KA KU YA KA BIBELE

Jesu

Kana Jesu ki Mulimu?

“Ha ku na mutu ya boni Mulimu haisali.”—Joani 1:18.

ZE BA BULELA BATU Batu ba bañata ba lumela kuli Jesu haki Mulimu. Niteñi, ba bañwi ba amanga kwa litimana ze ñwi za mwa Bibele ze ngiwa kuli li bonisa kuli Jesu ni Mulimu ba likana.

ZE I BULELA BIBELE Bibele ha i buleli kuli Jesu ki Mulimu ya Maata Ote kamba kuli wa likana ni Mulimu. Kono i luta ka ku utwahala hande kuli Jesu ki yo munyinyani ku Mulimu. Ka mutala, mwa Bibele ku na ni manzwi a Jesu kasibili a li: “Ndate ki yo muhulu ku na.” (Joani 14:28) Bibele hape i bulela kuli: “Ha ku na mutu ya boni Mulimu haisali.” (Joani 1:18) Jesu ha koni ku ba Mulimu kabakala kuli batu ba bañata ne ba mu boni.

Balutiwa ba Jesu ba kwa makalelo ne ba si ka bulela kuli Jesu ne li Mulimu. Ka mutala, Joani muñoli wa buka ya Evangeli, naa bulezi cwana ka za litaba za naa ñozi kuli: “Li ñozwi kuli mu lumele kuli Jesu ki yena Kreste Mwanaa Mulimu.”—Joani 20:31. *

 Jesu naa pepilwe lili?

“Ne ku na ni balisana . . . ba ne ba pila mwa naheñi ba nze ba tonela mitapi ya bona busihu.”—Luka 2:8.

ZE BA BULELA BATU Batu ba bañwi ba ezanga mukiti wa Ngilisimusi la December 25 ili lizazi le li ngiwa ki batu ba bañwi kuli ki lona lizazi la naa pepilwe Jesu. Ba bañwi ba ezanga mukiti wa ku pepwa kwa Jesu kwa makalelo a January.

ZE I BULELA BIBELE Bibele ha i buleli lizazi la naa pepilwe Jesu. Nihakulicwalo, i bulela kuli ka nako ya naa pepilwe Jesu, “ne ku na ni balisana . . . ba ne ba pila mwa naheñi ba nze ba tonela mitapi ya bona busihu.” (Luka 2:8) Ku bonahala kuli ne ku si ke kwa konahala kuli balisana ba tonele mitapi ya bona ka nako ya busihu mwa naheñi mwa December ni January. Kabakalañi?

Sibaka sa naa pepezwi ku sona Jesu ku batanga hahulu mwa December ni January. Bibele i bulela kuli ka nako ya silimo yeo, batu ne ba “ngangama . . . kabakala pula ye tuna.” (Ezira 10:9, 13; Jeremia 36:22) Ka nako yeo ne ku sa konahali kuli balisana ba tonele mitapi ya bona “mwa naheñi.”

Kana Jesu naa kutezi kwa bupilo hamulaho wa ku shwa?

“Mulimu naa mu zusize [Jesu] kwa bafu.”—Likezo 3:15.

ZE BA BULELA BATU Batu ba bañwi ba lumela kuli ha ku konahali ku mutu ufi kamba ufi hamohocwalo ni Jesu ku kutisezwa kwa bupilo hamulaho wa lifu.

ZE I BULELA BIBELE Jesu naa lutile balateleli ba hae kuli naa ka “kopana ni manyando a mañata . . . ku bulaiwa ni ku zusiwa kwa bafu fa lizazi la bulaalu.” (Mateu 16:21) Bibele i biha kuli hamulaho wa ku bulaiwa ni ku zusiwa kwa bafu, Jesu naa bonahezi kwa batu ba ba fitelela 500. (1 Makorinte 15:6) Batu ba ne ba iponezi yena bao, ku si na ku kakanya ne ba kolwisizwe kuli Jesu naa zusizwe kwa bafu. Ne ba itatezi nihaiba ku shwa kabakala tumelo yeo!—Likezo 7:51-60; 12:1, 2.

KI KABAKALAÑI TABA YE HA I LI YA BUTOKWA KU MINA? Bibele i luta kuli lifu ni zuho ya Jesu li kwalula nzila ya kuli batu kaufela ba fumane tuso kwa sepiso ya mwa Bibele ya Paradaisi ya fa lifasi. (Samu 37:11, 29; Sinulo 21:3, 4) Lu na sepo ya ku ikola bupilo bwa tabo bo bu sa feli fa lifasi mwa Paradaisi kabakala lilato le lu bonisizwe ki Jesu ni Ndatahe, Mulimu ya Maata Ote, yena Jehova.—Joani 3:16; Maroma 6:23.

[Litaluso za kwatasi]