Mu Sepe Jehova ka ku Tala mwa Linako Ze T’ata
Mu Sepe Jehova ka ku Tala mwa Linako Ze T’ata
“Mulimu ki sisabelo sa luna ni mata a luna, ki tuso ye fumanwa kapili mwa nako ya ziyezi.”—SAMU 46:1.
1, 2. (a) Ki mutala mañi o bonisa kuli ku bulela fela kuli lu sepile Mulimu ha ku si ka likana? (b) Ki kabakalañi ha lu sa lukeli ku bulela fela kuli lu sepile Jehova?
KU BULELA fela kuli lu sepile Mulimu kwa shutana ni ku bonisa cwalo ka likezo za luna. Ka mutala, pulelo ye li “In God We Trust” (Lu Sepile Mulimu) se i bile fa masheleñi a kwa America ka nako ye telele. * Ka 1956, ba Ndu ya Milao ya mwa America ne ba tomile mulao wa kuli pulelo yeo i be yona mukanga wa naha ya United States. Ka ku komokisa, batu ba bañata, isi fela mwa America, kono mwa lifasi kaufela, ba sepile hahulu mali ni bufumu ku fita mo ba sepezi Mulimu.—Luka 12:16-21.
2 Ka ku ba Bakreste ba niti, ha lu lukeli ku bulela fela kuli lu sepile Jehova. Sina haili kuli “tumelo, ha i si na misebezi, i shwile,” ku ipulela kuli lu sepile Mulimu ha ku na tuso haisi ha lu bonisa cwalo ka likezo za luna. (Jakobo 2:26) Mwa taba ye felile, ne lu itutile kuli sepo ya luna ku Jehova i boniswa ha lu lapela ku yena, ha lu bata ketelelo ya Linzwi la hae, ni ha lu itinga kwa kopano ya hae kuli i lu etelele. Cwale ha lu nyakisiseñi mo lu kona ku ezeza lika ze talu zeo mwa linako ze t’ata.
Musebezi Ha U Felile Kamba Ha ku Si Na Hande Mali
3. Batanga ba Jehova ba talimananga ni butata mañi ku za mali mwa “linako ze tata” ze, mi lu ziba cwañi kuli Mulimu wa tabela ku lu tusa?
3 Mwa “linako ze tata” ze, luna Bakreste lu banga ni butata ku za mali sina batu ba bañwi kaufela. (2 Timotea 3:1) Kacwalo, lu kana lwa zwiswa fa musebezi ka ku sa libelela. Kamba lu kana lwa tokwa ku beleka lihora ze ñata kono inze lu hola mali a manyinyani. Mwa miinelo ye cwalo, ku kana kwa lu bela t’ata ku ‘babalela ba ndu i liñwi ni luna.’ (1 Timotea 5:8) Kana mwa linako ze cwalo, Mulimu Y’a Pahami ka ku Fitisisa wa tabela ku lu tusa? W’a tabela luli! Ki niti kuli Jehova h’a lu silelezi kwa matata kaufela a bupilo mwa muinelo wo wa linto. Kono ha lu mu sepa, ze ñozwi kwa Samu 46:1 li ka ezahala ku luna, kuli: “Mulimu ki sisabelo sa luna ni mata a luna, ki tuso ye fumanwa kapili mwa nako ya ziyezi.” Kono lu kona ku bonisa cwañi kuli lu sepile Jehova ka ku tala ha lu na ni butata ku za mali?
