ZE EZAHALA MWA LIFASI

United States

Piho ya ba U.S. Department of Homeland Security i bulela kuli, mwa lilimo ze lishumi ze felile mapolisa ba kwa mabala a lifulai ba konile ku amuha batu lika ze hanisizwe ze fitelela 50 milioni. Mwa silimo sa 2011 feela, mapolisa ne ba konile ku swala litobolo ze fitelela 1,200 kwa batu ba ne ba kwela lifulai. Buñata bwa bañi ba litobolo zeo ne ba bulezi kuli ne ba li shimbile ka mukwa wa ku libala feela.

Brazil

Bazamaisi ba likolo ba kalile ku beyanga kapangaliko ka malaiti kwa mayunifomu a bana ba sikolo ka mulelo wa ku ba tuhelisa ku lofanga kwa sikolo. Kapangaliko kao, ka lumanga kashango kwa bashemi mwanaa bona a sa kena feela mwa sikolo, mi ka lumanga kashango ka mufuta u sili haiba a liyeha ka mizuzu ye fitelela 20.

Norway

Mwa Norway keleke ya Lutheran haisali yona bulapeli bwa naha. Ndu ya Milao ya mwa naha ye, ya atula lwa pili kuli milao ya naha i cinciwe ni kuli ku si ke kwa ba ni swalisano ye tuna hahulu mwahalaa Keleke ni Naha.

Czech Republic

Mwa patisiso ye ñwi ne ku fumanwi kuli buñata bwa babeleki ba mwa naha ya Czech Republic ne ba ikutwa kuli, ba swanela ku alabanga mawaile, mashango a fa Intaneti, ni a fa mawaile a ku fumbata a ama musebezi niha ba si yo kwa musebezi. Palonyana ya babeleki ne ba nga kuli ki ku sa kuteka kampani ku palelwa ku alaba kapili.

India

Ku si na taba ni kuli mwa lilimo ze 20 ze felile ku bile ni kekezeho ya 50 pesenti ya lico ze kutulwa ni litani ze eza 71 milioni za laisi ni buloto ze bulukiwanga, naha ya India i sa fumana taata ku fepa batu ba yona. Kwa bubeke bo bu bulukiwanga, batu ba mwa India ba amuhelanga feela ibato ba 40 pesenti ya bubeke bo. Ze ñwi za lika ze tahisa butata bo, ki bumutendasilya ni ku i sinyehela feela kwa lico.

[Manzwi a bañi ba siswaniso]

Airport screening: © Universal Images Group/age fotostock;

[Manzwi a bañi ba siswaniso]

Church: © Cephas Picture Library/Alamy;

[Manzwi a bañi ba siswaniso]

Grain stockpiles: AP Photo/Altaf Qadri