Kana Mwa Ziba Tabo Ye Zwa mwa ku Fana?

KAIZELI yo muñwi n’a tukufalezwi mwa musebezi wa Sikreste ka lilimo ze bat’o ba ze 50. Nihaike kuli n’a fokozi bakeñisa ku supala, n’a bata luli ku bona Ndu ya Mubuso ye nca. Ka ku tiyela fa lizoho la muzwale wa Sikreste, a kena mwahali mi sina mwa n’a lelezi, a zamaya hanyinyani-hanyinyani a libile kwa mbokisi ya linubu. A yo beya mwateñi nubu ye likani ya n’a bulukezi ku fa ha ne ku ka yahiwa Ndu ya Mubuso ye nca. Nihaike kuli n’a sa koni ku tusa kwa ku yaha Ndu ya Mubuso, n’a bata ku eza se siñwi ni yena.

Musali wa Sikreste yo u kana a mi hupulisa musali yo muñwi ya sepahala—“musali wa mbelwa ya shebile” ili yo Jesu n’a boni ha beya tulinyana to tubeli mwa sibulukelo sa tempele. Ha lu si ka talusezwa ka za miinelo ya n’a li ku yona, kono ku latehelwa ki munna ka nako yeo ne ku kona ku bisa musali mwa butokwi bwa mali. Kaniti Jesu n’a mu shwezi makeke kakuli n’a utwisisa luli butata bwa n’a li ku bona. Ka ku itusisa musali yo sina mutala kwa balutiwa ba hae, n’a bulezi kuli nubu ya hae ye nyinyani ne i yemela “s’a sweli kaufela, s’a n’a ka pila ka sona.”—Mareka 12:41.

Ki kabakalañi musali ya n’a li mwa butokwi inge musali ya shebile yo ha n’a fanile mali a hae kaufela cwalo? Kaniti, ne li kabakala kuli n’a li ya ineezi luli ku Jehova Mulimu, ya n’a lapelelwa kwa tempele ya mwa Jerusalema. Niha n’a kona fela ku eza ze nyinyani, n’a bata ku zwisezapili sebelezo ye kenile. Mi u lukela ku ba ya n’a tabile luli ka ku fana mwa n’a konela kaufela.

Ku Fana Ilikuli Musebezi wa Jehova U Zwelepili

Ku fa linubu za lika ze ñwi ni za mali kamita i bile nto ya butokwa mwa bulapeli bo bu kenile, mi kamita ku tahisize tabo ye tuna. (1 Makolonika 29:9) Mwa Isilaele wa kwaikale linubu ne li sa itusiswi fela kwa ku kabisa tempele kono ne li itusiswa hape ni kwa ku bona teñi kuli likalulo kaufela za bulapeli bwa Jehova za ka zazi za petiwa. Mulao ne u laezi bana ba Isilaele ku fa nto i liñwi ku ze lishumi za maluo a bona kaufela kwa Malivi, be ne ba sebeleza mwa tempele. Kono Malivi ni bona ne ba na ni ku fa i liñwi ku ze lishumi ze ne ba amuhelakuli i be nubu ku Jehova.—Numere 18:21-29.

Nihaike Bakreste ne ba lukuluzwi ku ze ne  u tokwa Mulao wa bulikani, sikuka sa kuli batanga ba Mulimu ba swanela ku fa linubu ze tusa kwa ku zwisezapili bulapeli bwa niti ha si si ka cinca. (Magalata 5:1) Hape, Bakreste ba kwa makalelo ne ba fumani tabo mwa ku fa linubu kuli ba tuse mizwale ba bona be ne ba li mwa butokwi. (Likezo 2:45, 46) Muapositola Paulusi n’a hupulisize Bakreste kuli sina Mulimu mwa n’a ba fezi lika ze nde ka bufani bo butuna, ni bona ba swanela ku tusa ba bañwi. N’a ñozi kuli: “Laela ba ba luwile bufumu bwa nako ya cwale, kuli ba si ke ba ipona butuna, ba si ke ba sepa bufumu bo bu sa tiyi; kono ba sepe Mulimu ya lu fanga linto kaufela ka buñata kuli lu li tabele. Ba sebeze ze nde; ba fume misebezi ye minde; ba abe za bona; ba tuse ba bañwi; kuli ba ikubukanyeze bufumu bwa mwa linako ze taha, bo bu na ni mutomo o munde, kuli ba y’o amuhela bupilo bo bu sa feli.” (1 Timotea 6:17-19; 2 Makorinte 9:11) Kaniti, sina mo ne ku bezi ku yena, Paulusi n’a kona ku paka manzwi a Jesu a li: “Ku na ni mbuyoti mwa ku fana, ye fita ye mwa ku fiwa.”—Likezo 20:35.

