LIKANDE LA BO DAMI.

Kwa makalelo, bo ndate nebaopa feela mwa toho. Kono butuku bwa bo ndate hane butotobezi, bo ma babiza mota ya sipatela. Nisahupula baalafi ba sipatela habashimba bo ndate kuya ni bona. Nenisa zibi kuli lo, neli lona lwa mafelelezo kubona bo ndate. Hamulaho wa mazazi amalaalu, bo ndate babulaiwa ki butuku bwa kwa booko. Neninani feela lilimo ze 6.

Ka lilimo zeñata, niikutwanga mulatu kabakala lifu la bo ndate. Nisahupulanga bo ndate habato shimbiwa ki baalafi bale, mi niipuzanga kuli: ‘Ki kabakalañi hane nibuha feela zeneezahala? Kiñi hane nisikaeza sesiñwi?’ Hane nibonanga babahulu babakula, neniipuzanga kuli: ‘Ki kabakalañi ba bona habasa pila, haili fo bo ndate bona bashwile?’ Hamulaho wa nako, bo ma banitusa kutalusa maikuto aka. Mi ka kuba Lipaki za Jehova, mizwale ni likaizeli ba mwa puteho nebalutusize hahulu.

Batu babañwi banahana kuli mutu wakona kulila hamulaho feela wa kushwelwa ni kulibala kwateñi, kono lika nelisi cwalo kuna. Hamulaho wa kushwelwa, nenisika lila hahulu konji hanito kena mwa lilimo za kunonoboka.

Kelezo yaka ku babanca babashwezwi ki mushemi wabona ki ya kuli: “Muambole ni mutu yomuñwi ka za muinelo omukopana ni ona. Kubulelela yomuñwi maikuto amina, kwakona kumitusa kuba ni buikangulo bobunde.”

Niti kikuli kutaata kukopana ni miinelo yecwalo mwa bupilo inze niziba kuli bo ndate habayo ni na. Kono niomba-ombiwa ki sepiso ya mwa Bibele ye kwa Sinulo 21:4, yebulela kuli ona cwale-cwale fa, Mulimu, “Ukatakula miyoko kaufela kwa meeto [aluna], mi lifu halisana kubateñi, nihaiba kutahelwa ki maswabi kamba kulila kamba kuutwa butuku.”

LIKANDE LA BO DERRICK.

Lika zeñwi zenihupula, ki haneluyanga ni bo ndate kwa kushuta ni hane luyo pilanga ka nakonyana kwa malundu. Bo ndate nebalata hahulu malundu.

Bo ndate nebakatalizwe ki pilu ka nako yetelele, nahupula nikile nayo balekula kwa sipatela hañwi kamba habeli inze nisali mwanana. Kono nenisika lemuha kuli nebakula hahulu. Bo ndate nebabulailwe ki butuku bwa pilu hane ninani lilimo ze 9.

Hase bashwile, nenikuta-kutezi kulila. Neniikutwa kufipelwa, mi nenisa tabeli kuambola ni mutu ufi kamba ufi. Nalikuba niikutwe inge mone niikutwezi, mi nenisa tabeli kueza nto ifi kamba ifi. Sikwata sa  mitangana ba kwa keleke kone nilapela nebaniisize pilu kwa makalelo, kono hamulaho baitulela. Mwa sikwata mo, nebabulelanga kuli, “Nako ya bo ndataho ya kushwa neifitile” kamba “Bo ndataho baile kwa lihalimu.” Nenisautwisisi hande litaba zeo, kono nenisa zibi zeiluta Bibele luli fa litaba zeo.

Bo ma bakalisa kuituta Bibele ni Lipaki za Jehova, mi hasamulaho, na ni muhulwanaa ka lwakalisa kuituta. Neluitutile zeezahala ku mutu hashwa ni sepiso yeomba-omba ya Mulimu ya kuli ukazusa bafu. (Joani 5:28, 29) Kono liñolo lene linitusize hahulu neli la Isaya 41:10, ko Mulimu abulela kuli: “Usike wasaba, kakuli niinzi ni wena. Usike wabilaela, kakuli ki na Mulimu wahao. Nika kutiisa, ee, nika kutusa.” Kuziba kuli Jehova naali ni na, nekuniomba-ombile hahulu ka nako yene nili mwa maswabi, mi ni ka nako ye nisaikutwa kuomba-ombiwa.

LIKANDE LA BO JEANNIE.

Bo ma nebabulailwe ki kansa inze ninani lilimo ze 7. Zazi leo neniikutwa inge kuli nalola feela. Nisahupula kuli bo ma nebatimelezi kwa ndu mi bubeli bwa bo kuku kaufela nebaliteñi. Nahupula kuli batu kaufela ka nako yeo nebakuzize. Nahupula zazi leo nelulalezi mai a kuhalika. Neniikutwile kuli lifasi linifetuhezi.

Ka nako yeo, mane ni mwahala lilimo zeñata zefitile, neniinga kuli nenitokwa kuitiisa kuli nibabalele munyanaa ka, kacwalo nalika kupata maikuto aka. Mane nihaiba nako ye, nisaezanga nto yeswana, ili nto yekona kunitahiseza kukula butuku bobuñwi.

Nisahupula mo mizwale ni likaizeli mwa puteho yaluna ya Lipaki za Jehova nebalutuselize ni kulubonisa lilato. Nihaike kuli kona hane lusazo kala-kala kuyanga kwa Ndu ya Mubuso, balumeli ka luna nebalutusize inge kuli neluswalisani ni bona ka lilimo zeñata. Mane bo ndate nebatandile silimo inze basaapehi lico kabakala kuli nelutisezwanga lico nako ni nako.

Liñolo leliñwi lelinitusize hahulu ki la Samu 25:16, 17. Kwa liñolo leo, walisamu naakupile Mulimu kuli: “Unitalime mi unishemube, kakuli niinzi ninosi mi hakuna yanitusa. Manyando a mwa pilu yaka aekezehile; ufelise manyando aka.” Kwaniomba-omba kuziba kuli hanili mwa maswabi, kunani yanitusa. Mulimu uitukiselize kunitusa. Ka kutusiwa ki Bibele, nikonile kuitiisa mwa bupilo ni kuisa pilu kwa lika zende, zecwale ka sepiso yeomba-omba ya mwa Bibele, ya zuho ya bafu. Ninani sepo ya kuto bona bo ma hape ni kuto baziba hande inze banani buikangulo bobupetehile mwa paradaisi ya fa lifasi.—2 Pitrosi 3:13.

Kana mwatabela kuituta zeñata ka za taba ya mwa Bibele yeomba-omba batu baba mwa maswabi? Muikungele hatiso ya “Muta Mutu Yo Mu Lata Ha Timela” musatokwi kulifa sesiñwi. Mukene fa webusaiti ya www.ps8318.com, mi mubone mwatasaa LIHATISO > LIBUKA & LIBROSHUWA.