Bibele ibulela za likwata zepeli za baana ba Sikreste babanani buikalabelo bwa kubabalela puteho, baana bao ki “baokameli ni likombwa za puteho.” (Mafilipi 1:1) Hañata kunani baana ba palonyana babacwalo babasebeza mwa puteho ni puteho. Likombwa za puteho balutusa ka kupeta misebezi mañi?

Batusa sitopa sa baana-bahulu. Likombwa za puteho, ki baana babanani silikani sesitiile ni Jehova, baitingwa, mi bapeta misebezi yabona ka busepahali, babañwi ki banana, mi babañwi ki babahulu. Bapeta misebezi ya butokwa yeeziwanga kamita mwa puteho ni kwa Ndu ya Mubuso, mi haki misebezi yeama kuluta kamba kulisa puteho. Seo sikonisa baana-bahulu kuisa mamelelo yabona kwa musebezi wa kuluta ni kulisa puteho.

Baeza misebezi yetusa puteho. Likombwa za puteho zeñwi lifilwe musebezi wa bubabaleli, ili kuamuhelanga batu kaufela babataha kwa mikopano. Babañwi bafilwe musebezi wa kutalima za mulumo, kuabela lihatiso, kutalima za liakaunti za puteho, ni kufa likalulo za simu kwa bahasanyi mwa puteho. Hape batusanga kubabalela Ndu ya Mubuso. Baana-bahulu bakona kubakupa kutusa mizwale ni likaizeli ba basupali. Likombwa za puteho baitatela kueza misebezi kaufela yebafiwa, mi puteho yabakuteka bakeñisa kusebeza ka taata ni moya wabona wa buitateli.—1 Timotea 3:13.

Batoma mutala omunde ka kuba baana ba Sikreste. Likombwa za puteho baketiwanga bakeñisa kuli banani tulemeno totunde twa Sikreste. Habafa lingambolo kwa mikopano batiisanga tumelo yaluna. Mutala omunde oba lutomela mwa musebezi wa kukutaza, ulutusa kutukufalelwa musebezi wo. Bakeñisa kuli basebelisana hande ni sitopa sa baana-bahulu, batahisa tabo ni swalisano mwa puteho. (Maefese 4:16) Hamulaho wa nako, ni bona bakona kukwanisa zetokwahala kuli basebeze sina baana-bahulu.

• Likombwa za puteho ki batu babacwañi?

• Likombwa za puteho bapeta misebezi mañi yetahisa kuli lika lizamaye hande mwa puteho?