4. Ha lu na ni butata ku za mali, lu kona ku lapelela nto mañi, mi Jehova u ezanga cwañi ka za litapelo ze cwalo?
4 Nzila ya pili ya ku bonisa ka yona kuli lu sepile Jehova ki ka ku lapela ku yena. Kono ki lifi ze lu kona ku lapelela? Ha lu na ni butata ku za mali, lu kana lwa tokwa hahulu butali bwa mwa ku ezeza lika. Kacwalo, lu bu lapelele! Linzwi la Jehova li lu sepisa kuli: “Mutu ku mina h’a tokwa butali, a bu kupe ku Mulimu ya fanga batu kamukana ka bufani bo butuna, a sa kanani; mi u ka bu fiwa.” (Jakobo 1:5) Ee, mu kupe butali ku Jehova, ili ku kona ku sebelisa hande zibo, kutwisiso, ni temuho, ilikuli mu eze likatulo ni liketo za ngana. Ndat’a luna ya kwa lihalimu ya lilato u lu sepisa kuli u ka utwa litapelo ze cwalo. U tabela kamita ku lukisa linzila za bote ba ba mu sepa ka pilu kaufela.—Samu 65:2; Liproverbia 3:5, 6.
5, 6. (a) Ki kabakalañi ha lu kana lwa itinga fa Linzwi la Mulimu kuli li lu tuse ku tatulula butata bwa za mali? (b) Ha lu zwisiwa fa musebezi, lu kona ku ezañi kuli lu fukuze kwa lipilaelo?
5 Nzila ye ñwi ya ku bonisa ka yona kuli lu sepile Jehova ki ha lu itinga fa Linzwi la hae kuli li lu etelele. Litaelo za hae ze butali ze mwa Bibele li bonahezi ku ba za “niti luli.” (Samu 93:5) Niha ne i felizwe ku ñolwa lilimo ze fitelela 1,900 kwamulaho, yona buka ye ñozwi ka ketelelo ya moya wa Mulimu yeo i na ni likelezo ni temuho ye tuna ye sepeha, ye kona ku lu tusa ku tatulula hande butata bwa za mali. Mu nyakisise mitala ye miñwi ya butali bwa mwa Bibele.
6 Kale k’o, Salumoni mulena ya butali n’a ize: “Ku mutu wa misebezi buloko ki bo bunde, nih’a ca hahulu kamba hanyinyani. Kono ku fuma kwa muluwi ha ku mu fi buloko.” (Muekelesia 5:12) Ku lukisa, ku kenisa, ku babalela, ni ku sileleza maluwo a luna ku tokwa nako ni mali. Kacwalo, ha lu zwisiwa fa musebezi, lu kana lwa tatubisisa bupilo bwa luna, ili ku lika ku ketahanya ze lu tokwa ku ze lu bata fela. Kuli lu fukuze kwa lipilaelo, ne ku ka ba hande ku eza licinceho. Ka mutala, kana lwa kona ku nolofaza bupilo bwa luna, mwendi ka ku tutela mwa ndu ye nyinyani, kamba ku fukuza kwa maluwo a’ si a butokwa?—Mateu 6:22.
7, 8. (a) Jesu n’a bonisize cwañi kuli n’a ziba kuli batu ba ba si ka petahala ba kona ku bilaela hahulu ka za lika za kwa mubili? (Mu bone ni litaluso za kwatasi.) (b) Jesu n’a file kelezo mañi ye butali ka za mwa ku pimela ku bilaela hahulu?
7 Mwa Ngambolo ya fa Lilundu, Jesu n’a elelize kuli: “Mu si ke mwa bilaela ka za bupilo bwa mina, ka se mu ka ca, ni ka se mu ka nwa; nihaiba ka za mibili ya mina, ka se mu ka apala.” * (Mateu 6:25) Jesu n’a ziba kuli ki nto ya ka taho kwa batu ba ba si ka petahala ku iyakatwa za ku ipilisa ka zona. Kono lu kona ku tuhela cwañi ku “bilaela” ka za lika ze cwalo? Jesu n’a ize: “Mu bate pili mubuso.” Lu be ni butata bufi kamba bufi, ku lapela Jehova ku lukela ku zwelapili ku ba kwa pili mwa bupilo bwa luna. Haiba lu eza cwalo, ze lu tokwa kaufela ka zazi lu “ka li ekelezwa” ki Ndat’a luna wa kwa lihalimu. Ka nzila ye ñwi, u ka lu konisa ku fumana ze lu tokwa.—Mateu 6:33.
