Tabo ku si na Taba ni Buyanga bo Butuna

TABA YE KANDEKILWE KI BO JOSÉ GODOFREDO VÁRGUEZ

Ne ni iketile ha ni pepwa mi na hula inze ni na ni buikangulo bo bunde. Ha ni kwanisa lilimo ze 17, na kena musebezi wa ku ciseza lisipi. Nako ye ñwi ha se ku fitile lilimo ze peli, pula ya kala ku nela inze ni ciseza lisipi fo ku telele bukaufi ni mawaya a malaiti a matisa mulilo o muñata. Ka ku sa libelela na swalwa ki malaiti mi a ni nepela fafasi, butelele bo bu eza limita ze 14, mi na welela. Na to zuha hasamulaho wa likweli ze talu. Mi fo, na ipumana kuli ne ni kona feela ku nyanganyisa toho. Mazoho ni mahutu a ka na tuhezi ku sebeza mi na ikutwa ku eshulwa luli!

SA PILI, na nyemela Mulimu ni ku mu buza libaka ha na ni tuhelela ku pila. Mane na nahana ku ipulaya. Na bata kimululo mwa bulapeli bo bu shutana-shutana, kono ha ku na bulapeli bo ne bu konile ku ni toba pilu kamba ku alaba lipuzo za ka ka za Mulimu. Mane ne bu palelwa ni haiba ku susueza batu ku pila ka lituto ni likuka za Bibele! Ka 1981, bo ma ha ba timela, na kalisa ku nwa bucwala ni ku ikenya mwa likwinano za mali. Ne ni nahana kuli bakeñisa muinelo wa ka wa buyanga, ni ha ne ni ka kolwa bucwala, Mulimu na ta ni shwela makeke ni ku ni swalela. Hape na ba ni muzamao o maswe, ka ku ikungela musali ye ne ni si ka nyala.

Cinceho ye Tuna ya ka mo ne ni Ngela Lika

Na kopana lwa pili ni Lipaki za Jehova inge ni na ni lilimo ze 37 za buhulu. Bakeñisa ku susuezwa ki litaba za kutwi, bo ma kamita ne ba bulelanga kuli bulapeli bo bu maswe ka ku fitisisa ki bwa Lipaki za Jehova. Niteñi, ka ku nahana kuli ni ziba hahulu Bibele, na ba amuhela mwa ndu ya ka ka mulelo feela wa ku ba swabisa. Kono na to ikomokela ha ni lemuha kuli zibo ya ka ne li ya makutelakaufi! Mane ba ni komokisa hahulu ha ba alaba lipuzo za ka kaufela ka Bibele. Hañihañi, na ba ni buikolwiso bwa kuli ni fumani niti.

Ka bumai, musali ye ne ni pila ni yena a hana tumelo ya ka ye nca, mi lwa kauhana. Na zwelapili ku lika ku ba ni bupilo bo bunde, ku sikuluha mwa munahano ni mo ni ngela lika kuli ni pile ka ku lumelelana ni mo i lutela Bibele. Ka tuso ya Mulimu, ni konile ku tiyela matata a tahisizwe ki kolofalo ya ka—kuli mane  ka lilimo ze 20 ze felile, ni fumani tabo ye tuna mwa ku neela nako ye ñata kwa sebelezo ya ku kutaza evangeli. Batu ba bañata ba komoka mo ni kwaniseza ha ba nahana buyanga bwa ka. Ha ni ini ni nosi. Ni ina ni munyanaa ka Ubaldo, ya si ka konda hande. Ubaldo ni yena u amuhezi niti ya Bibele mi lu sebeleza Jehova hamoho.

Lwa babalelana ni ku belekisana hande hahulu ni Ubaldo. Ha lu abana mwa musebezi wa ku kutaza, Ubaldo wa ni sundanga mwa sipula sa ka sa mawili ni ku ngongota fa minyako, mi ha ni ambola ni muñaa ndu, Ubaldo yena u ni tusanga ku apula Bibele ni ku bonisa muñaa ndu hatiso ye swanela. Hape wa ni tusanga kwa lika ze ñwi ze ni tokwa, za kwa mubili. Na kwateñi ni tusa kwa ku fumana mali ka ku lekisa likabiso. Ku zwafo, ba mwa puteho ya luna ya Lipaki za Jehova ba lu tusanga kwa misebezi ya fa lapa, ku apeha, ni ku lu isanga kwa sipatela ku dokota. Na ni Ubaldo lwa itebuha hahulu lika zeo kaufela!

Ni na ni tohonolo ya ku sebeza sina eluda mwa puteho ya Sikreste mi mizwale ba mwa puteho ba ifananga kamita ku ni tusa ku eza patisiso fa litaba za Bibele. Ha ni swala potoloto ka mulomo na kona ku lala lisupo za butokwa mwa lihatiso za luna.

Batu ha ba ni buzanga nji ni tabile, na alabanga kamita ku zwelela kwatasaa pilu ya ka kuli eni ni tabile! Ni kona ku palelwa cwañi ku ba ya tabile? Hailifo ni fumani bupilo bo bunde, mi ni libelezi ka cisehelo sepiso ya Mulimu kwa balapeli ba hae ba ba sepahala—ili buikangulo bo bunde mwa Paradaisi ye taha fa lifasi mubu.—Isaya 35:5, 6; Luka 23:43.

[Siswaniso fa likepe 23]

José inge a li wa lilimo ze 18, silimo pili a si ka holofala kale

[Siswaniso fa likepe 24]

Na ni munyanaa ka Ubaldo inze lu belekisana hande hahulu mwa musebezi wa ku kutaza mwa Mexico

[Siswaniso fa likepe 24]

Paki ka na u ni apulela Bibele ha ni nze ni fa ngambolo mwa Ndu ya Mubuso

[Siswaniso fa likepe 24]

Ba mwa puteho ya luna ha ba tusa kwa misebezi ya fa lapa ni ku apeha