eli, mi ali: ‘Ki na yo!’ Kono Eli ali: ‘Hanisika kubiza. Kuta uyo lobala.’ Samuele akuta kuyo lobala. Hape kwaezahala nto yeswana. Samuele hanaautwile linzwi lwabulaalu, Eli alemuha kuli neli Jehova yanaabiza Samuele. Abulelela Samuele kuli haaka utwa linzwi hape, uswanela kubulela kuli: ‘Hakubulele Jehova. Mutangaa hao wateeleza.’

Samuele akuta kuyo lobala. Cwale kiha utwa linzwi halili: ‘Samuele! Samuele!’ Aalaba ali: ‘Hakubulele, kakuli mutangaa hao wateeleza.’ Jehova kihaa li ku yena: ‘Ubulelele Eli kuli nika mufa koto ni lubasi  lwahae. Waziba kuli bana bahae basweli kueza lika zemaswe mwa tabernakele yaka, kono haezi sesiñwi ka za teñi.’ Habusa kakusasana, Samuele akwaulula minyako ya tabernakele sina feela mwanaaezezanga. Naasaba kubulelela muprisita yapahami zanaa mutaluselize Jehova. Kono Eli amubiza mi amubuza kuli: ‘Mwanaka, ki lika mañi zakubulelezi Jehova? Nibulelele lika kaufela.’ Kacwalo, Samuele abulelela Eli lika kaufela.

Samuele hanaanzaa hula, Jehova azwelapili kuba ni yena. Batu kaufela mwa Isilaele, kuzwa mwa sibaka sesiñwi kuya ku sesiñwi baziba kuli Jehova naaketile Samuele kuba mupolofita ni muatuli.