8 Jesu n’a file kelezo ye ñwi hape, kuli: “Mu si ke mwa bilaelela za kamuso; kakuli la kamuso li ka ipatela za lona.” (Mateu 6:34) Ku bilaela ka za ze kana za taha kamuso haki nto ye nde. Caziba yo muñwi wa za Bibele n’a ize: “Ze ezahalanga kwapili ha li bangi ze sabisa ka mo lu nahanelanga.” Ku utwa ka buikokobezo kelezo ya Bibele ya ku beya kamita lika za butokwa mwa sibaka sa pili ni ku sa bilaela za lizazi le li tatama ku kona ku lu tusa ku sa bilaela hahulu.—1 Pitrosi 5:6, 7.
9. Ha lu na ni butata bwa za mali, lu kona ku fumana tuso mañi mwa lihatiso za “mutanga ya sepahala, ya na ni kutwisiso”?
9 Ha lu na ni butata bwa za mali, hape lu kona ku bonisa kuli lu sepile Jehova ka ku bala lihatiso za “mutanga ya sepahala, ya na ni kutwisiso” kuli lu fumane tuso. (Mateu 24:45) Ka linako ze ñwi, magazini ya Awake! i bile ni litaba mo ku na ni likelezo ni liakalezo za mwa ku tatululela butata bwa za mali. Taba ye li “Out of a Job—What Are the Solutions?” (Mu Kona ku Eza Cwañi Ha Mu Zwile fa Musebezi), ye mwa Awake! ya August 8, 1991, ne i bonisize lisupo ze 8 ze tusize ba bañata ku ziba za ku eza ka za mali ni maikuto ka nako ye ba sa sebezi. * Kono likelezo ze cwalo li lukela ku zamaelela ni mubonelo o swanela wa butokwa luli bwa mali. Sisupo seo ne si buhisanwi mwa taba ye li “Something More Vital Than Money” (Nto Ya Butokwa ku Fita Mali), ye n’e hatisizwe mwa Awake! ye swana.—Muekelesia 7:12.
Ha Lu Na ni Butata bwa Makulanu
10. Mutala wa Mulena Davida u bonisa cwañi kuli ku sepa Jehova kwa swanela ha lu kula hahulu?
10 Kana ku sepa Jehova ha lu kula hahulu kwa swanela? Kwa swanela luli! Jehova wa utwelanga butuku bakuli kwa batu ba hae. Mi sihulu, wa tabela ku ba tusa. Ka mutala, mu nahane Mulena Davida. Mwendi yena ka sibili n’a kula ha n’a ñozi ka za m’o Mulimu a ezeza ku ya lukile h’a kula. N’a ize: “[Muñ’a] Bupilo u ka mu tiisa h’a lobezi mwa bulobalo bwa butuku: u mu bonela bulobalo bwa hae kaufela h’a kula.” (Samu 41:1, 3, 7, 8) Sepo ya Davida ku Mulimu ne i tiile kamita, mi kwa mafelelezo mulena y’o n’a folile. Kono lu kona ku bonisa cwañi kuli lu sepile Mulimu ha lu kula?
11. Ha lu kula, lu kona ku kupañi ku Ndat’a luna ya kwa lihalimu?
11 Ha lu kula, nzila ye ñwi ye lu kona ku bonisa ka yona kuli lu sepile Jehova ki ha lu kupa ku yena ka tapelo kuli lu tiye. Lwa kona ku mu kupa kuli a lu tuse ku sebelisa “butali” ilikuli lu bate mo lu ka folela ka mo i konahaliseza miinelo ya luna. (Liproverbia 3:21) Hape lwa kona ku mu kupa kuli a lu tuse ku ba ni pilu-telele ni ku tiya mwa butuku b’o. Sa butokwa ni ku fita, ne lu ka bata ku kupa kuli Jehova a lu tiise, ili ku lu fa m’ata a ku zwelapili ku sepahala ku yena ni kuli lu si ke lwa leuka, ku ezahale sifi kamba sifi. (Mafilipi 4:13) Ku bukeleza busepahali bwa luna ku Mulimu ku butokwa ku fita ku bukeleza bupilo bwa luna bwa cwale. Haiba lu zwelapili ku sepahala, Mufani yo mutuna wa mupuzo u ka lu fa bupilo bo bu sa feli bo bu petehile, bo bu si na mapongo.—Maheberu 11:6.