Bufani bwa Sikreste Kacenu

Kacenu, batanga ba Jehova ba zwelapili ku tusana ni ku zwisezapili musebezi wa Mulimu ka ku itusisa maluo a bona. Mane nihaiba ba ba sina hande maluwo ba fanga mo ba konela kaufela. “Mutanga ya sepahala, ya na ni kutwisiso” u ikutwa ku ba ni buikalabelo ku Jehova bwa ku itusisa hande linubu zeo. (Mateu 24:45) Linubu li itusiswa kwa ku zamaisa liofisi za mutai, ku toloka ni ku hatisa Libibele ni lihatiso ze tomile fa Bibele, ku lukisa za mikopano ye mituna ya Sikreste, ku luta ni ku luma baokameli ba maeto ni balumiwa, ku lukisa za lituso za ba ba tahezwi ki likozi, ni mwa linzila ze ñwi ze tokwahala. Ha lu nyakisiseñi nzila i liñwi ya mo li itusisezwa—ku yaha miyaho ya ku lapelela teñi.

Lipaki za Jehova ba kopanelanga mwa Mandu a Mubuso a bona ha sikai mwa sunda mi teñi m’o ba ikolanga lituto za kwa moya ni sango se sinde. Nihakulicwalo, mwa linaha ze ñwi, butata bwa za mali bu palelwisanga Lipaki ku icahela Mandu a Mubuso ba si ka fiwa pili tuso ya mali. Kabakaleo, mwa 1999, Lipaki za Jehova ba lukisa ku itusisa linubu ze zwelela kwa linaha ze fumile kwa ku tusa ku yaha Mandu a Mubuso mwa linaha ze shebile. Fahalimw’a seo, baitateli ba bañata ba itusisize nako ni buikoneli bwa bona, hañata inze ba sebeleza mwa matakanyani. Ka nako ya ku yaha, Lipaki ba ba yahelwa muyaho  ba itutanga bukwala bwa ku yaha ni bwa ku babalela muyaho, mi Mali a ku yahisa Mandu a Mubuso a tusanga kwa ku leka liitusiso ze tokwahala. Lipaki ba ba itusisa miyaho ye minca ye cwale ba itebuha luli kuli mizwale ba bona ne ba itusisize nako ni mali a bona. Hape Lipaki ba mwa silalanda ba fanga linubu ka kweli ze itusiswa kwa ku babalela Ndu ya Mubuso ya bona ye nca ni ku lifela lisinyehelo za musebezi wa ku yaha, mi kacwalo ba tusa ku yaha Mandu a Mubuso a mañwi.

Mandu a Mubuso a yahiwanga ka ku itusisa miezezo ni liyahiso za mwa sibaka mo a yahiwa. Nihaike kuli miyaho ye haki ye kabisizwe hahulu, ya buheha mi ya kateleha. Tukiso ye ha ne i kalile mwa 1999, linaha ze sina hande mali ze bat’o ba ze 40 ne li fumani tuso yeo. Ku zwa nako yeo, tukiso ya ku yaha i yanduluzwi kuli i kone ku kopanyeleza linaha ze cwalo ze 116, mi f’o kikuli, palo ye fitelela licika la palo kaufela ya liputeho za Lipaki za Jehova. Mwa lilimo ze ketalizoho ze felile, Mandu a Mubuso a fitelela 9,000 se a yahilwe ka tukiso ye, mi f’o ku talusa kuli Mandu a Mubuso a fitelela a ketalizoho a yahiwa ka zazi! Niteñi, mwa linaha ze 116 zeo, ku sa na ni butokwi bwa Mandu a Mubuso a manca a fitelela 14,500. Ka tuso ya Jehova ni ka buitateli ni bufani bwa Lipaki ba mwa lifasi kaufela, ku sepiwa kuli linubu za ku petisa musebezi wo li ka fumaneha.—Samu 127:1.

