“Ku Zibahaza Libizo la Jehova”

KAI NI kai mwa lifasi, limagazini za Tora ya ku Libelela ni Awake! za itebuhiwa kakuli li banga ni litaba za kwa moya ni kuli za luta. Seo si boniswa ki liñolo la mubali yo muñwi wa kwa France ya n’a ñozi kuli:

“Ni kalibe, haesu ki kwa Africa, mi a ni si ka ituta hahulu kwa sikolo. Nakonyana kwamulaho, ne ni kalile ku balanga limagazini za mina. Ka ku tabela litaba ze ku zona, ni sweli na iponela butokwa bwa ku bala. Ka limagazini za mina, mane se ni ziba manzwi a mañata mi se ni kona ku ñola liñolo ku si na ku eza mafosisa a mañata.

“Ni komokile ku bona kuli mu ñolanga lika kaufela ze ama batu, lifasi, ni Mubupi. Litaba za teñi za utwahala kuli mane li susueza mutu ku ba mubali yo mutuna. Ha ku na yo muñwi ya na ni buikoneli bwa ku luta batu ba mifuta kaufela ka nako ye swana.

“Ni komoka hape ku bona kuli lika ze kaufela ha li ezezwi ku fumana mali, kono ki ka mulelo fela wa ku zibahaza libizo la Jehova. Na ziba kuli Mulimu wa mi katelwa, mi na itumela ku mina. Shangwe mu si ke mwa lisela ku kupa m’ata ku Mubupi ilikuli mu kone ku luta.”

Lipaki za Jehova cwale ba eza musebezi wa bona wa ku luta Bibele mwa linaha ze 235. Tora ya ku Libelela i hatiswa mwa lipuo ze 148 mi Awake! mwa lipuo ze 87. Lihatiso zeo ha li hatisezwi kuli li bubeke mutu ufi kamba ufi. Kelezo ye tomile fa Bibele ni litaba ze si za kale ze fumaneha mwateñi li lukiselizwe ku lumbeka Mubupi, ya li: “Na [Muñ’a] Bupilo . . . ni ku luta se si ku swanela.” (Isaya 48:17) Haike mu ituse ka ku bala Mañolo a Kenile kamita, hamoho cwalo ni lihatiso za ku ituta Bibele ka zona.