12. Ki likuka mañi za mwa Mañolo ze kona ku lu tusa ku eza likatulo ze nde ka za likalafo?
12 Ku sepa Jehova kwa luna hape ku lu susumeza ku itinga fa Linzwi la hae, yona Bibele, kuli i lu etelele. Likuka ze mwa Mañolo li kona ku lu tusa ku eza likatulo ze nde ka za likalafo. Ka mutala, ka ku ziba kuli Bibele ya nyaza “buloi,” ne lu ka pima litaula kamba likalafo ze ama mioya. (Magalata 5:19-21; Deuteronoma 18:10-12) Ki wo mutala o muñwi wa butali bwa mwa Bibele bwa niti: “Sikuba si lumela taba kaufela; kono ya na ni ngana u talimisisa mw’a hata.” (Liproverbia 14:15) Kacwalo, ha lu nahana za likalafo, ne lu ka eza hande ku bata litaba ze sepeha ku fita ku “lumela taba kaufela.” “Kutwisiso” ye cwalo i kona ku lu tusa ku nyakisisa hande ze lu kona ku eza ni ku eza katulo ye na ni mutomo.—Tite 2:12.
13, 14. (a) Ki litaba mañi ze luta ka za makulanu ze s’e hatisizwe mwa limagazini za Tora ya ku Libelela ni Awake!? (Mu bone sikwenda se si fa likepe 17.) (b) Ki likelezo mañi ka za ku talimana ni matuku a’ sa foli ze n’e filwe mwa Awake! ya January 22, 2001?
13 Hape lu kona ku bonisa kuli lu sepile Jehova ka ku eza lipatisiso mwa lihatiso za mutanga ya sepahala. Limagazini za Tora ya ku Libelela ni Awake! fokuñwi li hatisize litaba ze tusa ka za matuku a mañata a shutana-shutana. * Fokuñwi, mwa limagazini zeo ku hatisizwe litaba za batu ba ba konile ku tula buhole ni matuku a’ shutana-shutana. Hape, litaba ze ñwi li file liakalezo za ka Mañolo ni likelezo ze sebeza ka za mwa ku pilela ni matuku a’ sa foli.
14 Ka mutala, mwa Awake! ya January 22, 2001, ne ku bile ni taba ye li “Comfort for the Sick” (Litaba Ze Omba-Omba Bakuli). Mwa litaba zeo ne ku filwe likuka za Bibele ze tusa, hamoho ni ze n’e bulezwi ki batu be ne ba buhisanwi ni bona ba ba na ni yeloseli ili ba ba kulile matuku a matuna ka lilimo-limo. Taba ye li “Living Successfully With Your Ailment—How?” (Mo Mu Kona ku Pilela ni Makulanu a Mina) ne i file kelezo ye: Mu itute ze mu kona kaufela ka za butuku bwa mina. (Liproverbia 24:5) Mu eze milelo ye kona ku sebeza, ili ku kopanyeleza ni milelo ya ku tusa ba bañwi, kono mu hupule kuli mwendi ha mu na ku kona ku peta ze ba kona ku peta ba bañwi. (Likezo 20:35; Magalata 6:4) Mu si ke mwa ikauhanya ku ba bañwi. (Liproverbia 18:1) Mu biseze ba bañwi bunolo ku mi potela. (Liproverbia 17:22) Sa butokwa ni ku fita, mu zwelepili ku ba bukaufi ni Jehova ni puteho. (Nahumi 1:7; Maroma 1:11, 12) Kana ha lu itebuhi ketelelo ye nde yeo Jehova a fa ka kopano ya hae?
Muta Bufokoli bwa Nama Bu Sa Feli
15. Muapositola Paulusi n’a konile ku tula cwañi ndwa ya hae ya ku lwanisa bufokoli bwa nama, bwa ku sa petahala, mi lu kona ku kolwa lika mañi?