Mandu a Mubuso a Tisa Kekezeho

Mungendenge wo u tusize cwañi Lipaki ba mwa sibaka ni musebezi wa ku shaela za Mubuso? Mwa libaka ze ñata, ku bile ni kekezeho ye tuna ya baputehi kwa mikopano hasamulaho wa ku yahiwa kwa Ndu ya Mubuso ye nca. Mutala o munde o bonisa cwalo u fumanwa mwa piho ye zwelela kwa Burundi ye li: “Ndu ya Mubuso i sa fezwa fela ku yahiwa, ya talanga. Ka mutala, Ndu ya Mubuso ye ñwi ne i yahezwi puteho ye ne na ni batu ba 100 be ne ba fumanehanga kwa mikopano. Ndu ya Mubuso ya bona ye nca i kona ku kwana batu ba 150 ku si na ku sinana. Ka nako ye ne i felizwe, batu ba 250 ne ba fumaneha kwa mikopano.”

Ki kabakalañi ha ku banga ni kekezeho ye cwalo? Fokuñwi likwata za bahasanyi ba Mubuso ba ba si na sibaka sa ku kopanela kono ili ba ba kopanelanga mwatas’a kota kamba mwa simu ba hupulelwanga bumaswe. Mwa  naha ye ñwi, lindwa za mukowa kuti li tahiswanga ki likwata ze nyinyani ze cwalo, mi mane ka mulao mikopano ya bulapeli kaufela i swanela ku bela mwa muyaho wa ku lapelela teñi.

Ku ba ni miyaho ya bona hape ku tusa Lipaki za Jehova ku bonisa ba mwa silalanda kuli haki balutiwa ba pasita ufi kamba ufi. Mutai wa Lipaki za Jehova wa kwa Zimbabwe ne u ñozi kuli: “Kale, mizwale ba mwa naha ye ne ba kopanelanga mwa mandu, mi batu ba mwa silalanda ne ba ba nganga kuli muñ’a ndu mo ne ba kopanelanga ki yena muñ’a puteho. Ne ba bizanga mizwale kuli ki ba keleke ya Bo ngete. Zeo kaufela li sweli za cinca ka ku ba kuli batu cwale se ba kona ku iponela hande miyaho fo ku ñozwi kuli ‘Ndu ya Mubuso ya Lipaki za Jehova.’”

Bafani Ba Ba Tabile

Muapositola Paulusi n’a ñozi kuli: “Mulimu u lata ya fana a tabile.” (2 Makorinte 9:7) Ki niti kuli linubu ze tuna za tusanga luli.  Kono buñata bwa linubu ze fiwanga kwa musebezi wa Lipaki za Jehova li zwelelanga mwa mambokisi a linubu a mwa Mandu a Mubuso. Linubu kaufela za itebuhiwanga, ibe ze tuna kamba ze nyinyani. Mu hupule kuli Jesu n’a boni mbelwa ya shebile ha fa nubu ya hae ya tulinyana to tubeli. Mangeloi ni Jehova ni bona ne ba mu boni. Ha lu zibi nihaiba libizo la hae mbelwa yo, kono Jehova n’a boni teñi kuli kezo ya hae ye lilato yeo ne i ñozwi mwa Bibele.

Kwand’a ku yaha Mandu a Mubuso, linubu za luna li tusa likalulo kaufela za musebezi o butokwa wa Mubuso. Ku fa linubu ka nzila ye ku lu nyakalalisa ni ku “ekeza kwa buitumelo bo bu isezwa Mulimu.” (2 Makorinte 9:12) Mizwale ba luna ba Sikreste ba kwa Benin ba bihile kuli: “Litapelo za buitumelo li sweli za fitiswa ku Mulimu ka zazi kwa tuso ya mali ye lu filwe ki kopano ya luna ya mwa lifasi kaufela.” Ka nako ye swana, kaufela luna ba ba zwisezapili musebezi wa Mubuso ka ku fa linubu lu fumana tabo ye zwa mwa ku fana kwa Sikreste!

