HAIBA mina kamba mutu yomuñwi yomulata mukula butuku bobutuna bobukona kumibulaya, uzibe mwautwisisa mobaikutwela batu baba mwa muinelo ocwalo. Kwandaa kuli mukula butuku bobutuna, fokuñwi mukona kunyema-nyema kusina libaka lelituna luli. Ba sipatela habanze bamikupanga kuli muye kwateñi bayo mifa mufuta omuñwi wa likalafo, kamba hakuli taata kufumana likalafo kamba kufumana masheleñi a kulifela likalafo, kamba hamukula butuku bobuñwi hape bobutahiswa ki milyani yemunwa, mwakona kukenelwa ki sabo ni kubilaela. Kukula butuku bobutuna kukona kumibilaeza hahulu.

Ki lika mañi zekona kumitusa? Kuitinga ku Mulimu ka kulapela ni kubalanga litaba zeomba-omba za  mwa Bibele, kutusize hahulu batu babañata. Kuzwa fo, haiba batu ba mwa lubasi lwamina ni balikani bamina bamibonisa lilato ni kumibabalela, mukaikutwa kuomba-ombiwa.

Bo Robert, babanani lilimo ze 58, babulela kuli: “Mube ni tumelo ku Mulimu hamukula mi ukamitusa kuitiisa. Mulapelange ku Jehova. Mumubulelele momuikutwela. Mumukupe kuli amife moya okenile. Mumukupe kuli amituse kuba ni mubonelo oswanela ka za butuku bwamina ni kumukupa kuli amife maata a kuitiisa.

Bo Robert bazwelapili kuli: “Mutu uomba-ombiwangwa hahulu haiba ba mwa lubasi lwahae bamubabalela. Zazi ni zazi batu banilizezanga ni kunibuza monizuhela. Balikani baka babapila mwa libaka zeshutana-shutana banisusuezanga. Banitusanga kuli niikutwe hande mi nto yeo initusa kuzwelapili kuitiisa mwa bupilo.”

Haiba muyopotela mulikanaa mina yakula, munyakisise zebabulela bo Linda. Bali: “Mukuli utabelanga kubonisa kuli haakuli mi mwendi hatabeli kuli nako ni nako muambolange za kukula kwahae. Kacwalo, hamupotela mulikanaa mina yakula, muambole litaba lisili feela.”

Ka tuso ya Mulimu ni litaba zeomba-omba za mwa Mañolo, hamohocwalo ni tuso yebalufa ba mwa lubasi ni balikani baluna, lwakona kuba ni sepo ya kuli lika likaba hande kwapili nihaike kuli lukula butuku bobutuna.