15 Muapositola Paulusi n’a ñozi kuli: “Bunde ha bu si ka ina ku na, kikuli mwa nama ya ka.” (Maroma 7:18) Paulusi n’a izibela hande mo ku kona ku bela t’ata ku lwanisa litakazo ni bufokoli bwa ku sa petahala. Kono Paulusi hape n’a kolwa kuli n’a kona ku tula. (1 Makorinte 9:26, 27) Ka nzila ifi? Ka ku sepa Jehova ka ku tala. Ki lona libaka Paulusi ha n’a kona ku bulela kuli: “Ni mutu ya maibile cwañi! Ki mañi ya ka ni liulula kwa mubili wo wa lifu? N’itumezi ku Mulimu, ka Jesu Kreste Mulen’a luna.” (Maroma 7:24, 25) Luna bo? Ni luna lu na ni ku lwanisa bufokoli bwa nama. Ha lu nze lu lika ku lwanisa bufokoli b’o, ku felelwa ki sepo ku bunolo, ili ku kolwa kuli ha lu na ku tula. Kono Jehova u ka lu tusa haiba, sina Paulusi, lu itinga ku yena ka ku tala, isi ku itinga fa m’ata a luna.
16. Haiba bufokoli bwa nama ha bu feli, lu tokwa ku lapelelañi, mi lu swanela ku ezañi haiba lu kutela bufokoli bo bu swana?
16 Haiba bufokoli bwa nama ha bu feli, lu kona ku bonisa kuli lu sepile Jehova ka ku lapela ku yena ka t’ata. Lu tokwa ku lapela ni ku kupa ka t’ata ku Jehova kuli moya wa hae o kenile u lu tuse. (Luka 11:9-13) Sihulu lu kona ku kupa kuli lu be ni buiswalo, bo bu li muselo wa moya wa Mulimu o kenile. (Magalata 5:22, 23) Ku cwañi haiba lu kutela bufokoli bo bu swana? Lu si ke lwa zwafa ni kamuta. Lu si ke lwa tuhela ku lapela ka buikokobezo ku Mulimu wa luna ya musa, ili ku kupa swalelo ni tuso ya hae. Jehova ni kamuta h’a na ku hana, kamba ku fulalela “pilu ye lobehile, ye swabile” ye sisitwa ki lizwalo. (Samu 51:17) Haiba lu kupa ku yena ka pilu ye na ni niti, ye baka, Jehova u ka lu tusa ku tiyela miliko.—Mafilipi 4:6, 7.
17. (a) Ki kabakalañi ku yeya maikuto a Jehova ka za bufokoli bo lu lwanisa ha ku li ko ku tusa? (b) Ki mañolo mañi e lu kona ku peta haiba lu lwanisa bufokoli bwa ku halifa kapili? ku swala lilimi la luna? ku tiyela ku lata za ku itabisa ka zona ze si ka luka?
17 Hape lu kona ku bonisa kuli lu sepile Jehova ka ku eza patisiso mwa Linzwi la hae kuli li lu tuse. Ka ku itusisa Bible concordance (buka mo ku kolohanyizwe manzwi a mwa Bibele) kamba Mukoloko wa Litaba ze Bulezwi mwa Tora ya ku Libelela ya 12/15 ya silimo ni silimo, lwa kona ku bata kalabo kwa puzo ya kuli, ‘Jehova u ikutwa cwañi ka za bufokoli bo ni lwanisa?’ Ku yeya maikuto a Jehova ka za taba yeo ku kona ku tiisa takazo ya luna ya ku mu tabisa. Kacwalo, lu kona ku fita fa ku ikutwa mw’a ikutwela, ili ku toya z’a toile. (Samu 97:10) Ba bañwi ba fumani kuli ku peta mañolo a mwa Bibele a’ ama bufokoli bo ba lwanisa kwa tusa. Kana lu lwanisa bufokoli bwa ku halifa ka bunolo? Mwendi lwa kona ku peta mañolo a cwale ka Liproverbia 14:17 ni Maefese 4:31. Kana lu fumana butata ku swala lilimi la luna? Lwa kona ku peta mañolo a cwale ka Liproverbia 12:18 ni Maefese 4:29. Kana lu lata za ku itabisa ka zona ze si ka luka? Lwa kona ku lika ku hupula litimana ze cwale ka Maefese 5:3 ni Makolose 3:5.
