“Lipaki nebasa bonisangi feela batu sishemo kono hape nebaezanga hande ni tunjanana twaka. Zazi leliñwi, musali yabizwa Elaine yanaayemi kwatuko ni tukalani, afa tunjanana twaka totubeli mambisikiti. Hamulaho wa fo, nako kaufela hane lufitanga bukaufi ni tukalani, tunjanana twaka netubatanga kuya kwa Lipaki kuli tuyo ca mambisikiti.

“Kwafita likweli lisikai kuzwa fo. Tunjanana twaka netufiwanga mambisikiti, mi na neniikolanga lipuisano zekuswani zene nibanga ni zona ni Lipaki. Kono nenisa tabelangi kuambola ni bona ka nako yetelele. Nese nifitelezi lilimo ze 70 mi nenisa zibi hande zene balumela Lipaki za Jehova. Bakeñisa kuli nenizwafisizwe hahulu ki bulapeli bobuñata, naikatulela kuituta Bibele ninosi.

“Mwahalaa nako yeo, nenibonanga Lipaki babañwi mwa libaka zeshutana-shutana za tolopo inze bayemi kwatuko ni tukalani twabona twa lihatiso. Ni bona nebanani silikani. Kamita, nebaalabanga lipuzo zaka ka kuitusisa Bibele, mi taba yeo neitahisize kuli nibasepe hahulu.

“Zazi leliñwi, bo Elaine banibuza kuli: ‘Kana mwaziba kuli lifolofolo ki mpo yezwa ku Mulimu?’ Naalaba kuli: ‘Eni, naziba cwalo luli!’ Bo Elaine cwale banibalela liñolo la Isaya 11:6-9. Kuzwa honafo, nakala kutabela kuituta Bibele kono nenisa zina-zina kubala lihatiso za Lipaki.

“Mwa mazazi anaatatami kuzwa fo, neniikolanga lipuisano zekuswani zene nibanga ni zona ni bo Elaine ni bakubona bo Brent. Banikupa kubala Bibele kuzwa Mateu kuisa Likezo kuli niutwisise sekutalusa kulikanyisa Kreste. Naeza cwalo. Nakonyana kuzwa fo, nakalisa kuituta Bibele ni bo Brent ni bo Elaine. Nenikalile kueza cwalo fahalaa silimo sa 2016.

“Neninyolelwanga kuituta Bibele sunda ni sunda ni kufumaneha kwa mikopano ya puteho kwa Ndu ya Mubuso. Nenitabile hahulu hane niitutile zeiluta Bibele. Hamulaho wa silimo kuzwa fo, naba Paki yakolobelizwe. Cwale seninani lilimo ze 79, mi naziba kuli nifumani bulapeli bwa niti. Jehova unifuyauzi ka kunitusa kuba mwa lubasi lwa batanga bahae babaineezi ku yena.”