Kutiisa Silikani Samina ni Mulimu
Sina mone lubonezi mwa taba yapili ya magazini ye, batu babañata baanga Bibele kuba buka yekenile. Batu bao baikutwa kuli kubala Bibele ni kulatelela litaba zebabala, kubatusa kuba ni silikani sesinde ni Mulimu ni kuziba zebapilela.
Mwa Bibele, pulelo ya “za kwa moya” kamba silikani sa mutu ni Mulimu, iama kwa mubonelo wanani ona mutu ka za bupilo. (Juda 18, 19) Batu ba kwa moya baanga likuka za Mulimu kuba za butokwa ili kushutana ni mutu wa kwa nama yaisa hahulu pilu ku za hae.—Maefese 5:1.
SEPO
SIKUKA SA MWA BIBELE: “Haiba uzwafa mwa linako za butata, maata ahao akaba amanyinyani.”—Liproverbia 24:10, litaluso ze kwatasi.
ZESITALUSA SIKUKA: Kuzwafa kukona kutahisa kuli lupalelwe kuitiisa halukopana ni miinelo yetaata. Kono kuba ni sepo kukona kulutusa kuzwelapili kuitiisa mwa miinelo yecwalo. Kuziba kuli miinelo yetaata yelukopana ni yona haina kuina kuya kuile kwakona kuluomba-omba, mane lwakona kuituta lika zende kwa miinelo yeo.
ZEMUKONA KUEZA: Munahanisise ka za lika zende zekaezahala kwapili. Mwa sibaka sa kubilaezwa ki lika zekona kuezahala kamba kulibelela kuli miinelo icince, mueze momukonela kaufela kuli mupete mulelo wamina. Kusina taba ni buikatazo bolukona kueza, mañi ni mañi waluna wakona kutahelwa ki “likezahalo zesika libelelwa.” (Muekelesia 9:11) Kono niti ki kuli, hañata lika zakona kuyo ba hande kwapili kufita molunahanela. Kacwalo, kuli luutwisise sisupo se, Bibele iitusisa mutala wa zebaezanga balimi, ili: “Cala peu yahao kakusasana, mi lizoho lahao lisike lapumula kuisa manzibwana; kakuli hauzibi kuli ki peu ifi yekakonda, mwendi ki ye kamba yani, kamba mwendi bubeli bwazona likamela.”—Muekelesia 11:6.
LIKALABO KWA LIPUZO ZA BUTOKWA ZA MWA BUPILO
SIKUKA SA MWA BIBELE: ‘Unife kutwisiso. Linzwi lahao ki niti.’—Samu 119:144, 160.
ZESITALUSA SIKUKA: Mwa Bibele kunani likalabo kwa lipuzo zebabuzanga batu babañata. Ka mutala, Bibele ialaba lipuzo zecwale ka ze:
-
Lusimuluha kai?
-
Lupilelañi?
-
Ki sika mañi sesiezahalanga ku mutu hashwa?
-
Kana bupilo bo ki bona feela bobuliteñi?
Batu babañata-ñata mwa lifasi kaufela banani tabo mwa bupilo bwabona bakeñisa kuli bafumani likalabo mwa Bibele kwa lipuzo zeo ni zeñwi zeñata.
ZEMUKONA KUEZA: Munyakisise zeiluta Bibele. Mukupe yomuñwi wa Lipaki za Jehova kuli amituse kuutwisisa zeiluta Bibele. Mukene fa webusaiti yaluna ya jw.org/loz kamba mufumanehe kwa mikopano yaluna komusike mwalifa sesiñwi, mi batu kaufela balukuluhile kuto kopana ni luna.
LIKUKA ZEÑWI ZA MWA BIBELE
Mubuhe vidio yeli, Ki Kabakalañi Haluswanela Kuituta Bibele? fa webusaiti ya jw.org. Vidio ye yafumaneha mwa lipuo zefitelela 880
MULEMUHE KULI MUTOKWA KUZIBA ZA MULIMU.
“Tabo ki ya babalemuha kuli batokwa za Mulimu.”—MATEU 5:3.
MUITUTE ZEÑATA KA ZA MULIMU YABULEZWI MWA BIBELE.
‘Mubate Mulimu ni kumufumana luli, Haayo kwahule ni mañi ni mañi waluna.’—LIKEZO 17:27.
MUBALE NI KUNAHANISISA LITABA ZA MWA BIBELE.
“Utabela mulao wa Jehova, * mi waubala ni kuunahanisisa, musihali ni busihu. . . . Zaeza kaufela likakonda.”—SAMU 1:2, 3.
^ para. 23 Jehova ki lona libizo la Mulimu ka moliboniselizwe mwa Bibele.
Hape Mwendi Mwakona Kutabela Litaba Ze
LIKALABO KWA LIPUZO ZA BIBELE
Kulata Lika za Kwa Moya Kutalusañi? Kana Nakona Kuba Mutu wa Kwa Moya Kusina Kuswalisana ni Bulapeli Bobuñwi?
Lika zetaalu zekona kumitusa kutiya kwa moya, ni lika zeene zekona kumitusa kulemuha mihupulo yefosahezi.
TAWALA YA MULIBELELI
Bibele Ikona Kunitusa Cwani Mwa Bupilo Bwaka?
Mwa buka ye yeneñozwi kwa ikale kunani kelezo yetusa hahulu.