[Mbokisi/Siswaniso se si fa likepe 22, 23]

Linzila Zeo ka Zona Ba Bañwi Ba Iketela ku Fa

LINUBU ZA MUSEBEZI WA MWA LIFASI KAMUKANA

Ba bañata ba beyanga kwatuko mali a ku beya mwa mambokisi a linubu a ñozwi kuli “Linubu za Musebezi wa mwa Lifasi Kaufela—Mateu 24:14.”

Ka kweli, liputeho li lumelanga mali ao kwa ofisi ya Lipaki za Jehova ya mwa naha ya zona. Linubu za ka ku itatela hape li kana za lumelwa kwa Watch Tower Bible and Tract Society of Pennsylvania, Box 33459, Lusaka 10101. Macheke a swanela ku lifiwa kwa “Watch Tower.” Lika za bukabali kamba ze ñwi cwalo za butokwa ni zona za kona ku fiwa. Liñolo le li talusa ka bukuswani kuli zeo ki limpo za ka ku itatela li lukela ku tahelela ni linubu zeo.

TUKISO YA LINUBU ZA KA TUMELELANO

Mali a kona ku beiwa mwa pabalelo ya Watch Tower. Nihakulicwalo, mutu ya fa nubu wa kona ku kutisezwa mali a hae haiba a’ kupa. Haiba mu bata litaba ze ñwi, shangwe mu ñolele kwa “Treasurer’s Office” (Ofisi ya Mubuluki wa Sikwama) kwa keyala ye bonisizwe fahalimu.

MILELO YA KU FANA

Kwand’a linubu za mali ze fiwa luli, ku na ni mifelo ye miñwi ya ku tusa ka yona sebelezo ya Mubuso mwa lifasi kamukana. Yeo i kopanyeleza:

Mali a Silelezo: Watch Tower ya kona ku fiwa ku amuhela mali a n’a bulukezwi ku itusiswa ka nako ya likozi kamba mali a fiwa mutu ya tuhela musebezi.

Mali A Bulukiwa mwa Panga: Mali a bulukiswa mwa panga, mapampili a mali a bulukisizwe, kamba mali a fiwa mutu ya tuhela musebezi a kona ku beiwa mwa pabalelo ya Watch Tower fa lifu la mutu, ka ku ya ka ze i tokwa panga.

Ma-Stock ni Ma-Bond: Ma-stock ni ma-bond a kona ku fiwa kwa Watch Tower sina mpo luli.

Miyaho ya ka Butu: Miyaho ya ka butu ye kona ku lekiswa ya kona ku fiwa luli sina mpo kamba, haiba ki ndu i bulukelwe mufani ya kona ku zwelapili ku pila teñi ku fitela a shwa. Mu ñolele kwa ofisi ya mutai mwa naha ya habo mina pili mu si ka fanisa kale muyaho wa mina.

Ma-Will ni ma-Trust: Tutu kamba mali a kona ku fiwa kwa Watch Tower ka ku itusisa will (pampili ye bonisa mwa batela mutu kuli libyana za hae li abelwe ha s’a shwile) ye ñozwi ka mulao, kamba Watch Tower ya kona ku kalimiwa nto ye ñwi kuli i itusise yona, ili nto ye bizwa trust. Trust ye fiwa kwa kopano ya bulapeli i kona ku tahisa kuli mutu a si ke a telela lika ze ñwi.

Sina pulelo ya kuli “milelo ya ku fana” ha i talusa cwalo, linubu ze cwalo li tokwa hahulu kuli mufani a nahanisise hande.

Haiba mu itakaleza ku fana mwa tukiso ifi kamba ifi ya linubu za ka ku itatela, mu lizeze luwaile kamba ku ñolela kwa Ofisi ya Mubuluki wa Sikwama ka ku itusisa keyala ye bonisizwe kwatasi kamba kwa ofisi ya Lipaki za Jehova ye mwa naha ya mina.

Treasurer’s Office

Watch Tower Bible and Tract

Society of Pennsylvania

Box 33459, Lusaka 10101

Telephone: (01) 272062

Zambia

[Maswaniso a fa likepe 20, 21]

Libaka za ku kopanela za Lipaki za Jehova za kale ni ze nca

Zambia

Central African Republic