KA KU YA KA BIBELE

Mwa Inezi Mulimu Mwa Inezi Mulimu

Mulimu u na ni mubili o cwañi?

“Mulimu ki Moya.”—Joani 4:24.

ZE I BULELA BIBELE Bibele i bulela kuli Mulimu ki moya. (2 Makorinte 3:17) Kamukwaocwalo, u ipitezi hahulu ku lu fita mi ha lu koni ku mu bona. Liñolo la 1 Timotea 1:17 li bulela kuli ki, “Mulena wa kamita, ya sa shwi, ya sa bonwi.” Bibele hape i bulela kuli: “Ha ku na mutu ya boni Mulimu haisali.”—1 Joani 4:12.

Mubupi wa luna u ipitezi hahulu ku lu fita kuli mane ha lu koni ku nahana ni kuli u bonahala cwañi. Liñolo la Isaya 40:18, li bulela kuli: “Mulimu, mu ka mu bapisa ni mañi? kamba ki siswaniso sifi se mu ka mu swanisa ka sona?” Nihaiba lika ze makaza ze mwa mahalimu ha li konwi ku bapanywa ni ya Maata-Ote.—Isaya 40:22, 26.

Nihakulicwalo, ku na ni libupiwa ze butali ze kona ku bona Mulimu, mane ni ku bulela ni yena pata ka pata. Kamukwaufi? Kabakala kuli ni zona ki mioya mi li pila kwa lihalimu. (1 Malena 22:21; Maheberu 1:7) Ka za libupiwa zeo ze ipitezi ku fita batu, ze bizwa hape kuli mangeloi, Jesu Kreste naa ize: “Kamita a bona pata ya Ndate ya kwa lihalimu.”—Mateu 18:10.

 Kana Mulimu u fumaneha kai ni kai?

“Mi cwale mina mu lapele cwana, mu li: ‘Ndataa luna ya kwa lihalimu.’”—Mateu 6:9.

ZE I BULELA BIBELE Bibele ha i luti kuli Mulimu u fumaneha kai ni kai ka nako kaufela sina maata-maata feela a mañwi a kona ku fumaneha kai ni kai. Kono, sina manzwi a Jesu mwa boniseza a kwa Mateu 6:9 ni 18:10, Mulimu u teñi luli, ki “Ndate” mi u pila mwa lihalimu, sona ‘sibaka sa hae.’—1 Malena 8:43.

Kwa mafelelezo a bupilo bwa hae, Jesu naa ize: “Ni siya lifasi mi ni ya ku Ndate.” (Joani 16:28) Hamulaho wa lifu la hae ni zuho ya hae sina mutu wa moya, Kreste naa kambamezi “mwa lihalimu tota, kuli a bonahale cwale fapilaa Mulimu.”—Maheberu 9:24.

Litaba ze ka za Mulimu ki za butokwa. Kabakalañi? Kabakala kuli Mulimu u teñi luli, lwa kona ku ituta ka za hae ni ku sutelela bukaufi ni yena. (Jakobo 4:8) Hape niti ka za Mulimu i lu sileleza kwa bulapeli bwa buhata, sina cwalo bulapeli bwa milimu ya maswaniso ye sa pili. Liñolo la 1 Joani 5:21 li bulela kuli: “Bana ba banyinyani, mu itibelele kwa milimu ya maswaniso.”

Batu ne ba ezizwe cwañi ka siswaniso sa Mulimu?

“Mulimu a eza mutu ka siswaniso sa hae; a mu eza ka siswaniso sa Mulimu. A ba eza ili muuna ni musali.”—Genese 1:27.

ZE I BULELA BIBELE Ka ku ba batu lu na ni buikoneli bwa ku bonisa tulemeno twa Mulimu to tu cwale ka lilato, katulo ye lukile, ni butali. Mane Bibele i bulela kuli: “Mu likanyise Mulimu, sina bana ba ba latwa, mi mu zwelepili ku zamaya mwa lilato.”—Maefese 5:1, 2.

Mulimu hape naa lu bupile ni tukelo ya ku iketela, mi i lu konisa ku keta ze lukile ku ze maswe ni ku bonisa lilato ku ba bañwi ka linzila ze shutana-shutana. (1 Makorinte 13:4-7) Hape lu na ni buikoneli bwa ku eza lika ze nca, ku ikola lika ze nde, ni ku itebuha lika ze makaza ze mwa lifasi le lu pila ku lona. Ku tuha fo, lwa kona ku lapela Mulimu, mi lu na ni takazo ya ku ituta ka za Mubupi wa luna ni tato ya hae ku luna.—Mateu 5:3.

Mo mu kona ku tusezwa ki niti ya mwa Bibele. Ha lu ituta hahulu ka za Mulimu ni ku mu likanyisa lu ka pila ka mwa naa lelezi kuli lu pile. Kabakaleo, lu ka ba ni tabo ye tuna mwa bupilo, lu ka kolwa ka ze lu na ni zona, ni ku ba ni kozo. (Isaya 48:17, 18) Kaniti, Mulimu wa ziba kuli batu ba itebuha tulemeno to tu nde twa na ni tona ili to tu tahisa kuli ba lipilu ze nde ba sutelele ku yena, mi ka ku eza cwalo ba ba mwa nzila ye isa kwa bupilo bo bu sa feli.—Joani 6:44; 17:3.