MANZWI aa fahalimu ao, naabulezwi ki Davida wa mwa Isilaele wa kwaikale hanaalumba musali yanaakopani ni yena. Libizo la musali yo ki Abigaili. Ki sika mañi sene sitahisize kuli Davida alumbe musali yo, mi lukona kuitutañi kwa mutala wa musali yo?

Davida naakopani ni musali yanyezwi yo, ka nako yanaabaleha kusaba Mulena Saule. Abigaili naanyezwi ku Nabali, muuna yanaafumile hahulu, ili yanaafulisezanga mitapi yahae yemituna mwa sibaka sa malundu sene sili kwa mboela wa Juda. Davida ni baana bahae ‘nebaswana sina limota lene lisileleza’ balisana ba Nabali ni mitapi yahae. Cwale zazi leliñwi, Davida alumela linumwana ku Nabali, kuli bayo kupa lico ‘zanaaka mufa kaufela.’ (1 Sam. 25:8, 15, 16) Kupo yeo neiswanela luli, sihulu halunahana mo Davida ni baana bahae nebasilelelize maluwo a Nabali.

Kono Nabali, ili yo libizo lahae litalusa “Yasina ngana” kamba “Sitoto,” naaezize ka kuya ka taluso ya libizo lahae. Naaalabile ka mabifi ni ka kashwau, ni kuhana kupo ya Davida. Kacwalo, Davida aitukiseza kuyo fa Nabali koto kabakala kalabo yahae ya kashwau ni yebonisa kutokwa kutwisiso. Nabali ni ba ndu yahae nebaka fiwa koto kabakala butoto bwahae.—1 Sam. 25:2-13, 21, 22.

Abigaili ka kulemuha kozi yeo Davida naalela kutahiseza ba ndu ya Nabali, aanga muhato one utokwa bundume wa kuli atibele kozi yeo. Abigaili akupa Davida ka likute kuli asike aeza lika zeneka sinya silikani sahae ni Jehova. Mi afa Davida ni baana bahae lico zeñata, ili yo naakaba yena mulena yatatama. Mi Davida alemuha kuli Jehova naaitusisize Abigaili kumutibela kueza nto yeneka mutahiseza kuba ni mulatu fapilaa Mulimu. Davida naabulelezi Abigaili kuli: “Haike ufuyolwe kabakala temuho yahao! Haike ufuyolwe kabakala kunitibela kuba ni mulatu wa kusulula mali kacenu.”—1 Sam. 25:18, 19, 23-35.

Kaniti luli, halutabeli kuba sina Nabali, ka kusaitebuhanga lika zende zeluezezwa. Kutuha fo, halulemuha kuli kunani muinelo omaswe okona kubateñi, luswanela kueza molukonela kaufela kuli lutibele muinelo wo. Kaniti, lwakona kubulela manzwi anaabulezi walisamu, yanaabulelezi Mulimu kuli: “Unilute ngana ni zibo.”—Samu 119:66.

Batu babañwi bakona kulemuha kuli lunani butali, kamba temuho, ka lika zelueza. Ibe kuli batu bao baka lubulelela cwalo kamba kutokwa, bakana baikutwa sina Davida, yanaaize: “Ufuyolwe kabakala temuho yahao!”