18. Ki kabakalañi ha lu sa lukeli ku tuhelela maswabi ku lu palelwisa ku kupa tuso kwa maeluda ya ku tula bufokoli bwa luna?
18 Ku kupa tuso kwa maeluda ba ba ketilwe ka ketelelo ya moya ki nzila ye ñwi ya ku bonisa ka yona kuli lu sepile Jehova. (Likezo 20:28) Mane, bona “batu ba ba li limpo” bao ki tukiso yeo Jehova a ezize ka Kreste ya ku babalela ni ku sileleza lingu za hae. (Maefese 4:7, 8, 11-14, NW) Ki niti kuli ku kupa tuso ya ku lwanisa bufokoli ku kana kwa ba t’ata. Lu kana lwa swaba, ka ku saba kuli maeluda ba ka lu shungula. Kono luli, banna ba ba tiile kwa moya bao ba ka lu kuteka kakuli lu bile ni bundume bwa ku kupa tuso. Hape, maeluda ba lika ku bonisa mikwa ya Jehova mwa ku sebelisana ni mutapi. Likelezo za bona ze omba-omba, ze sebeza, ni liketelelo za bona ze zwa mwa Linzwi la Mulimu li kona ku ba zona ze lu tokwa kuli lu tiise katulo ya luna ya ku tula bufokoli bwa luna.—Jakobo 5:14-16.
19. (a) Satani u bata ku sebelisa cwañi bupilo bwa mbango mwa linako za cwale? (b) Sepo i amañi, mi katulo ya luna ye tiile i swanela ku ba ifi?
19 Mu si libali ni kamuta kuli Satani wa ziba kuli nako ya hae ki ye nyinyani. (Sinulo 12:12) U bata ku itusisa bupilo bwa mbango mwa lifasi le kuli a lu zwafise. Haike lu sepe ka ku tiya ze bulezwi kwa Maroma 8:35-39, kuli: “Ki mañi ya ka lu kauhanya ni lilato la Kreste? Kikuli ikaba butata, kamba ñalelwa, kamba manyando, kamba tala, kamba mapunu, kamba kozi, kamba lilumo? . . . Kono mwa linto zeo kaufela lu tula ni ku fita ka Ya lu latile. Kakuli ni kozwi kuli nihaiba lifu, nihaiba bupilo, nihaiba mangeloi, nihaiba ze busa, nihaiba ze li teñi cwale, nihaiba ze sa ta, nihaiba ze mata, nihaiba bupahamo kamba butasi, nihaiba nto ye ñwi ye bupilwe, ha ku na se si kona ku lu kauhanya ni lilato la Mulimu, le li li teñi ku Jesu Kreste Mulen’a luna.” Manzwi ao a bonisa sepo ku Jehova luli! Kono sepo ye cwalo haki maikuto fela. Kono ki sepo ye ama likatulo ze nahanisisizwe hande ze lu ezanga mwa bupilo bwa luna bwa ka zazi. Kacwalo he, lu eze katulo ye tiile ya ku sepa Jehova ka ku tala mwa linako ze t’ata.
[Litaluso za kwatasi]
^ para. 1 Mwa liñolo la November 20, 1861, leo Muñoli wa Pulukelo ya Mali, Salmon P. Chase n’a ñolezi kwa kampani ya kwa America ye panganga muwayawaya, n’a ize: “Ha ku na naha ye kona ku tiya haiba i sa tiiswi ki Mulimu, kamba ye kona ku silelezwa haiba i sa silelezwi ki Yena. Sepo ya batu ba luna ku Mulimu i lukela ku zibahazwa fa muwayawaya wa naha ya luna.” Kacwalo, mukanga wa kuli “In God We Trust” ne u bonahezi lwa pili fa muwayawaya wa kwa America ka 1864.
