Kana Mu Nyolezwi ku Pila mwa Lifasi Le Li Si Na Sabo?

“Lu pila bupilo bwa ‘ku tokomela hahulu ni . . . ku ziyeleha,’ ko ku tiswa ki ‘kozi ye sa talusehi hande . . . ye kona ku taha ka sipundumukela ka nzila ifi kamba ifi ku si na temuso.’”

MANZWI ao, a n’a kutezwi ku ñolwa mwa koranta ye bizwa Newsweek, a bonisa mo ba ikutwela batu ba bañata ba ba pila mwa lifasi la kacenu le li mwa butata le. Jesu Kreste n’a bonisize kuli maikuto a cwalo n’a ka ekezeha kwapilinyana. N’a bulezi cimo ka za nako yeo macaba n’a ka kalelwa hahulu kabakala ku sa ziba mwa ku ezeza mi batu ne ba ka omelela kabakala ku saba ni ku libelela ze ka taha mwa lifasi. Kono luna ha lu swaneli ku ba ni sabo kamba ku ikutwa ku ziyeleha cwalo, kakuli Jesu n’a ekelize kuli: “Zeo ha li ka kala ku taha, mu talimise meto kwahalimu, mi mu inuke; kakuli ku liululwa kwa mina ku se ku li fakaufi.”​—Luka 21:​25-28.

Ha n’a talusa mo ne ba ka pilela batu ba hae fa lifasi ha se ba pulusizwe cwalo, Jehova Mulimu n’a ize: “Sicaba sa ka si ka yaha mwa naha ya kozo, si pile mwa mandu a tiile, mwa mabaka fo ku kuzize, fo ku iketilwe.” (Isaya 32:18) Jehova n’a bulezi ka mupolofita wa hae Mika kuli: “Ba ka ina, mutu ni mutu mwa kota ya hae ya veine ni mwa kota ya hae ya feiga, ku si na ya ba sabisa.”​—Mika 4:⁠4.

Mupilelo wo u fapahanela kwahule ni mo bu inezi bupilo kacenu! Batu ha ba na ku sabiswa ki likozi ze sa zibwi. Ku fita ku pila bupilo bwa ku tokomela hahulu ni ku ziyeleha, batu ba ka ikola kozo ni tabo ze ka ina ku ya ku ile.