NIHAIKE kuli batu babañata habautwisisi hande lika zeama budimona ni tumelo ya mioya, mi baanga kuli lika zeo ki makande feela a buhata kamba ki litaba feela zebañolanga bañoli babali licaziba mwa kuñola litaba za mafilimu, Bibele yona inani mubonelo oshutana ni wo. Ifa litemuso zeutwahala hande ka za tumelo ya mioya. Ka mutala, liñolo la Deuteronoma 18:10-13 libulela kuli: “Mwa sicaba sahenu kusike kwafumanwa mutu . . . yalaula, wa mabibo, yalaula za kwapili, muloi, yaposa babañwi liposo, yabuza mulauli kamba sinuhi, kamba yabuza babashwile.” Ki kabakalañi? Liñolo leo lizwelapili kubulela kuli: “Mutu kaufela yaeza lika zeo ki yanyenyisa ku Jehova . . . Ube yasina mulatu fapilaa Jehova Mulimu wahao.”

Ki kabakalañi Bibele hainyaza hahulu litaba kaufela zeama tumelo ya mioya?

Bibele ilubulelela kuli pili Mulimu asika bupa kale lifasi, naabupile libupiwa za moya zeñata, ona mangeloi. (Jobo 38:4, 7; Sinulo 5:11) Leliñwi ni leliñwi la mangeloi ao, nelibupilwe ni tukuluho ya kuiketela kueza sesilukile kamba sesisika luka. Amañwi kwa mangeloi ao, aiketela kukwenuhela Mulimu, mi asiya libaka zaona mwa lihalimu, ni kutahisa bumaswe fa lifasi. Zeneezwile mwateñi ki za kuli mwa lifasi ‘kwatala mifilifili.’—Genese 6:2-5, 11; Juda 6.

Bibele ibulela kuli mangeloi amaswe ao asweli kukukueza hahulu ni kuyembulula batu babañata. (Sinulo 12:9) Mane asweli kuyembulula batu kabakala takazo yetuna yebanani  yona ya kubata kuziba za kwapili.—1 Samuele 28:5, 7; 1 Timotea 4:1.

Maata a budimona akona kubonahala inge atusanga batu babañwi. (2 Makorinte 11:14) Kono kubulela feela niti, mangeloi amaswe asweli kulika kufoufaza minahano ya batu kuli basike baziba niti ka za Mulimu.—2 Makorinte 4:4.

Kacwalo, Bibele ibonisa kuli kuswalisana ni mioya yemaswe kufosahalile. Kona libaka batu bane babata kuba balutiwa ba Jesu hane balutilwe niti ka za lika zecwalo. Mi batu bao ‘bane baezanga mabibo batisa libuka zabona ni kuto likubukanya hamoho mi balicisa,’ nihaike kuli nelitula hahulu.—Likezo 19:19.

Ka kuswana ni batu bao, kacenu batu babañata baikatulezi kuambuka kuitabisa ka lika zeama tumelo ya mioya. Ka mutala, bo Maria * hane banani lilimo ze 12, nekubonahala inge kuli nebakonanga kubulela lika zeñwi kamba likozi zekaezahala kwapili. Nebanuhanga ka kuitusisa makadi a mufuta omuñwi hane babanga ni balikani babona kwa sikolo, mi bakeñisa kuli lika zene banuhanga neliezahalanga, nebatabisizwe hahulu ki zibo yabona ya kunuha.

Bo Maria nebanahana kuli Mulimu naabafile mpo ya kunuha kuli batuse batu. Bo Maria babulela kuli: “Kono kunani nto yene ninyemisanga. Nenikona feela kuitusisa makadi ao kunuha zeneka ezahala mwa bupilo bwa babañwi. Nenisakoni kuitusisa ona kuli nizibe zeneka niezahalela kwapili nihaike kuli nenibatanga kuziba zekaezahala mwa bupilo bwaka kwapili.”

Bo Maria nebapalezwi kufumana likalabo za lipuzo zeñata, kacwalo balapela ku Mulimu, hamulaho bapotelwa ki Lipaki za Jehova, mi Lipaki bao bakalisa kuituta ni bona Bibele. Bo Maria nebaitutile mwa Bibele kuli buikoneli bwabona bwa kubulela zekaezahala kwapili, nebusazwi ku  Mulimu. Hape bo Maria nebaitutile kuli batu bababata kuba balikani ba Mulimu, baswanela kutuhela kuitusisa lika kaufela zeama tumelo ya mioya. (1 Makorinte 10:21) Ki lika mañi zenezwile mwateni? Bo Maria bayumba lika zabona kaufela zeama tumelo ya mioya. Ka nako ya cwale, bo Maria baikambotanga ni babañwi niti yenepahezi yebaitutile mwa Bibele.

Bo Michael hane basanonoboka, nebali babali babatuna ba libuka za makande a batu bane baezanga lika za budimona. Babulela kuli: “Neniikolanga kubala makande a batu benilikana ni bona bane baezanga lika zetuna za kuikupulela, ili bane batumile hahulu.” Hanyinyani-hanyinyani, bo Michael batwaela kubalanga libuka zebulela za mabibo ni lika za budimona. Bo Michael babulela kuli: “Takazo ya kubata kuziba lika neinitahiselize kuli nikalise kubala libuka za mabibo ni kubuha mafilimu abonisa lika za budimona.”

Nihakulicwalo, litaba zene baitutile bo Michael mwa Bibele, nelibatusize kulemuha kuli nebatokwa kunyakisisa ka tokomelo zene babala. Bo Michael babulela kuli: “Neniñozi mukoloko wa lika kaufela zeneama tumelo ya mioya, mi nalisinya kaufela zona. Neniitutile tuto ya butokwa hahulu. Kwa 1 Makorinte 10:31, Bibele ibulela kuli: ‘Mueze lika kaufela kuli Mulimu akanyiswe ka zona.’ Cwale niipuzanga kuli, ‘Kana litaba zenibala litahisa kuli nieze lika zesa kanyisi Mulimu?’ Haiba kucwalo, niswanela kutuhela kubala lika zecwalo.”

Bibele italuswa hande kuli ki lambi. Mi ki yona yetalusa hande kuli tumelo ya mioya ki nto mañi luli. (Samu 119:105) Kono kunani litaba zeñata ze mwa Bibele. Ibulela za sepo yende ya kwapili ili ya lifasi mokusike kwaba ni mioya yemaswe. Batu bakaikola lika zende zeñata ka nako yeo. Ka mutala, Samu 37:10, 11 ibulela kuli: “Kusiyezi feela nakonyana, mi babamaswe habasana kubateñi; ukatalima fone bainzi, kono habana kufumaneha fateñi. Kono babaishuwa bakaluwa lifasi, mi bakataba hahulu kabakala kozo yetuna.”