^ para. 7 Ku bilaela ko ku taluswa fa ku bulelwa kuli ki ku “ikalelwa, ko ku felisa tabo kaufela mwa bupilo.” Mutolokelo o cwale ka wa kuli “mu si ke mwa bilaela” u bonisa kuli ha lu swaneli ku kalisa ku bilaela. Kono hatiso ye ñwi i li: “Linzwi la Sigerike le li itusisizwe li bonisa kuli ki nto ye lukela ku eziwa honafa, ili le li bonisa kuli ki taelo ya ku tuhela nto ye sweli ku eziwa.”
^ para. 9 Lisupo ze 8 ki ze: (1) Mu si ke mwa tula pilu; (2) mu be ni mubonelo o munde; (3) mu be ba ba tabela ku eza misebezi i sili; (4) mu pile ka ku ya ka mo mu konela—isi ku likanyisa ba bañwi; (5) mu tokomele hahulu likoloti; (6) lubasi lwa mina lu swalisane; (7) mu si ke mwa kala ku ikutwa kuli ha mu na tuso; ni (8) mu tomahanye hande mo mu ka sebeliseza mali.
^ para. 13 Lihatiso zeo ze tomile fa litaba za mwa Bibele ha li babazi kamba ku yemela kalafo ifi kamba ifi, ka ku lemuha kuli zeo ki litaba z’a swanela ku ikatulela mutu. Kono litaba ze ambola za matuku a mañwi li lelezwi ku zibisa babali litaba ze zibahala cwale.
Kana Mwa Hupula?
• Ha lu na ni butata bwa za mali, lu kona ku bonisa ka linzila lifi kuli lu sepile Jehova?
• Lu kona ku bonisa cwañi kuli lu sepile Mulimu ha lu na ni butata bwa makulanu?
• Haiba bufokoli bwa nama ha bu feli, lu kona ku bonisa cwañi kuli kaniti lu itingile ku Jehova?
[Lipuzo za Tuto]
[Mbokisi fa likepe 17]
Kana Mwa Hupula Litaba Ze?
Ha lu kula, ku bala ka za ba bañwi ba ba tuzi matuku ni buhole kwa susueza. Ki ze litaba ze ñwi ze hatisizwe mwa limagazini za Tora ya ku Libelela ni Awake!
“Coping With My Weaknesses” ne i bonisa za ku eza ka za mihupulo ye maswe ni ku felelwa ki tabo.—The Watchtower, May 1, 1990.
“Not Even an Iron Lung Could Stop Her Preaching.”—Awake!, January 22, 1993.
“A Bullet Changed My Life” ne i bulela ka za ku eza mutu h’a omelezi lilama za mubili.—Awake!, October 22, 1995.
“You Do Not Know What Your Life Will Be Tomorrow” ne i bulela za butuku bwa bipolar mood disorder.—The Watchtower, December 1, 2000.
“Loida’s Journey out of Silence” ne i talusa za ku eza ka za cerebral palsy (butuku bwa ku omelela luñañali kabakala ku kula mwa munahano).—Awake!, May 8, 2000.
“My Struggle With Endometriosis.”—Awake!, July 22, 2000.
“My Fight With Scleroderma.”—Awake!, August 8, 2001.
“I Won My Battle With Postpartum Depression.”—Awake!, July 22, 2002.
[Siswaniso se si fa likepe 15]
Ha lu zwile fa musebezi, ne lu ka eza hande ku tatuba bupilo bwa luna
[Siswaniso se si fa likepe 16]
Taba ya Loida i bonisa m’o ku sepa Jehova ku tuseza mutu ku tiya (Mu bone sikwenda se si fa likepe 17)
[Siswaniso se si fa likepe 18]
Ha lu tokwi ku swabela ku kupa tuso kuli lu tule bufokoli bwa luna