ZE BA BULELA BATU

Batu ba bañwi ba nahananga kuli Paradaisi ki litangu feela. Ba bañwi ba lumela kuli ki simu ye nde hahulu ya ku ikumbuta feela, ili mo batu ba bande ba pila ku ya ku ile ni ku ikola bupilo ni misebezi ye minde.

ZE I BULELA BIBELE

Linzwi la “paradaisi” li itusisizwe ku ama kwa lihae la pili la batu, yona simu ya Edeni. (Genese 2:7-15) Bibele i bonisa kuli simu yeo ne li sibaka sa luli mo ne ba pilile batu ba babeli ba pili, ili mo ne ku si na matuku ni lifu. (Genese 1:27, 28) Kabakala kuli ne ba si ka utwa Mulimu, batu ba pili ne ba si ka lumelezwa ku zwelapili ku pila mwa Paradaisi. Nihakulicwalo, bupolofita bo buñata bwa Bibele bu talusa ka za nako ya kwapili, ili fo batu ba ka ikola ku pila mwa Paradaisi hape.

KI KABAKALAÑI TABA YE HA ILI YA BUTOKWA KU MINA?

Haiba Mulimu u na ni lilato, ki nto ye utwahala kuli u ka fa mupuzo wa bupilo bo bunde mwa sibaka se si cwale ka Paradaisi kwa balapeli ba hae ba ba sepahala. Hape kwa swanela kuli a bulelele batu ze ba swanela ku eza kuli ba kone ku lumelelwa ki yena. Bibele i bulela kuli mwa kona ku lumelelwa ki Mulimu ka ku ituta za hae ni ku mamela milao ya hae.—Joani 17:3; 1 Joani 5:3.

“Muñaa Bupilo Mulimu a cala simu ya Edeni, . . . mi a beya mwateñi mutu ya naa bupile.”—Genese 2:8.

ZE BA BULELA BATU

Ba bañwi ba lumela kuli Paradaisi i kwa lihalimu, kono ba bañwi bona ba bulela kuli i ka ba fa lifasi kwapili.

ZE I BULELA BIBELE

Paradaisi ya pili ne i li fa lifasi. Mulimu naa ezize lifasi kuli li be lihae la batu ku ya ku ile. Bibele i bulela kuli Mulimu naa ezize lifasi kuli li ine ku ya ku ile. (Samu 104:5) Hape i bulela kuli: ‘Mahalimu ki a Muñaa Bupilo, mi lifasi u li file bana ba batu.’—Samu 115:16.

Kamukwaocwalo, ha ku komokisi kuli Bibele i sepisa kuli lifasi li ka ba Paradaisi. Mwa Paradaisi, Mulimu u ka fuyaula batu ka ku ba fa bupilo bo bu sa feli. Ku ka ba ni swalisano ni kozo. Ku utwa butuku ni manyando li ka fela. Mi batu ba ka ikola ka ku tala pupo ye makaza ya lifasi.—Isaya 65:21-23.

“Tende ya Mulimu i inzi ni batu, . . . mi lifu ha li sa na ku ba teñi, nihaiba ku tahelwa ki maswabi kamba ku lila kamba ku utwa butuku.”—Sinulo 21:3, 4.

ZE BA BULELA BATU

Bulapeli bo buñata bu luta kuli ki batu feela ba bande ba ba ka pila mwa Paradaisi. Kono ku na ni mihupulo ye shutana-shutana ya za swanela ku eza mutu kuli a ngiwe kuli ki mutu yo munde. Ba bañwi ba ikutwa kuli mutu u tokwa feela ku abananga mwa mikiti ya bulapeli ni ku kuta-kutelanga ku lapela litapelo ze swana.

ZE I BULELA BIBELE

Bibele i luta kuli “ba ba na ni niti” kamba ba ba lukile ba ka pila mwa Paradaisi. Kono ki mañi mutu ya lukile mwa meeto a Mulimu? Haki mutu ya lapelanga feela litapelo za bulapeli bwa hae kono inze a itibaza tato ya Mulimu. Bibele i bulela kuli: “Muñaa Bupilo kana a ka tabela linubu za ku cisa, ni matabelo, sina mwa tabelela mutu ya utwa linzwi la Muñaa Bupilo? Bona! Ku utwa, ki se sinde ku fita matabelo.” (1 Samuele 15:22) Ka bukuswani, “ba ba na ni niti” kamba ba ba lukile ba ba ka pila ku ya ku ile mwa Paradaisi ki ba ba utwa litaelo za Mulimu ze ñozwi mwa Bibele.

ZE MU KONA KU EZA

Ku utwa litaelo za Mulimu ha ku talusi feela ku abananga mwa mikiti ya bulapeli. Ze mu eza ka zazi ni zazi za kona ku tabisa Mulimu kamba ku sa mu tabisa. Mwa kona ku ituta mwa ku tabiseza Mulimu ka ku nyakisisa Bibele ka tokomelo. Mi Mulimu haki ya taata ku mu tabisa. Bibele i bulela kuli “milao ya hae ha i imezi.” (1 Joani 5:3) Mulimu u nyolelwa ku mi fa mupuzo wa ku kena mwa Paradaisi kabakala kuli mwa mu utwa.

“Ba ba na ni niti ba ka yola sanda sa naha, ni ku yaha mwateñi ku ya ku ile.”—Samu 37:29.