Maisilaele hape bafetuhela Jehova mi bakala kusebeleza milimu ya buhata. Maamoni hane batasezanga ni kulwanisa Maisilaele, milimu yeo neisa batusangi. Maisilaele nebanyandile ka lilimo zeñata. Kwa mafelelezo, bali ku Jehova: ‘Luezize sibi. Haku lulamulele kwa lila zaluna.’ Maisilaele basinya milimu yabona ya maswaniso mi bakala kulapela Jehova hape. Jehova naasabati kubabona inze bazwelapili kunyanda.

Ndwalume yabizwa Jefita naaketilwe kuetelela sicaba kuyo lwanisa Maamoni. Kihaa li ku Jehova: ‘Haiba unitusa kutula mwa ndwa ye, nisepisa kuli hanika kutela kwa ndu, nika kufa mutu wapili yakazwa mwa ndu yaka kuto nikatanyeza.’ Jehova naateelelize kwa tapelo ya Jefita mi amutusa kutula mwa ndwa.

 Jefita hanaakutezi kwa ndu, mutu wapili yanaatile kuto mukatanyeza neli mwanaa hae wamusizana, yena mwanaa hae anosi. Naasweli kubina ni kuliza kalupanyana. Ki lika mañi zanaaka eza Jefita? Ahupula sepiso yahae mi ali: ‘Mawe, mwanaka! Unilobile pilu. Nenisepisize Jehova. Kuli nitaleleze sepiso yaka, nitokwa kukuisa kuli uyo sebeleza kwa tabernakele mwa Shilo.’ Kono mwanaa hae ali ku yena: ‘Tate, haiba nemusepisize Jehova, muswanela kutaleleza sepiso yamina. Nikupa kuli niye kwa malundu niyo ina kwateñi likweli zepeli ni balikani baka babasizana. Mi hasamulaho nikaya.’ Mwanaa Jefita wamusizana naasebelize ka busepahali kwa tabernakele mwa bupilo bwahae kaufela. Silimo ni silimo, balikani bahae nebayanga kuyo mupotela kwa Shilo.